“Festa e Byrekut” bashkon qindra shqiptarë në Çikago për të tretin vit radhazi

Festivali veror i komunitetit shqiptar në Illinois shënoi një tjetër organizim të suksesshëm, duke mbledhur bashkatdhetarë nga e gjithë zona e Midwest-it.

Qindra shqiptarë u mblodhën në Çikago, Illinois, në kuadër të edicionit të tretë të “Festës së Byrekut”, një nga aktivitetet më të mëdha verore të komunitetit shqiptar në rajonin e Midwest-it në Shtetet e Bashkuara, transmeton albinfo.ch.

Ky festival, i cili tashmë është shndërruar në një traditë të përvitshme, solli së bashku familje, të rinj dhe përfaqësues të komunitetit shqiptar për të festuar kulturën, traditat dhe gastronominë shqiptare.

Në këtë aktivitet mori pjesë edhe Drilon Zogaj, i cili përcolli urimet në emër të Consulate of the Republic of Kosovo in Iowa për organizatorët dhe pjesëmarrësit e festivalit.

Ai shprehu mirënjohje për Albanian Community of Illinois dhe për të gjithë kontribuuesit që ndihmuan në realizimin e këtij eventi të rëndësishëm për komunitetin shqiptar në Shtetet e Bashkuara.

“Festa e Byrekut” vazhdon të shërbejë si një pikë takimi për shqiptarët në diasporë, duke promovuar traditat, kulturën dhe lidhjet mes bashkatdhetarëve përtej oqeanit./Albinfo.ch

---