Sveçla: Qindra aplikime nga serbët për shtetësi të Kosovës

MPB e Kosovës po verifikon kërkesat; ndryshime edhe në regjistrimin e dokumenteve civile

Ministri i Brendshëm në detyrë, Xhelal Sveçla, ka bërë të ditur se qindra shtetas të Serbisë që jetojnë apo punojnë në Kosovë kanë aplikuar për marrjen e nënshtetësisë kosovare, përcjell albinfo.ch.

Në një konferencë për media, Sveçla theksoi se të gjitha aplikimet po trajtohen dhe verifikohen individualisht nga institucionet përkatëse.

“Ka pasur me qindra aplikime të shtetasve të Serbisë të cilët jetojnë apo punojnë përkohësisht në Republikën e Kosovës. Të gjitha janë duke u verifikuar individualisht”, deklaroi ai, duke shtuar se procedurat do të vazhdojnë sipas plotësimit të kushteve ligjore.

Ndërkohë, Ministria e Punëve të Brendshme kishte konfirmuar më herët nisjen e procesit të regjistrimit të fakteve civile të lëshuara nga regjistrat paralelë të Serbisë, përfshirë lindjet, vdekjet dhe martesat.

Sipas kornizës ligjore në Kosovë, certifikatat e lindjes dhe martesës janë dokumente të domosdoshme për procesin e natyralizimit dhe marrjen e shtetësisë, duke e bërë këtë regjistrim një hap të rëndësishëm për banorët serbë që jetojnë në Kosovë por nuk janë ende shtetas.

Këto lehtësime janë mbështetur nga Bashkimi Evropian, Gjermania dhe Franca, ndërsa janë kritikuar nga opozita në Kosovë, e cila i konsideron si njohje të dokumenteve të lëshuara nga Serbia.

Në të njëjtën kohë, Qeveria është zotuar se do të mundësojë edhe dhënien e lejeve të qëndrimit për 12 muaj për punëtorët e institucioneve shëndetësore dhe arsimore që financohen nga Serbia në Kosovë./Albinfo.ch

---