Bebe Rexha dhe yje të tjerë do të performojnë live në kinematë e AMC Theatres në gjithë SHBA-në

Rrjeti AMC Theatres nis projektin “Arena One at AMC”, duke sjellë koncerte live në mbi 300 kinema në SHBA me pjesëmarrjen e Bebe Rexha dhe artistëve të tjerë ndërkombëtarë.

Rrjeti i njohur i kinemave AMC Theatres ka njoftuar një partneritet të ri me kompaninë Arena One për të sjellë koncerte live drejtpërdrejt në ekranet e kinemave në të gjithë Shtetet e Bashkuara, transmeton albinfo.ch.

Programi i ri, i quajtur “Arena One at AMC”, pritet të nisë në muajin qershor dhe do të përfshijë performanca nga disa emra të njohur të muzikës ndërkombëtare. Në mesin e artistëve që do të hapin këtë seri koncertesh janë Bebe Rexha më 17 qershor, Paris Hilton më 18 qershor, Kim Petras më 19 qershor dhe Maren Morris më 20 qershor.

Koncertet do të transmetohen drejtpërdrejt në më shumë se 300 kinema të rrjetit AMC në gjithë vendin, ndërsa organizatorët kanë bërë të ditur se emra të tjerë të muzikës do të shpallen në javët në vijim.

Sipas AMC-së, synimi është të krijohet atmosfera e një koncerti të vërtetë në arenë, duke përdorur teknologji interaktive që mundëson transmetimin në kohë reale të reagimeve dhe energjisë së publikut mes sallave të kinemasë dhe artistëve në skenë.

Kjo iniciativë vjen në një kohë kur kinematë po orientohen gjithnjë e më shumë drejt përmbajtjeve alternative për të kompensuar rënien e të ardhurave pas pandemisë dhe reduktimin e numrit të filmave të rinj nga studiot e mëdha.

Më herët, AMC Theatres ka pasur bashkëpunime të suksesshme me Taylor Swift dhe Beyoncé për filmat koncertalë të turneve të tyre, por këtë herë koncertet do të transmetohen drejtpërdrejt.

Çmimet e biletave për programin “Arena One at AMC” do të variojnë nga 40 deri në 75 dollarë, dukshëm më të lira se koncertet tradicionale, ku biletat shpesh kalojnë 140 dollarë.

Ndërkohë, kompania raportoi rritje të të ardhurave gjatë tremujorit të parë të vitit, duke arritur në 1.04 miliardë dollarë, ndërsa numri i vizitorëve globalë u rrit nga 41.9 milionë në 47.6 milionë spektatorë. /Albinfo.ch

---