Kapet marihuanë në kufirin Shqipëri-Kosovë

“Gjatë kontrollit nga ana e oficerëve doganorë është gjetur substanca e fshehur nën ulësen e pasme të automjetit. Personi menjëherë është arrestuar

Oficerët doganorë të Kosovës kapën mëngjesin e të dielës 6 kg narkotikë të llojit marihuanë, në Vërmicë – kufiri Kosovë-Shqipëri. Siç bën të ditur shërbimi për media i Doganave të Kosovës, një shtetas i Republikës së Shqipërisë është ndaluar si i dyshimtë i involvuar në këtë ngjarje.

“Gjatë kontrollit nga ana e oficerëve doganorë është gjetur substanca e fshehur nën ulësen e pasme të automjetit. Personi menjëherë është arrestuar si dhe rasti është përcjellë tutje te Policia për përpilimin e kallëzimit penal. Ky rast tregon përkushtimin e oficerëve doganorë në mbrojtjen e shoqërisë dhe parandalimin e krimit të organizuar ndërkufitar”, thuhet në njoftimin e Doganave.

Ndryshe, pikëkalimi kufitar mes Kosovës dhe Shqipërisë në Vërmicë, ditëve të fundit ka shtuar intensitetin e punëve për shkak të fluksit të madh të turistëve kosovarë që po ia mësyjnë bregdetit shqiptar, si dhe të ardhjes së mërgimtarëve për pushime në Kosovë. Doganat e Kosovës u kanë bërë thirrje të gjithë qytetarëve që frekuentojnë këtë pikëkalim kufitar, të lajmërojnë për rastet e dyshimta që mund t’i hasin gjatë rrugës, përmes linjës së sigurt telefonike 0800 50 095.