Burim Ramaj shpallet doktor shkence në Universitetin e Friburgut

Studimi mbi kanunin shqiptar i sjell titullin “Doktor Shkence” Burim Ramajt në Zvicër

Në Universitetin prestigjioz të Friburgut në Zvicër, studiuesi shqiptar Burim Ramaj është shpallur doktor shkence me një temë që lidhet ngushtë me trashëgiminë juridike dhe kulturore shqiptare: “Pluralizmi juridik sipas kanunit shqiptar”, shkruan albinfo.ch.

Ceremonia solemne e mbajtur në ambientet e universitetit mblodhi familjarë, miq dhe profesorë, ndërsa mentori i punimit, Prof. Dr. René Pahd de Mortanges, vlerësoi lart kontributin shkencor të studimit, duke e cilësuar si një analizë të thellë mbi ndërthurjen e së drejtës zakonore shqiptare me sistemin juridik modern.

Në mesin e shtatë kandidatëve që morën titullin e doktorit të shkencave, Burim Ramaj spikati jo vetëm për vlerën akademike të temës, por edhe për mesazhin që ajo përcjell mbi ruajtjen e identitetit juridik dhe kulturor të shqiptarëve në kontekstin e integrimit evropian.

Në këtë ditë të rëndësishme, përkrah tij ishte edhe babai i tij, Marian Ramaj, i njohur për dashurinë dhe përkushtimin ndaj arsimit. Ai u shpreh krenar për arritjen e të birit, i cili në moshën vetëm dyvjeçare ishte larguar nga Kosova për një jetë të re në Zvicër, një histori që sot frymëzon shumë të rinj shqiptarë në diasporë.

Në ceremoninë e diplomimit mori pjesë edhe poeti Musa Jupolli, mik i afërt i doktorit të ri, i cili e përshkroi këtë moment si një “fitore të dijes dhe përkushtimit shqiptar në mërgatë”.

Suksesi i Ramajt vjen në një periudhë kur gjithnjë e më shumë të rinj shqiptarë po dallohen në universitetet zvicerane. Ndër ta është edhe Doriela Grabocka (Dori) nga Korça, e cila pritet të marrë së shpejti titullin e doktoraturës në ETH Cyrih, një tjetër dëshmi e potencialit të jashtëzakonshëm të shqiptarëve në fushën e shkencës dhe kërkimit akademik. /Albinfo.ch

---