Bërja biznes në Kosovë nuk është e lehtë

Ministria e Tregtisë dhe Industrisë, ka diskutuar legjislacionin e politikave tregtare, ku ishin të ftuar përfaqësues të ndryshëm të institucioneve vendëse dhe të organizatave të ndryshme.

Takimi i Grupit punues për politika tregtare është vlerësuar një rast i veçantë për t’u informuar nga dora e parë për ndryshimet tejet të rëndësishme në legjislacionin e politikave tregtare.

Ministrja e Tregtisë dhe Industrisë, Mimoza Kusari-Lila, ka thkesuar se qëllim dhe synim i MTI-së dhe qeverisë është funksionalizimi dhe përmirësimi i raportit tregtar në Kosovë, përmirësimi i politikave tregtare dhe mbi të gjitha ngritja e dialogut dhe e debatit me të gjithë ata që janë në vijë të frontit, për të rimarrë të gjitha udhëzimet për përmirësimin e politikave tregtare, raporton Zëri.

“Ashtu siç është bërë publike deri më tani dhe që do të bëhet edhe me tutje, Qeveria e Kosovës në pranverë të këtij viti ka dalë me një plan për zhvillimin ekonomik. Ky plan parasheh një përmirësim të bilancit tregtar, ulje të varfërisë, si dhe ngritje të punësimit”, ka deklaruar ministrja e MTIsë, Kusari-Lila.

Sipas saj të bërit biznes në Kosovë nuk është i lehtë. Për këtë ajo ka thënë që ka mangësi edhe në legjislacion.

Ajo po ashtu iu referua edhe Raportit të progresit, i cili sapo është publikuar para tri ditësh dhe i cili ka shënuar një mungesë të lëvizjes, pasi që nuk janë bërë hapat e duhur në kuadër të anëtarësimit në Organizatën Botërore të Tregtisë.

Ndërkaq Flamur Keqa, drejtor i Departamentit të Tregtisë në MTI, ka thënë se ideja është që të fillohet operacionalizimi dhe funksionalizimi më i madh i grupit punues. Ai po ashtu ka deklaruar se gjatë këtij takimi pritet të krijohen nëngrupet punuese, të cilat do të merren me çështje specifi ke sa i përket ekonomisë dhe tregtisë.