Berset: “Presim që vaksinimi të nisë nga fillim i vitit dhe të jetë falas”

Qëllimi është që vaksinimi të jetë falas, ka thënë Berset. "Është planifikuar që Qeveria Federale të paguajë një shumë të madhe ashtu si dhe sigurimet shëndetësore etj.

Alain Berset (KEYSTONE/Peter Schneider)

Qeveria Federale aktualisht po punon intensivisht në aprovimin e vaksinave kundër koronavirusit. Ministri i Shëndetësisë Alain Berset ka njoftuar se vaksinimi do të fillojë “në fillim të vitit të ardhshëm”, njofton srf.ch.

Por, ka thënë ai, nuk do të ketë miratim emergjent.

Zvicra ka identifikuar produktet që kanë dalë më shpejt në treg dhe që funksionojnë më mirë, është shprehur Berset në konferencën për media, të enjten në Bernë, transmeton albinfo.ch. “Ne jemi të pozicionuar mirë”. Disa vaksina të ndryshme aktualisht janë duke u testuar nga Agjencia Zvicerane për Produkte Terapeutike, Swissmedic.

Vaksinimet do të fillojnë pasi të miratohen, ka thënë Berset. Ai, duke iu referuar pandemisë aktuale ka folur për “sfidën më të madhe logjistike në kujdesin shëndetësor të të gjitha kohërave”. Kantonet do të jenë përgjegjëse për të siguruar që popullata mund të vaksinohet sa më shpejt që të jetë e mundur.

Qëllimi është që vaksinimi të jetë falas, ka thënë më tutje Berset, përcjell albinfo.ch. “Është planifikuar që Qeveria Federale të paguajë një shumë të madhe, që sigurimet shëndetësore të paguajnë gjithashtu një shumë dhe do të ketë gjithashtu një kontribut nga kantonet.”

Berset ka shtuar se rreth asaj se kush duhet të vaksinohen të parët, po diskutohet aktualisht. Përcaktimi i përparësive varet nga vaksina dhe rezultatet, ka plotësuar ekspertja Nora Kronig.

LAJME INTERESANTE NGA INTERNETI