Rrahje masive në mes të refugjatëve nga Shqipëria dhe Afganistani

Në një rrahje masive që ka ndodhur mbrëmjen e të martës në një shtëpi azili në Hamburg janë përfshirë rreth 60 veta, shqiptarë dhe afganistanas. Pesë veta kanë pësuar lëndime nga kjo rrahje masive, njëri prej të cilëve është therur me thikë në krah dhe është dashur të dërgohet në spital për trajtim, shkruan spiegel.de.

Disa nga refugjatët, banorë të kësaj qendre azili kanë qenë të armatosur me shkopinj metalikë. Policia është dashur të ndërhyjë me mobilizim të madh për të shuar konfliktin, transmeton albinfo.ch.

Tre veta janë arrestuar, njofton policia ndërsa ajo nuk e ka konfirmuar lajmin që është dëgjuar se njëri nga pjesëmarrësit në rrahje ka pasur me vete armë zjarri.

Vetëm pak pasi që policët i dhanë fund rrahjes, në areal ka ndodhur djegia e një tende. Mbetet e paqartë nëse ky zjarr ka pasur ndonjë lidhje me zënkën ose jo.

Rrahjes masive të mbrëmjes së të martës duket se i ka paraprirë një sherr që kishte shpërthyer më herët pasdite, ka thënë për mediet një zëdhënës policie. Edhe në këtë rast kishte ndërhyrë policia.

Cilat janë arsyet e shpërthimit të këtyre dy konflikteve mbetet e paqartë. Në mbrëmjen e vonshme gjendja është qetësuar por policia vazhdon të mbetet në endin e ngjarjes.

Ditëve dhe javëve të fundit është shënuar një shtim i konflikteve që po ndodhin në kampet e azilkërkuesve në Gjermani. Fluksi i madh i refugjatëve që kanë ardhur në këtë vend ka sjellë autoritetet përgjegjëse në pozitë të vështirë, duke u detyruar që në mungesë vendi, t`i strehojë ata në kampe të mbipopulluara, shpesh edhe në “qytete tendash” të improvizuara