Ambasada Shqiptare: Përfaqësim i denjë nga Zvicra në Samitin e Diasporës

"Diaspora shqiptare në Zvicër ishte denjësisht e përfaqësuar, falë edhe angazhimit të vazhdueshëm të Ambasadës në Bernë"

Në një postim të publikuar në fb nga Ambasada e Shqipërisë në Zvicër bëhet fjalë për pjesëmarrjen e mërgatës shqiptare nga Zvicra në Samitin e Diasporës që u mbajt gjatë tri ditëve të fundit, në Tiranë.

“Samiti i IV i Diasporës Shqiptare, i zhvilluar në Tiranë përgjatë datave 13–15 prill 2026, mblodhi shqiptarë nga të gjitha anët e globit, në një platformë të përbashkët dialogu, bashkëpunimi dhe vizioni për të ardhmen.

Diaspora shqiptare në Zvicër ishte denjësisht e përfaqësuar, falë edhe angazhimit të vazhdueshëm të Ambasadës në Bernë, duke sjellë në këtë samit një numër të konsiderueshëm pjesëmarrësish dhe kontributorësh aktivë në panele dhe diskutime”, thuhet në postim.

Në vazhdim përmenden kontributet e disporës nga Zvicra në panelet e mbjtura gjatë samitit.

Në panele të ndryshme u evidentuan kontribute të vyera nga përfaqësues të komunitetit shqiptar në Zvicër:
Në transformimin e shërbimeve ndaj klientit, znj. Eniada Halebi solli perspektivën e inovacionit dhe digjitalizimit;

Në fushën e turizmit, znj. Aina Hoti ndau eksperiencën dhe vizionin e saj për zhvillimin e sektorit;
Në panelin mbi trashëgiminë shpirtërore, Hafiz Mehas Alija theksoi rolin e komunitetit në ruajtjen e vlerave;

Në diskutimet mbi identitetin kombëtar dhe qendrat kulturore, Kristian Zefi prezantoi idenë për krijimin e një muzeu kombëtar në diasporë, ndërsa Argjenda Lipovica solli një qasje shkencore për ngritjen e një qendre kulturore shqiptare në Zvicër;

Ndërkohë, Dritan Andrea kontribuoi në diskutimet mbi migracionin dhe politikat e riatdhesimit.

Një moment i veçantë krenarie ishte vlerësimi me medaljen “Shqiponja e Artë” për Prof. Dr. Vaxhid Sejdiun, në shenjë mirënjohjeje për kontributin e tij mbi 30-vjeçar në mësimin dhe përhapjen e gjuhës shqipe në Zvicër.
Në këtë samit nuk munguan as përfaqësuesit e mediave dhe jetës shoqërore nga Zvicra, përfshirë drejtues mediash dhe organizatash, të cilët luajnë një rol të rëndësishëm në forcimin e lidhjeve mes diasporës dhe atdheut.

Ambasada shpreh angazhimin e vazhdueshem institucional për të mbështetur dhe fuqizuar rolin e diasporës shqiptare në Zvicër.
Ky samit rikonfirmoi edhe një herë se diaspora shqiptare mbetet një aset i çmuar kombëtar, një urë lidhëse mes Shqipërisë dhe botës, me potencial të jashtëzakonshëm për zhvillim, bashkëpunim dhe promovim të vlerave tona”, përfundon postimi i Ambasadës së Shqipërisë në Zvicër.

---