Pse shumë amerikanë në Zvicër po heqin dorë nga pasaporta amerikane

Sipas vlerësimeve, më shumë se 30 mijë amerikanë kanë hequr dorë nga shtetësia amerikane në dekadën e fundit në nivel global

Numri i amerikanëve që jetojnë në Zvicër dhe po heqin dorë nga shtetësia amerikane po vazhdon të rritet, por këtë herë arsyet nuk lidhen vetëm me taksat dhe rregullat financiare.

Sipas raportimeve të fundit, gjithnjë e më shumë shtetas amerikanë në Zvicër po marrin këtë vendim për shkak të klimës politike në SHBA dhe rikthimit të Donald Trump në skenën politike.

Fenomeni nuk është i ri. Amerikanët që jetojnë jashtë vendit, përfshirë në Zvicër, prej vitesh ankohen për barrën e rëndë administrative dhe fiskale që SHBA u imponon qytetarëve të saj, edhe kur jetojnë jashtë territorit amerikan, shkruan The Local, transmeton albinfo.ch.

Një nga problemet kryesore mbetet sistemi amerikan i taksimit mbi bazën e shtetësisë, që detyron qytetarët amerikanë të deklarojnë dhe në disa raste të paguajnë taksa në SHBA edhe nëse jetojnë përgjithmonë jashtë vendit. Kjo ka krijuar vështirësi të mëdha edhe me bankat zvicerane, të cilat shpesh shmangin klientët amerikanë për shkak të rregullave të komplikuara të FATCA.

Sipas mediave zvicerane, ambasada amerikane në Bern po përballet me rritje të kërkesave për heqje dorë nga shtetësia, ndërsa terminet për këtë procedurë janë shtuar ndjeshëm.

Një faktor tjetër që ka nxitur interesimin është edhe ulja drastike e tarifës për heqjen dorë nga shtetësia amerikane. SHBA ka reduktuar së fundmi tarifën prej 2,350 dollarësh me rreth 80%, duke e bërë procesin shumë më të përballueshëm për qytetarët jashtë vendit.

Sipas vlerësimeve, më shumë se 30 mijë amerikanë kanë hequr dorë nga shtetësia amerikane në dekadën e fundit në nivel global.

---