Shoqata Kulturore “Sharri” nderon figurën e Rexhep Rifatit, një jetë në shërbim të gazetarisë dhe identitetit shqiptar në diasporë

Veprimtaria shumëvjeçare e gazetarit të njohur shqiptar Rexhep Rifati u vendos në qendër të një aktiviteti me peshë të veçantë kulturore dhe simbolike, të organizuar nga Shoqata Kulturore “Sharri” në Waldkirch. albinfo.ch përcolli nga afër këtë ngjarje, e cila u shndërrua në një reflektim mbi rolin e gazetarisë në ruajtjen e identitetit shqiptar në diasporë.

Aktiviteti “Një pasdite me Bacën Rexhep Rifati” mblodhi përfaqësues institucionalë, artistë dhe bashkatdhetarë të shumtë, duke dëshmuar për ndikimin e gjerë që ka pasur puna e tij ndër vite në jetën kulturore dhe shoqërore të komunitetit shqiptar jashtë atdheut.

 

Gazetari veteran, shumë aktiv edhe në moshë të shtyrë në diasporë, Rexhep Rifati, ka marrë së fundi një mirënjohje të rëndësishme për punën e tij shumëvjeçare në gazetari. Ai është dekoruar nga Presidentja e Kosovës, Vjosa Osmani, në shenjë vlerësimi për kontributin e tij të gjatë dhe të qëndrueshëm në gazetarinë e diasporës.

Në mesin e të pranishmëve ishte edhe Ambasadori i Republikës së Maqedonisë së Veriut në Bernë, Rexhep Demiri, i cili theksoi: “Rexhep Rifati ka mbajtur gjallë fjalën dhe kulturën shqiptare në mërgatë, duke lidhur brezat dhe duke ruajtur identitetin tonë. Vlerësimet e larta që ai ka marrë, përfshirë dekorimin nga Presidentja e Republikës së Kosovës, znj. Vjosa Osmani, janë dëshmi jo vetëm e kontributit të tij profesional, por edhe e integritetit të tij njerëzor.”

Programi artistik i aktivitetit solli një ndërthurje të elementeve tradicionale dhe bashkëkohore, me performanca nga grupe dhe ansamble që pasqyruan gjallërinë e trashëgimisë kulturore shqiptare, përfshirë edhe dimensionin arbëresh.

Në fjalën e tij, Konsulli i Republikës së Kosovës në Cyrih, Vigan Berisha, e cilësoi Rifatin si një figurë që mishëron gazetarinë me mision dhe përgjegjësi njerëzore: “Figura e tij përfaqëson përkushtim të palëkundur ndaj fjalës së lirë dhe informimit të drejtë. Por mbi të gjitha, z. Rifati është një njeri i dimensionit të lartë njerëzor – një zë që gjithmonë ka ditur të jetë pranë njerëzve, të dëgjojë hallet e tyre dhe t’i pasqyrojë me ndjeshmëri e dinjitet.”

“Ky vlerësim nuk më takon vetëm mua. Ai u përket të gjitha shoqatave kulturore dhe grupeve artistike që kanë mbajtur gjallë identitetin tonë. Unë vetëm kam pasqyruar punën dhe përkushtimin tuaj.”

Ai theksoi se rrugëtimi i tij është ushqyer nga komunitetet shqiptare në diasporë, përfshirë edhe botën arbëreshe, si pjesë e pandashme e kujtesës dhe identitetit shqiptar.

Veprimtaria e tij është vlerësuar edhe ndërkombëtarisht. Ai është shpallur “Qytetar Nderi” i Horës së Arbëreshëve në Itali, një titull që njeh kontributin e tij në dokumentimin dhe promovimin e historisë dhe identitetit të shqiptarëve jashtë atdheut.

Rexhep Rifati i përket një brezi gazetarësh që profesionin e kanë ushtruar si mision në shërbim të komunitetit dhe vlerave shoqërore, me një përkushtim të veçantë ndaj trashëgimisë së arbëreshëve. Përmes veprave të tij “Arbëreshët – fotosintezë e shpirtit tim” dhe “Shqiptarët në Zvicër – 1001 pamje”, ai ka dokumentuar me përkushtim historinë, identitetin dhe jetën e shqiptarëve në diasporë, duke ndërtuar një arkiv të vyer kulturor e shoqëror. Krahas kësaj veprimtarie, ai është angazhuar edhe në mbështetjen e të rinjve përmes bursave për shkollimin e studentëve, duke e shtrirë kontributin e tij përtej gazetarisë, në formimin dhe fuqizimin e brezave të rinj.

Në përmbyllje të aktivitetit, për të pranishmit u shtrua një darkë ku u shërbyen gatime tradicionale shqiptare.

Kush është Rexhp Rifat

Rexhep Rifati u lind më 28 maj 1942 në fshatin Komogllavë, Ferizaj, Kosovë. Aktualisht jeton në Cyrih, Zvicër. Mësimet e para i mori në fshatin e lindjes. Në vitin 1966 përfundoi Shkollën Normale në Ferizaj. Diplomoi në Gjuhë dhe Letërsi Shqipe, Fakulteti Filozofik, Universiteti i Prishtinës, viti1973. Karriera Profesionale gjatë viteve 1965–1995, puno gazetar në të përditshmen Rilindja. Migroi në Zvicër ku i njihet statusi i të strehuarit politik.

Në Zvicër ushtroi gazetarinë, ishte redaktor në gazeta periodike dhe portale elektronike; aktualisht në prointegra.ch.

Aktiviteti Kulturor dhe Humanitar; Themelues dhe kryetar i parë i Ansamblit të Këngëve dhe Valleve të Kastriotit. Themelues dhe donator i përhershëm i Fondit të Bursave të Solidaritetit.

Për më shumë se 10 vjet, bashkë me familjen ka ndarë 6 bursa studentore çdo muaj. Të ardhurat nga shitja e librave i dedikohen fondit studentor.

Aktiviteti Shkencor: Gazetari udhëpërshkruese; ka vizituar të gjitha trojet shqiptare dhe 52 ngulimet arbëreshe.

Nderuar me titullin ‚Apostull i kohëve moderne‘ nga At Antonio Bellusci.

Anëtar nderi i Qendrës Albanologjike për Studime mbi Gjuhën dhe Kulturën Arbëreshe.

Mirënjohje „Për kontributin e dhënë në Mërgatë përmes shkrimeve” nga tri Ambasada në

Zvicër: Ambasada e Shqipërisë, Ambasada e Kosovës, Ambasada e Maqedonisë Veriore

– Medaljonin “Dielli Dardan” nga LKSHM- Lidhja e Krijuesve Shqiptar të Mërgatës. Dekoruar nga Presidentja e Kosovës. Qytetar Nderi i Horës Arbëreshe Piano Degli

Botime:

– 2013: Shqiptarët në Zvicër – 1001 pamje

– 2018: Shtegtimet e një gazetari (shqip, anglisht, gjermanisht)

– 2019: Një jetë në shërbim të lirisë dhe të zhvillimit

– 2022: Arbëreshët: fotosintezë e shpirtit tim (shqip dhe italisht.

Jeton në Cyrih, Zvicër. Ka 6 fëmijë dhe 12 nipa e mbesa.

 

 

---