Rina Januzi triumfon në Finlandë, fiton trofeun e festivalit prestigjioz “Can U Louhela Jam 2026”

Artistja shqiptare nga Kosova vazhdon të korrë suksese në skenën ndërkombëtare, duke u shpallur fituese në një nga festivalet më të njohura muzikore në Vantaa të Finlandës.

Artistja shqiptare nga Kosova, Rina Januzi, ka shënuar një tjetër sukses të rëndësishëm në karrierën e saj artistike, duke fituar trofeun e konkursit “Can U Louhela Jam 2026”, pjesë e festivalit prestigjioz muzikor Louhela Jam që mbahet në qytetin Vantaa të Finlandës, shkruan albinfo.ch.

Lajmin e gëzueshëm e ka ndarë vetë artistja përmes një postimi emocionues në rrjetet sociale, ku ka falënderuar publikun për mbështetjen e vazhdueshme që i ka dhënë ndër vite.

“Ky trofe është rezultat i mbështetjes, dashurisë dhe besimit që kam marrë nga publiku im. Çdo përkrahje që më keni dhënë në muzikën dhe performancat e mia ka një vlerë të jashtëzakonshme për zemrën dhe shpirtin tim”, ka shkruar Januzi.

Ajo ka shprehur gjithashtu mirënjohjen e saj ndaj organizatorëve të festivalit Louhela Jam, duke theksuar se pjesëmarrja në këtë ngjarje artistike ka qenë një ëndërr e kahershme e saj.

Sipas artistes, festivali i ka ofruar mundësinë të prezantojë muzikën, historinë dhe identitetin e saj artistik para një publiku të gjerë në Finlandë, në një skenë që dikur e kishte imagjinuar vetëm në ëndrra, shkruan tutje albinfo.ch.

“Ky ishte një nga koncertet më të bukura që kam përjetuar ndonjëherë dhe një kujtim që do ta mbaj përgjithmonë në zemër”, është shprehur ajo.

Një falënderim të veçantë Rina Januzi ia ka kushtuar edhe violinistes finlandeze Krista Pulkkinen, me të cilën performoi në festival përmes një dueti piano-violinë. Artistja shqiptare vlerësoi bashkëpunimin e tyre artistik dhe suksesin e përbashkët të arritur në këtë edicion të festivalit.

Fitorja në “Can U Louhela Jam 2026” përfaqëson një tjetër dëshmi të talentit dhe përkushtimit të Rinës, e cila prej vitesh po ndërton me sukses rrugëtimin e saj artistik në Finlandë, duke promovuar njëkohësisht kulturën dhe artin shqiptar në arenën ndërkombëtare.

Artistja ka bërë të ditur se në ditët në vijim do të publikojë materiale të tjera nga festivali Louhela Jam 2026, duke ndarë me ndjekësit momente të veçanta nga kjo përvojë e paharrueshme. /Albinfo.ch

---