Berset: Republika e Kosovës është shtet prioritar për Konfederatën Zvicerane

https://kryeministri.rks-gov.net/

Kryeministri i Republikës së Kosovës, Albin Kurti, sot u takua me zëvendëspresidentin e Zvicrës, Alain Berset, gjatë Forumit Ekonomik Botëror që po mbahet në Davos.

Gjatë këtij takimi u vlerësuan lart marrëdhëniet e afërta miqësore dhe lidhjet e ngushta njerëzore ndërmjet Kosovës dhe Zvicrës, transmeton albinfo.ch.

Zëvendëspresidenti Berset tha se Republika e Kosovës është shtet prioritar për Konfederatën Zvicerane.

U theksua zgjerimi dhe thellimi i bashkëpunimit sa më të afërt për interesat dhe çështjet e përbashkëta, siç janë zhvillimi socio-ekonomik i Kosovës, stabiliteti dhe prosperiteti i Ballkanit Perëndimor. U vlerësua angazhimi prej shumë vjetësh i Zvicrës në arritjen e këtyre objektivave, që reflektohet edhe në programet e bashkëpunimit zhvillimor dhe mbështetjes së paqes.

Zëvendëspresidenti Berset konfirmoi mbështetjen e fuqishme të Zvicrës për aplikimin zyrtar të Republikës së Kosovës në Këshillin e Evropës, në një nga organizatat më të vjetra dhe më të mëdha evropiane, që qytetarëve të Kosovës do t’u mundësojë të përdorin mekanizmat e Gjykatës Evropiane për të Drejtat e Njeriut.

Kryeministri Kurti theksoi rëndësinë e mërgatës së Kosovës në Zvicër si pjesë integrale për zhvillimin e Kosovës, transmeton tutje albinfo.ch.

LAJME INTERESANTE NGA INTERNETI