Aksionarët e zemëruar, kryetari i Credit Suisse kërkon falje

(KEYSTONE/Peter Klaunzer)

Kryetari i bankës së dështuar Credit Suisse ka kërkuar falje që e çoi kompaninë në prag të falimentimit, pasi u përball me zemërimin e aksionarëve për rënien e papritur të bankës.

Marrja e aranzhuar me ngut nga UBS me bazë në Cyrih, për të cilën Zvicra thirri legjislacionin e urgjencës, anashkaloi aksionarët e Credit Suisse, të cilët përndryshe do të kishin fjalën e tyre, dhe i zhduku të gjithë, shkruajnë mediat zvicerane, përcjell albinfo.ch.

Aksionarët u takuan dje në Cyrih për mbledhjen e tyre përfundimtare që shënoi fundin e bankës 167-vjeçare. Kryetari i Credit Suisse, Axel Lehmann, u kërkoi falje afro 2000 aksionarëve që ishin në mbledhje, duke thënë se atij i kishte mbetur koha për të kthyer bankën, pavarësisht nga besimi i tij “deri në fillim të javës fatale” se mund të mbijetojë.

Aksionarët dolën në skenë për të shprehur zemërimin e tyre për bashkimin mes dy bankave. Ata gjithashtu kritikuan bordin e drejtorëve dhe menaxhmentin e mëparshëm, duke përfshirë Urs Rohner, i cili ishte kryetar i Credit Suisse për 10 vjetët deri në vitin 2021.