Markaj, gjithmonë i gatshëm për Kosovën

Një emër i ri për Përfaqësuesen e Kosovës në ndeshjen miqësore ndaj Guinesë Ekuatoriale ishte Denis Markaj. Por, ai nuk është i panjohur në Zvicër. Futbollisti i Luganos tregon për albinfo.ch për karrierën e tij dhe synimet në të ardhmen.

“Unë jam rritur dhe shkolluar në Zvicër ,pasi që prindrit e mi janë në Zvicër prej vitit 1985. Fillova të ushtroj qysh në moshën 5-vjeçare në FC Baden, ish-anëtar i Ligës së 2 zviceriane, ku lujta në të gjitha grupmoshat, duke perfshirë edhe U14, U15, U16, dhe pastaj një gjysmësezon në B juniorët . Në janar të vitit 2007 kalova në ekipin e parë  si sulmues, ku shënova disa gola dhe morëm pjesë në kualifikime per t’u inkuadruar  një rang më lart, por pa sukses. Unë vazhdova në Baden, por trajneri më aktivizoi në mbrojtje në krahun e majtë, ku lujta mbi 130 ndeshje dhe shënova mbi 25 gola”, deklaroi Markaj, duke vazhduar:

“Në fund të vitit 2011 trajneri i mirënjohur në Zvicër, Raimonden Ponte më angazhoi në Chiasso dhe në mars të vitit 2012 kalova në AC Bellinzona, por pas një kohe shumë të shkurt ekipi ra në konkurs. Unë kalova në FC Lugano ku luaj që tre vjet e gjysmë. Është viti i parë në Superligë”, theksoi më tej 24-vjeçari. Tashmë Denis Markaj ka debutuar me Kosovën dhe thotë se do të japë ndihmën e tij sa herë të kërkohet.

“Unë vendosa të luaj për Kosovën pas bisedave që kishin prindërit e mi me përzgjedhësin e Kosovës. Kur kam qenë në Kosovë kam qenë shumë i befasuar nga organizimi, pritja, shoqëria e të gjitha. Jam i bindur se Kosova do të luajë në kualifikimet për Kampionatin Botëror për Rusi dhe unë jam i gatshëm gjithmonë të luaj për atdheun tim”, përfundoi Denis Markaj.