Festivali i Filmit Shqiptar “Fly Like an Eagle” mbahet në Berlin nga 7 deri më 13 maj 2026

Në kinemanë historike Babylon do të shfaqet një përzgjedhje e veçantë filmash që pasqyrojnë zhvillimin e kinematografisë shqiptare ndër vite.

Festivali i Filmit Shqiptar “Fly Like an Eagle” do të mbahet në Berlin nga data 7 deri më 13 maj 2026, në ambientet e kinemasë prestigjoze dhe historike Kino Babylon, e vendosur në Rosa-Luxemburg-Straße 30, 10178 Berlin, transmeton albinfo.ch.

Hapja zyrtare e festivalit do të zhvillohet më 7 maj, duke filluar nga ora 19:30, ku do të shfaqet filmi “Vdekja e Kalit”.

I ftuar special i natës së hapjes do të jetë aktori i njohur Timo Flloko, një ndër figurat më të rëndësishme të kinemasë shqiptare. Pas shfaqjes së filmit, do të organizohet edhe një bisedë e hapur me publikun, ku Flloko do të ndajë përvojën e tij artistike, ndërsa diskutimi do të moderohet nga regjisorja Odeta Çunaj.

Biletat për natën e hapjes janë të disponueshme online, ndërsa informacione të tjera rreth festivalit mund të gjenden në faqen zyrtare të Kino Babylon.

Organizatorët bëjnë të ditur se programi i plotë i festivalit do të publikohet së shpejti, ndërsa kurator i programit është Elson Zguri.

Ky festival synon të sjellë një përzgjedhje filmash që reflektojnë historinë e pasur dhe evolucionin e kinematografisë shqiptare, duke krijuar një dialog të rëndësishëm mes trashëgimisë filmike dhe krijimtarisë bashkëkohore.

Festivali realizohet me mbështetjen e Ambasadës së Shqipërisë në Berlin, Ministrisë së Turizmit, Kulturës dhe Sportit të Shqipërisë, Qendrës Kombëtare të Kinematografisë dhe Arkivit Qendror Shtetëror të Filmit.

Organizatorët ftojnë publikun që të bëhet pjesë e kësaj përvoje të veçantë kulturore dhe artistike në zemër të Berlinit./Albinfo.ch

---