Bota

Bosnja përgatitet për një shtim migrantësh

Autoritetet boshnjake presin për një përshkallëzim të numrit të migrantëve në rrugën ballkanike gjatë vitit 2019, deklaroi ministri i Sigurisë, Dragan Mektiç, i cili shprehu keqardhje për mungesën e një zgjidhjeje europiane në këtë drejtim.

Bosnja u kursye gjatë valës migratore 2015-2016, por e gjeti veten sërish në një rrugë të re ballkanike në fillim të vitit 2018, shkruan atsh, përcjell albinfo.ch.

Ky vend malor, i cili ndan një vijë të gjatë kufitare prej qindra kilometrash me Kroacinë, anëtare e Bashkimit Europian, u përshkua nga 25 000 migrantë në 2018-ën, përfshirë 22 000 të tjerë, të cilët u larguan nga territori i tyre, sqaron Mektiç, në një intervistë dhënë medias.

Mes janarit dhe shkurtit 2019, rreth 2 300 persona hynë ilegalisht, ndërkohë që rreth 3 500 persona janë aktualisht të strehuar në tetë qendra pritëse, kryesisht në rajonin e Bihaçit, në kufi me Kroacinë.

Autoritetet po përgatiten për një valë edhe më të madhe me ardhjen e pranverës.