Akil Gjakova ndalet nga kampioni olimpik Shavdatuashvili në Evropian

Xhudisti kosovar zhvilloi një duel të fortë dhe për një kohë ishte në epërsi, por u mposht në kohën shtesë dhe tani synon medaljen e bronztë.

Akil Gjakova ka zhvilluar një luftë shumë të fortë ndaj legjendës gjeorgjiane të xhudos, kampionit olimpik Lasha Shavdatuashvili, në Kampionatin Evropian të xhudos, përcjell albinfo.ch.

Për një kohë të gjatë në meç, xhudisti kosovar ishte në epërsi dhe kontrolloi zhvillimin e garës, por nuk arriti ta ruajë ritmin deri në fund.

Lodhja nga lufta e mëparshme, e cila ishte veçanërisht e gjatë dhe intensive, duke zgjatur mbi shtatë minuta, ndikoi në performancën e tij në momentet vendimtare të kohës shtesë.

Këtë e shfrytëzoi Shavdatuashvili, i cili arriti të marrë fitoren dhe të sigurojë kalimin në gjysmëfinale të garës.

Megjithatë, Akil Gjakova mbetet në garë për medaljen e bronztë evropiane. Për ta arritur atë, atij i nevojiten edhe dy fitore në fazën përfundimtare të turneut./Albinfo.ch

---