Mërgim Mavraj, në “qiellin e shtatë” pas kualifikimit të Shqipërisë

Për herë të parë në histori Shqipëria kualifikohet për në kampionatin evropian

Për këtë arritje të kombëtares për mediat gjermane mbrojtësi i kombëtares, Mërgim Mavraj (29-vjeçar), është në qiellin e shtatë.

Edhe pse ai është i lënduar dhe ka bërë një operim në gju dhe nuk arriti të luajë në dy ndeshjet e fundit me Shqipërinë kundër Serbisë (0-2) dhe fitores ndaj Armenisë (3-0), ai është munduar të mbështesë ekipin e tij.

“Jam shumë i lumtur që e përjetova këtë ditë. Është e vështirë për ta realizuar atë që kemi bërë ne me Shqipërinë”, thotë mbrojtësi i kombëtares shqiptare që luan për FC Koln të Gjermanisë. “Për shtetin tonë, i cili ka qenë gjithmonë i shtypur, kjo është një arritje e madhe dhe u jep njerëzve pafundësisht një shpresë. Për Gjermaninë kjo është normale, ata kualifikohen. Por, për ne kjo ka një domethënie të pazëvendësueshme”, thotë Mavraj për gazetën “Bild”, transmeton albinfo.ch.

Mavraj është duke punuar intensivisht për t’u rikthyer në fushën e gjelbër: “Natyrisht që është ëndrra ime më e madhe që si lojtar të jem pjesë e kampionatit evropian. Jam duke punuar me kujdes për t’u rikthyer. Unë kam parë se sa shpejt mund të rikthehet një i lënduar”, ka thënë ai.

Albinfo.ch