Numërimi drejt fundit: VV prin me 50,09% të votave

Komisioni Qendror i Zgjedhjeve (KQZ) ka publikuar rezultatet më të fundit preliminare nga zgjedhjet e parakohshme parlamentare të mbajtura sot në Kosovë, ndërsa procesi i numërimit po shkon drejt përfundimit. Sipas këtyre të dhënave, VV po prin bindshëm në garën zgjedhore.

Sipas përditësimit të bërë më 28 dhjetor 2025, ora 21:29, janë përpunuar 834,447 vota, që përbëjnë 41,74% të totalit prej 1,999,204 votash. Ndërkohë, janë procesuar 2,351 vendvotime nga 2,557, apo 91,94%, çka tregon se numërimi është në fazën përfundimtare.

Në bazë të rezultateve aktuale:

VV kryeson me 50,09% të votave, ose 405,075 vota

PDK renditet e dyta me 20,96% (169,537 vota)

LDK është e treta me 13,89% (112,362 vota)

Rezultatet për partitë tjera janë:

AAK: 5,89% (47,674 vota)

Srpska Lista: 3,56% (28,817 vota)

NISMA Socialdemokrate: 1,64% (13,232 vota)

Nga KQZ theksohet se këto janë rezultate preliminare, ndërsa në fazat e ardhshme do të numërohen votat me kusht, votat me postë dhe ato nga diaspora. Megjithatë, me mbi 90 për qind të vendvotimeve të përpunuara, epërsia e VV-së konsiderohet e qartë dhe bindëse.