NATO kërkon që Beogradi të marrë përgjegjësi për ngjarjet në Banjskë dhe sulmin ndaj KFOR-it

Foto sc FB: MinPres Mark Rutte

Sekretari i Përgjithshëm i NATO-s, Mark Rutte, ka kërkuar nga autoritetet në Beograd që të marrin përgjegjësi për incidentet e ndodhura në Kosovë, duke përfshirë sulmin në Banjskë dhe sulmet ndaj forcave të KFOR-it gjatë tensioneve të pranverës së vitit 2023.

“Kam një marrëdhënie personale me presidentin e Serbisë, Aleksandar Vuçiq, që daton prej vitesh. Por pritshmëria ime është që ai të përcaktojë qartë përgjegjësinë për ngjarjet e kaluar, sidomos për dy raste specifike. Për këto dy ngjarje, ai ka premtuar të sqarojë përgjegjësinë,” deklaroi Rutte.

Ai foli për këtë gjatë një seance në Komitetin për Punë të Jashtme të Parlamentit Evropian (AFET), duke rikujtuar gjithashtu përkushtimin e NATO-s për stabilitetin në Ballkanin Perëndimor dhe mbështetjen për dialogun mes Kosovës dhe Serbisë, të ndërmjetësuar nga Bashkimi Evropian.

Rutte nënvizoi se NATO-ja do të qëndrojë e angazhuar për ruajtjen e sigurisë në rajon dhe nuk do të lejojë krijimin e një boshllëku sigurie në Bosnje e Hercegovinë.

Tensionet mes Kosovës dhe Serbisë kanë qenë të larta vitet e fundit. Incidenti më i rëndë ndodhi në shtator të vitit 2023 në Banjskë të Zveçanit, ku një grup serbësh të armatosur sulmuan Policinë e Kosovës, duke vrarë një rreshter, ndërsa tre sulmues serbë humbën jetën gjatë përleshjes.

Millán Radoiçiq, politikani dhe biznesmeni serb, e mori përgjegjësinë për sulmin dhe aktualisht ndodhet në Serbi, ku nuk ka pasur ndjekje penale ndaj tij.

Ngjarjet u paraprinë nga protesta serbe në veri të Kosovës në maj të po atij viti, ku mbi 90 pjesëtarë të KFOR-it u lënduan, disa rëndë, gjatë përplasjes me protestuesit. Dhuna shpërtheu pas kundërshtimit të serbëve lokalë ndaj hyrjes së kryetarëve shqiptarë të zgjedhur në ndërtesat komunale në Zveçan, Leposaviq dhe Zubin Potok, pas zgjedhjeve lokale që serbët i kishin bojkotuar.

Dhjetëra persona u arrestuan dhe disa u dënuan për këtë rast, ndërsa NATO-ja ka kërkuar që të gjithë përgjegjësit të përballen me drejtësinë.