Muzikë

Ermonela Jaho dhe Saimir Pirgu shkëlqejnë në Operën e Vjenës me “Madama Butterfly”

Interpretimi i dy artistëve shqiptarë në këtë skenë ikonike, një tjetër moment i rëndësishëm i afirmimit të kulturës shqiptare në arenën ndërkombëtare

E hënë, 16 Mars 2026 - 18:30 Luljeta Ademi

Në skenën e Wiener Staatsoper, një prej teatrove më prestigjioze të operës në botë, sopranoja Ermonela Jaho dhe tenori Saimir Pirgu interpretuan rolet kryesore në operën Madama Butterfly të kompozitorit Giacomo Puccini, duke shënuar një nga mbrëmjet më të spikatura të sezonit operistik në kryeqytetin austriak.

Në këtë produksion të regjisorit të ndjerë Anthony Minghella, Jaho interpretoi rolin e Cio-Cio-San me intensitet emocional dhe finesë vokale që e kanë bërë këtë personazh një nga identitetet më të njohura të karrierës së saj ndërkombëtare. Interpretimi i saj u prit me ovacione nga publiku vjenez.

Përkrah saj, në rolin e Pinkertonit, Pirgu solli një interpretim të rafinuar vokalisht dhe të balancuar skenikisht, duke konfirmuar statusin e tij si një nga tenorët më të rëndësishëm të brezit të tij në skenat ndërkombëtare.

Shfaqja u drejtua nga dirigjenti italian Marco Armiliato, ndërsa seria e shfaqjeve të Madama Butterfly në Wiener Staatsoper zhvillohet nga 7 deri më 17 mars 2026.

Interpretimi i dy artistëve shqiptarë në këtë skenë ikonike përfaqëson një tjetër moment të rëndësishëm të afirmimit të kulturës shqiptare në arenën ndërkombëtare të operës.