Distria e para e Evropës për herë të katërt

Xhudistja nga Kosova, Distria Krasniqi ka fituar për herë të katërt titullin e kampiones së Evropës, në Tbilisi të Gjeorgjisë.

Në finale të kategorisë deri 52 kilogramë, Distria e mposhti francezen Amandine Buchard dhe me këtë fitore, Kosova për vitin e 14-të rresht fiton medalje në kampionate kontinentale.

Prej 26 medaljeve, dhjetë janë të arta.

Ditën e sotme, Distria e nisi me fitore ndaj çekes, Tereza Bodnarova, teksa në luftën e dytë, përkatësisht në çerekfinale, e kontrolloi luftën taktike ndaj polakes Aleksandra Kaleta.

Në gjysmëfinale e mposhti italianen, Odette Giuffrida, me të cilën u përball për herë të 13-të në karrierë.

Distria Krasniqi tani i ka nëntë fitore e katër humbje ndërsa ka fituar gjashtë luftërat e fundit.

Ndryshe, nesër garojnë Laura Fazliu, Akil Gjakova dhe Dardan Cena.