Pas humbjes nga Kosova, sllovenët bëjnë thirrje për bojkot të furrave shqiptare

Thirrje për bojkot të furrave shqiptare në Slloveni pas incidentit me himnin

Në rrjetet sociale në Slloveni ka nisur të qarkullojë një thirrje për bojkot ndaj furrave dhe bizneseve shqiptare, pas ndeshjes së fundit mes Kosovës dhe Sllovenisë, e cila përfundoi me fitoren e Kosovës. Mesazhi, që po përhapet me shpejtësi, pretendon se sjellja e disa tifozëve kosovarë ndaj himnit slloven gjatë ndeshjes është arsyeja kryesore e këtij bojkoti, përcjell albinfo.ch.

Thirrja u përhap fillimisht në Facebook, ku ndër personat që e kanë shpërndarë është edhe Joze Petkovsek, një sipërmarrës i njohur në Slloveni. Ai ka publikuar një tekst në të cilin u kërkon qytetarëve sllovenë që të shmangin blerjet në furrat e bukës që menaxhohen nga shqiptarët, duke bashkëngjitur edhe fotografi të disa prej bizneseve të tyre.

“BOJKOTONI FURRAT SHQIPTARE! Për shkak të ngjarjeve të fundit dhe sjelljes së kosovarëve ndaj himnit slloven, i bëj thirrje të gjithë sllovenëve të bojkotojnë furrat shqiptare!”, shkruhet në postimin e Petkovsek.

Reagimet në komente janë të ndara, por një pjesë e madhe shprehin mbështetje për këtë nismë. Disa komentues thonë se i kanë bojkotuar prej kohësh, ndërsa të tjerë sugjerojnë zgjerimin e bojkotit edhe ndaj kategorive të tjera të bizneseve shqiptare.

Ndërkohë, komuniteti shqiptar në Slloveni nuk ka reaguar ende në mënyrë zyrtare, por përdorues të shumtë në rrjete sociale e kanë cilësuar këtë fushatë si të padrejtë dhe të rrezikshme, duke theksuar se sporti nuk duhet të përdoret si arsye për diskriminim ekonomik.

Derisa tensionet online vazhdojnë, mbetet për t’u parë nëse kjo thirrje do të ketë ndikim real në jetën e përditshme dhe në marrëdhëniet mes komuniteteve në Slloveni.

---