Stuhia që përfshiu rajonin, dy të vdekur në Shqipëri dhe dëme të mëdha

Moti i keq ka shkaktuar pasoja të rënda në Shqipëri dhe në vendet përreth, duke lënë pas dy viktima dhe dëme të konsiderueshme materiale.

Një punonjës i Operatorit të Shpërndarjes së Energjisë Elektrike humbi jetën në Himarë, pasi ra nga një shtyllë elektrike gjatë punës për riparimin e defekteve të shkaktuara nga stuhia. Ndërkohë, në Ksamil u gjet trupi i pajetë i një peshkatari 61-vjeçar. Dyshohet se ai është mbytur në det pasi kishte dalë për peshkim, ndërsa autoritetet po vijojnë hetimet për zbardhjen e plotë të rastit.

Stuhia me reshje të dendura dhe erëra të fuqishme ka shkaktuar dëme në disa zona të Shqipërisë, veçanërisht në Vlorë, Fier, Sarandë dhe Librazhd.

Në Sarandë, tre persona u lënduan si pasojë e motit të keq dhe morën trajtim mjekësor në spital. Ndërkohë, në Himarë, Policia Kufitare shpëtoi pesë persona të një familjeje, përfshirë tre fëmijë, pasi mjeti i tyre lundrues pësoi defekt në det për shkak të stuhisë. Ngjarja ndodhi pranë plazhit të Jalës.

Pasojat e motit të keq u ndjenë edhe në Kosovë, ku disa zona pësuan dëme të mëdha në infrastrukturë, rrjetin elektrik dhe bujqësi. Istogu, Suhareka dhe Lipjani u renditën ndër zonat më të prekura. Autoritetet kanë paralajmëruar mundësinë e një vale të re stuhish dhe kanë kërkuar nga qytetarët të tregojnë kujdes.

Stuhia goditi gjithashtu disa pjesë të Bosnjë-Hercegovinës dhe Kroacisë. Meteorologët kanë ngritur nivelin e alarmit edhe për disa rajone të Bullgarisë, Rumanisë, Greqisë dhe Turqisë, ku priten reshje të fuqishme, breshër i madh dhe erëra të forta gjatë orëve në vijim.