Influenca e Xhakës te Sunderland, rrit standardet dhe frymëzon ekipin

Tjetër vlerësim për Xhakën në Angli

Kapiteni i Sunderlandit, Granit Xhaka, ka marrë lëvdata të jashtëzakonshme për ndikimin e tij te “Macet e Zeza” këtë edicion. Prania dhe roli i tij brenda ekipit ka tërhequr vëmendjen e ish-lojtarëve dhe gazetarëve sportivë, duke u bërë një nga figurat kyçe të ekipit, përcjell albinfo.ch.

Xhaka ka qenë titullar në të gjitha 22 ndeshjet e Premier League, duke kontribuar me pesë asistime. Si lider, ai ka ndihmuar Sunderlandin të zërë vendin e nëntë me 33 pikë, vetëm katër pikë larg katër ekipeve kryesore që luftojnë për vendet e para.

Gazetari Ian Murtagh e ka vlerësuar të mërkurën mesfushorin shqiptar. Për BBC, Murtagh tha se prania e Xhakës në dhomat e zhveshjes dhe në fushë ka pasur ndikim të madh në rezultatet e Sunderlandit.

“Ai është transferimi më me ndikim në verilindje që nga Kevin Keegan te Newcastle në vitin 1982,” deklaroi Murtagh.

Gazetari shtoi: “Nuk po them domosdoshmërish më i miri, por për sa i përket ndikimit, rritjes së standardeve dhe komunikimit me shokët e ekipit, mendoj se ka ngjashmëri të madhe midis të dyve – edhe pse kanë 40 vjet diferencë.”

Ndikimi i Xhakës te Sunderland nuk matet vetëm me statistika; ai ka ndryshuar mënyrën e lojës së ekipit dhe ka ngritur standardet brenda skuadrës, duke treguar se është një udhëheqës i vërtetë dhe një nga mesfushorët më të respektuar në ligë. /Albinfo.ch

---