Autoritetet e Kosovës nderojnë me pjesëmarrje manifestimin “Kurora e Lirisë” në Bernë

Merr pjesë ministri i Ministrisë për Punë, Familje dhe Vlerat e Luftës Çlirimtare të Republikës së Kosovës, Andin Hoti dhe ai i Punëve të Brendshme, Xhelal Sveçla

Manifestimi përkujtimor dhe kulturor “Kurora e Lirisë”, që do të mbahet këtë të shtunë, më 14 mars në Kursaal Arena në Bernë, do të nderohet me praninë e përfaqësuesve të lartë institucionalë nga Republika e Kosovës.

Në këtë ngjarje pritet të marrin pjesë Ministri i Ministrisë për Punë, Familje dhe Vlerat e Luftës Çlirimtare të Republikës së Kosovës, Andin Hoti dhe Ministri i Punëve të Brendshme, Xhelal Sveçla. Ata do të jenë pjesë e këtij manifestimi përkujtimor kushtuar sakrificës së Familjes Jashari dhe të gjithë dëshmorëve të lirisë së Kosovës.

Gjithashtu “Kurora e lirisë” do të nderohet edhe nga përfaqësues të tjerë të jetës politike, si Adnan Azizi, deputet ne parlamentin e Maqedonisë së Veriut, Enver Dugolli nga Parlamenti i Kosovës dhe të tjerë.

Prania e autoriteteve të Kosovës në këtë manifestim përfaqëson një moment të rëndësishëm bashkimi ndërmjet institucioneve dhe mërgatës shqiptare në Zvicër, duke nderuar kujtesën historike dhe sakrificën për liri.

Manifestimi “Kurora e Lirisë” organizohet nga Këshilli i Shoqatave Kulturore Shqiptare në Zvicër, në bashkëpunim me shoqata dhe organizata kulturore shqiptare që veprojnë në Zvicër. Në program do të marrin pjesë ansamble artistike, kore, grupe kulturore dhe artistë nga Zvicra dhe Kosova, duke sjellë një program të pasur përkujtimor dhe artistik.

Në kuadër të manifestimit do të hapet gjithashtu ekspozita fotografike “Prekazi – dashuri, dhimbje dhe krenari kombëtare” e autorit Sefer Aliçkaj, e cila për herë të parë prezantohet për publikun në Zvicër.

Për më shumë informata kontaktoni koordinatoren dhe përgjegjësen e këtij projekti, Mirishahe Limani Hiler në 079 607 46 74.

Albinfo.ch fton të gjithë mërgimtarët që të jenë pjesë e këtij manifestimi i cili nderon jo vetëm ngjarjen por vet mërgatën si pjesë kyqe e Kurores së Lirisë.

 

 

 

---