Arrestohen pesë persona që plaçkitën bankën

Autorët e supozuar të cilët plaçkitën një pikë karburantesh në Geuensee dhe një bankë në Sursee, kanë mundur të identifikohen dhe tashmë janë arrestuar

Në fund të muajit maj 2018, autori kryesor i dyshuar sulmoi bankën “Luzerner Kantonalbank” dhe mori një sasi të parave të gatshme. Për fat të mirë, gjatë këtij sulmi askush nuk u lëndua, shkruan “20 Minuten”, përcjell Albinfo.ch.

Policia e Luzernit, autorin ka mundur ta arrestojë në fund të gushtit, pas një informate nga popullata dhe hetimeve intensive. Bëhet fjalë për një person 40-vjeçar nga Italia. Gjatë hetimeve, gjithashtu janë arrestuar edhe katër bashkëpunëtorë të tij të dyshuar nga Kosova (27, 28, 29 dhe 30-vjeçar) me vendbanim në Kantonin e Lucernit.

Hetimi i policisë kishte zbuluar gjithashtu se autorët e krimit janë përgjegjës për një grabitje në një pikë karburantesh të “Avia” në Geuensee. Sulmuesi i dyshuar kryesor, në muajin maj kishte hyrë në pikën e karburanteve dhe kishte kërcënuar me thikë një shitëse, duke plaçkitur para të gatshme. Në të dy rastet, të hollat e plaçkitura nuk kanë mundur të sigurohen më.

Të pesë autorët e dyshuar janë në paraburgim, ka njoftuar të hënën prokurori publik i Lucernit.