Serbia e shqetësuar para ndeshjes me Shqipërinë: Federata paralajmëron për një duel me rrezik maksimal

Ngjarjet e kaluara duket se ende ndikojnë tek ëndrrat e Serbisë. Federata Serbe e Futbollit ka lëshuar një paralajmërim të fortë ndërsa afron ndeshja kundër Shqipërisë për eliminatoret e Botërorit.

Institucioni ka publikuar një komunikatë të fuqishme, e cila u shpërnda në të gjitha mediat dhe u kërkua që të botohej në tërësinë e saj. Shumë media e kanë përmbushur këtë kërkesë, ndërsa Federata thekson se sfida e 11 tetorit klasifikohet si me shkallë më të lartë të rrezikut.

Për të ilustruar seriozitetin e situatës, drejtuesit e federatës njoftuan se FIFA, në një hap të rrallë, ka dërguar dy agjentë të sigurisë për të monitoruar ndeshjen në stadiumin e Leskovcit, duke treguar rëndësinë e këtij dueli dhe nevojën që fokusi të mbetet vetëm tek aspekti sportiv.

Gjithashtu, Federata ka formuar një grup koordinimi me Ministrinë e Punëve të Brendshme të Serbisë, me autoritetet tjera përkatëse, si dhe me FIFA-n dhe UEFA-n.

Në komunikatë rikujtohet edhe incidenti i tetorit 2014, kur tifozët hynë në fushën e stadiumit të Partizanit në Beograd pasi një dron shfaqte banderolë, duke sulmuar edhe lojtarët e kombëtares shqiptare, përfshirë edhe rojet e sigurisë. Ky episod shkaktoi dëme të konsiderueshme, si në aspektin sportiv, ashtu edhe financiar.