A do të përjetojë Europa dimra më të ftohtë së shpejti?

(KEYSTONE/Alessandro della Valle)

Një nga shtyllat kryesore të klimës globale mund të shembet, duke sjellë pasoja të mëdha për klimën europiane, paralajmëron një studim i fundit.

Një qarkullim i madh oqeanik në Atlantik, i njohur si AMOC (Qarkullimi Meridional i Përmbysjes së Atlantikut), i cili luan rol kyç në rregullimin e klimës globale, mund të dobësohet deri në gjysmën e fuqisë së tij deri në vitin 2100. Nëse ky proces përshpejtohet më tej, pasojat mund të jenë të rënda: dimra më të ftohtë në Europën Veriore dhe thatësira në rajonin e Sahelit.

Për ta kuptuar më mirë, imagjinoni një sistem të madh rrymash oqeanike, përfshirë edhe Rrymën e Gjirit, që transporton ujëra të ngrohta tropikale drejt veriut, si një rrip transportues. Kur këto ujëra arrijnë në veri, ato ftohen, zhyten në thellësi të mëdha dhe më pas rikthehen drejt jugut.

Ky mekanizëm, që shpërndan dhe rishpërndan nxehtësinë në shkallë planetare, përbën AMOC-in. Fuqia e tij është kolosale: rrjedha e tij është rreth dhjetë herë më e madhe se ajo e të gjithë lumenjve të botës së bashku.

Sipas një studimi të publikuar në revistën shkencore Science Advances nga studiues të Universitetit të Bordosë dhe Qendrës Kombëtare për Kërkime Shkencore (CNRS), AMOC mund të ngadalësohet deri në 51% deri në fund të shekullit, në një skenar mesatar të emetimeve të gazrave serrë.

“Po i afrohemi një gjendjeje kritike, gjë që është shqetësuese”, thotë klimatologu Valentin Portmann, autor kryesor i studimit.

Deri më tani, modelet klimatike parashikonin një rënie mesatare prej 32%. Sipas studiuesve, vlerësimet e reja tregojnë një dobësim më të madh se sa pritej.

Ndryshimet klimatike, që po ngrohin sipërfaqen e oqeaneve, po e bëjnë më të vështirë përzierjen e shtresave të ujit, duke çuar kështu në dobësimin e AMOC-it.