Mikroplastikat kontribuojnë në ngrohjen globale, jo e kundërta

Foto ilustrim @unsplash

Një ekip kërkimor amerikan ka arritur në përfundimin se mikroplastikat në atmosferë nuk e zbusin ngrohjen globale, por përkundrazi kontribuojnë në të. Studiuesit analizuan vetitë optike të grimcave plastike – të ngjashme me ato që shpërndahen në ajër – duke u bazuar në përbërjen, madhësinë dhe ngjyrën e tyre.

Sipas studimit të realizuar nga shkencëtarët e Universitetit Fudan në Shangai, mikroplastikat kontribuojnë në mënyrë globale në të ashtuquajturin “forcim rrezatues” (radiative forcing) – diferenca midis energjisë diellore që Toka merr dhe asaj që reflekton përsëri në hapësirë – me rreth 0.039 W/m².

Megjithëse kjo përbën vetëm një pjesë të vogël të forcimit total të shkaktuar nga aktiviteti njerëzor (i vlerësuar në 2.72 W/m² për vitin 2019 sipas raportit të fundit të IPCC), ndikimi i mikro- dhe nanoplastikave në atmosferë konsiderohet i rëndësishëm. Ky faktor pritet të merret parasysh në modelet klimatike, edhe pse ende ekziston pasiguri për sasinë reale të këtyre grimcave në shtresat e ndryshme të atmosferës.

Grimcat e errëta kanë ndikimin më të madh

Sipas studiuesve, efekti më i fortë ngrohës vërehet tek grimcat më të vogla dhe më të errëta, të cilat janë edhe më të përhapurat në atmosferë.

“Vetëm grimcat e çelëta, si ato të bardhat, reflektojnë dritën dhe e kthejnë atë në hapësirë duke krijuar efekt ftohës. Ndërsa grimcat e errëta thithin dritën dhe shkaktojnë ngrohje,” shpjegon klimatologu Drew Shindell, profesor në Universitetin Duke dhe bashkautor i studimit.

Për matjet, shkencëtarët përdorën mostra plastike të mbledhura nga tregjet lokale, të cilat i grimcuan dhe i plakën në mënyrë artificiale për të studiuar ndryshimin e vetive të tyre në thithjen e dritës.

“Këto janë rezultate të rëndësishme,” thekson Shindell, duke pranuar se ekziston ende pasiguri: “Tashmë kemi një kuptim të mirë të sjelljes optike të këtyre grimcave ndaj rrezatimit. Por dimë më pak për sasinë reale të tyre në atmosferë. Nevojiten më shumë të dhëna.”