20 mijë vrapues në Zürich Marathon 2026: Pjesëmarrësit shqiptarë, me rezultate të shkëlqyera

Në gjysmëmaratonë morën pjesë Aferdita Gashi, Mirela Xherri dhe politikani i njohur, Përparim Avdili

Në vend të zhurmës së zakonshme të trafikut, mëngjesi i sotëm në Cyrih u hap me ritmin e hapave dhe frymëmarrjes së mijëra vrapuesve. Rrugët kryesore të qytetit u kthyen në një pistë të gjallë sportive, ku pjesëmarrës nga e gjithë bota morën startin në edicionin e radhës të Zürich Marathon , një nga ngjarjet më të mëdha pranverore që e vendos qytetin në hartën ndërkombëtare të atletikës. albinfo.ch ishte në vendngjarje.

Aferdita Gashi dhe Mirela Xherri

Starti u dha në orën 08:00 nga Quaibrücke, ndërsa finishi në Sechseläutenplatz, ku gara u mbyll zyrtarisht në orën 13:45. Përgjatë itinerarit që ndjek vijën e liqenit dhe kalon nëpër zona kyçe urbane, qyteti ofroi një skenografi të hapur, ku sporti dhe përditshmëria u ndërthurën natyrshëm.

Sipas të dhënave zyrtare të organizatorëve, në edicionin e vitit 2026 morën pjesë rreth 20 mijë vrapues në të gjitha garat. Prej tyre, rreth 2,000 në maratonën e plotë (42 km), me të gjitha vendet e startit të zëna, ndërsa pjesa tjetër u shpërnda në gjysmëmaratonë (21 km) dhe garën 10 km (Züri City Run). Përmasën e kësaj ngjarje sportive e dëshmon edhe fakti se organizatorët kishin përgatitur afro 19 mijë medalje për ata që arritën finishin.

Përparim Avdili

Gara e këtij viti u zhvillua në kushte jo tërësisht të favorshme. Moti i paqëndrueshëm, me reshje të herëpashershme shiu dhe erë, krijoi një sfidë shtesë për pjesëmarrësit, duke kërkuar jo vetëm përgatitje fizike, por edhe qëndrueshmëri mendore.

Aferdita Gashi

Në këtë sfidë ndërkombëtare nuk mungoi as prania shqiptare. Në gjysmëmaratonë morën pjesë Aferdita Gashi, maratoniste me përvojë dhe e njohur për ngjitjet malore në Zvicër, si dhe Mirela Xherri, e apasionuar pas alpinizmit dhe vrapit, e cila kishte ardhur posaçërisht nga Tirana për këtë garë. Të dyja regjistruan rezultate të shkëlqyera në kategoritë e tyre, duke konfirmuar formën dhe përkushtimin e tyre.

Në mesin e pjesëmarrësve ishte edhe politikani shqiptar në Zvicër, Përparim Avdili, çka dëshmon për një prani gjithnjë e më të gjerë të figurave publike në aktivitete që lidhen me stilin aktiv të jetës dhe përfshirjen qytetare.

Zurich Marathon i këtij viti nuk ishte vetëm një garë kilometrash. Në një ditë me shi dhe erë, ai u kthye në një provë të heshtur të kufijve personalë – aty ku ritmi i qytetit matet me ritmin e frymëmarrjes së atyre që vendosin të mos ndalen.

Më shumë informacione rreth maratonës në faqen zyrtare: Zürich Marathon | Home

 

---