Archives

Një destinacion i ri nga Bazeli prej verës së 2026-ës

Posted on by erezzaademi

Franca është një përparësi kryesore për EasyJet nga Basel EuroAirport. Duke filluar nga 22 qershori 2026, linja ajrore do të fluturojë nga ky aeroport për në Lille.

Itinerari i ri do të shërbehet me dy fluturime në javë, të hënave dhe të premteve, shkruan thelocal, transmeton albinfo.ch.

Në total, EasyJet do të fluturojë në 11 destinacione në Francë nga EuroAirport Basel në verën e vitit 2026, duke përfshirë Lille, Paris, Nice, Montpellier, Marsejë, Nantes, Bordeaux, Toulouse, Ajaccio, Bastia dhe Biarritz.

Ambasada e Kosovës në Bernë me njoftim mbi ofrimin e shërbimeve konsullore në Zvicër

Posted on by erezzaademi

Ambasada e Republikës së Kosovës në Bernë ka dalë me njoftim lidhur me shërbimet, përkatësisht ndërprerjet për shkak të festave të fundvitit.

Sipas njoftimit, shtetasit të cilët jetojnë dhe qëndrojnë në Zvicër, se shërbimet e rregullta konsullore (me përjashtim të rasteve emergjente) në Konsullatën e Përgjithshme në Gjenevë, Konsullatën në Cyrih dhe në Ambasadën në Bernë për këtë vit kalendarik ofrohen vetëm deri më 19 dhjetor 2025 dhe rifillojnë nga data 5 janar 2026, transmeton albinfo.ch.

Për raste emergjente, luteni të kontaktoni në numrin emergjent: +41 (0) 77 479 11 86

“Një ditë tjetër” e Mira Kazhanit në Cyrih: Promovimi që u shndërrua në një përqafim kolektiv

Posted on by albinfo.ch

Më 29 nëntor, në lokalin SOHO në Cyrih, u promovua libri “Një ditë tjetër” i gazetares dhe autores Mira Kazhani, e njohur gjerësisht edhe për podkastin e saj të suksesshëm “Zë me Mirën”. Një sallë e mbushur përplotë me pjesëmarrës nga e gjithë Zvicra, por edhe nga Gjermania, Franca dhe Austria, që udhëtuan për të qenë pjesë e kësaj ngjarjeje letrare. Publiku krijoi radhë të gjata për të blerë librin, ndërsa atmosfera ishte e mbushur me kureshtje, solidaritet dhe një përqafim të heshtur kolektiv për rrëfimin e autores.

 

Foto: Korab Macula

Ngrohtësi, energji dhe një organizim shembullor në shërbim të librit

Promovimi u zhvillua në një atmosferë të pastër emocionale. Mira Kazhani i përshëndeti të gjithë me qetësinë, përulësinë edhe sinqeritetin që e karakterizon në podkastin e saj “Zë me Mirën”. Ajo firmosi çdo kopje, iu dha kohë çdo lexuesi dhe krijoi një afërsi të rrallë, të sinqertë, që mbeti e pranishme në gjithë hapësirën. Ngjarja u shoqërua me një moment të papritur e të ëmbël: Flora, mikesha e nënës së autores, këndoi disa vargje që prekën zemrat e të pranishmëve. Nuk ishte program i strukturuar, ishte thjesht një shfaqje e vogël dashurie, një dhuratë emocionale që forcoi më tej lidhjen e publikut me këtë promovim.

Foto: Ernida Avdimetaj

Organizimi i Kastriot Çaushit, pronarit të SOHO-s, ishte i përkryer. Ky lokal po shndërrohet gjithnjë e më shumë në një qendër të gjallë të kulturës shqiptare në Cyrih, duke ofruar një hapësirë ku diaspora hyn në dialog, reflekton, lexon, dhe krijon ura të reja bashkësie.

Fjalimi i Enver Robellit: filozofi, humor dhe një thirrje për rikthimin te libri

Botuesi Enver Robelli, udhëheqës i Shtëpisë Botuese “Dora d’Istria” Libraria | Dora Books 1, hapi promovimin me një fjalim të thellë, të ndërtuar me finesë dhe ironi të butë. Ai foli për ritmet e fundvitit, për “apostujt e konsumerizmit” dhe klimën e stërngarkuar të dhjetorit. Në këtë kontekst, prania e publikut ishte për të një shenjë e madhe shprese: “Pas të Premtes së Zezë vjen e Shtuna e Bardhë,” tha ai, duke dhuruar buzëqeshje dhe reflektim.

Robelli solli në vëmendje diferencën e ndjeshme mes “tumor” dhe “humor”, duke theksuar se një shkronjë e vetme e ndryshon kuptimin, ashtu si një libër mund të ndryshojë jetën. Ai përmendi takimin me publicistin Paul Lendvai dhe idenë se fati është rastësi, një fytyrë që ndryshon sipas provave të jetës.

Foto: Ernida Avdimetaj

Më pas, ai theksoi lidhjen e fortë mes leximit dhe shoqërive të zhvilluara, duke sjellë statistika nga Zvicra dhe vendet nordike. Robelli ngriti shqetësimin për rënien e përdorimit të shqipes në Zvicër dhe nevojën që diaspora të mbajë gjallë librin shqip.

“Gjuha kultivohet duke lexuar. Librat çlirojnë imagjinatën. Dhe njerëzit me imagjinatë të çliruar janë njerëz të mirë,” u shpreh ai.

Fjalimin e tij e mbylli me një të vërtetë prekëse: “Në libra ne nuk e kërkojmë jetën tonë, në libra e gjejmë atë.”

Foto: Korab Macula

Fjala e autores, Mira Kazhani, kur rrëfimi bëhet dritë

Mira Kazhani foli hapur, qartë dhe me një ndjenjë të dukshme mirënjohjeje: “Faleminderit shumë, nuk prisja të ishit kaq shumë. Unë jam 45 vjeç dhe gjatë këtij viti kam jetuar sa për 45.”

Ajo rrëfeu se ky vit ishte i mbushur me “herë të para”, disa të bukura, të tjera të vështira, por të gjitha të rëndësishme. Momenti më sfidues ishte diagnoza me kancer në gji, një realitet që ajo e përballoi me një forcë që, siç tha, nuk e dinte se e kishte.

“Ka qindra, mijëra gra më të forta se unë. Merita ime është se u ula dhe shkrova një libër.”

Foto: Ernida Avdimetaj

Ajo tregoi se libri u shkrua në heshtje, me kujdes, pa pasur një plan të qartë për botimin, derisa kërkoi vlerësimin profesional të botuesit. Përgjigjja e tij e sinqertë e bëri të besonte se libri mund të shërbente për të tjerët.

Mira foli për përqafimin publik që ka marrë përmes librit: “Nuk njoh shumë njerëz në këtë sallë, por në fakt jeni të njohur – jeni njerëz që më keni shkruar, më keni ndjekur dhe keni ardhur për mua.”

Në këtë moment, ajo u drejtua prindërve të diasporës me një thirrje të ngrohtë:

“E di që fëmijët tuaj flasin gjuhën e vendit ku jetojnë, dhe kjo është natyrshme. Por ju lutem, jepuni të lexojnë edhe shqip. Libra shqip. Gjuha është pjesë e shpirtit, pjesë e kujtesës, pjesë e lidhjes me veten. Mos ua prisni këtë fije të artë.”

Publiku e priti këtë mesazh me duartrokitje të gjata.

Foto: Korab Macula

Më pas, Mira falënderoi Enver Robellin, duke i dhënë fjalës së saj një notë të sinqertë profesionale: “Kam një ndjenjë të mirë që këtë udhëtim po e bëjmë bashkë… I ke dhënë thjeshtësinë dhe seriozitetin udhëtimit të ‘Një ditë tjetër’.”

Dhe e mbylli me reflektimin: “Unë e di që në Shqipëri serioziteti zviceran shihet si diçka e mërzitshme… Por mendoj se serioziteti është shumë i shëndetshëm për një jetë të mbarë dhe do të duhej ta kishim edhe ne pak më shumë në Tiranë.”

Për librin “Një ditë tjetër…”

“Një ditë tjetër…” është një rrëfim i guximshëm përballë një prej sfidave më të mëdha të jetës, diagnostikimit me kancer në gji. Me sinqeritet, ndjeshmëri dhe forcë të brendshme, Mira Kazhani na fton të ecim krah saj në një udhëtim ku frika, dhimbja, humori dhe dashuria gërshetohen në mënyrë të natyrshme.

Ky libër është një udhërrëfyes i çmuar për ata që përballen me sëmundjen:
si të përballohet tronditja e parë, si të gjendet mjeku i duhur, si të merret vendimi për terapi, dhe si të menaxhohet frika.

Por libri shkon shumë përtej dimensionit praktik. Ai depërton në tabutë shoqërore, në pabarazitë e heshtura, në raportin shpesh të brishtë mes pacientit dhe shëndetësisë, si edhe në dinamikën emocionale të grave që përballen me një diagnozë që prek jo vetëm trupin, por edhe identitetin, rolet dhe hapat e tyre të përditshëm. Epilogu është i bukur dhe i papritur – një fitore ndaj sëmundjes, por edhe ndaj heshtjes. Ky libër është për ata që kërkojnë forcë pas një diagnoze tronditëse, për ata që duan ta kuptojnë kancerin si përvojë thellësisht njerëzore dhe për ata që besojnë se e vërteta, kur rrëfehet me guxim, mund të shndërrohet në shërim.

“Një ditë tjetër…” nuk është vetëm për t’u lexuar – është për t’u jetuar.

Fotografitë i kanë shkrepur: Korab Macula dhe Ernida Avdimetaj 

Librin e gjeni në: Një ditë tjetër… – Mira Kazhani | Dora Books

 

Gjykata Speciale ja vazhdon paraburgimin Hashim Thaçit

Posted on by erezzaademi

Gjykata Speciale në Hagë ka njoftuar se në rastin “Thaçi dhe të tjerët” të administrimit të drejtësisë, ish-presidentit të Kosovës, Hashim Thaçi dhe të tjerëve u është vazhduar paraburgimi.

“Në vendimin mbi rishikimin e paraburgimit më 3 dhjetor 2025, Gjykatësi i Vetëm urdhëroi vazhdimin e paraburgimit të Hashim Thaçit, Bashkim Smakajt dhe Fadil Fazliut. Gjykatësi Gosnell konstatoi se ekziston rreziku real që të akuzuarit, nëse do të liroheshin, mund të pengojnë ecurinë e procesit dhe të kryejnë vepra penale të tjera”, njofton Specialja.

Aktakuza kundër të akuzuarve u konfirmua më 29 nëntor dhe u bë publike më 6 dhjetor 2024. Më 3 prill 2025, Paneli i Gjykatës së Apelit miratoi pjesërisht apelin e ZPS-së kundër vendimit të Gjykatëses së Procedurës Paraprake të datës 29 nëntor 2024 për konfirmimin e aktakuzës.

ZPS-ja kundërshtoi interpretimin e Gjykatëses të nenit 32(3) të Kodit Penal të Kosovës (KPK), me argumentin se ajo gaboi që përjashtoi përgjegjësinë penale të Hashim Thaçit për nxitje bazuar në një keqinterpretim të kritereve të dënimit. Me vendim të shumicës – gjykatësja Jorgensen ishte në mospajtim – Paneli u pajtua se neni 32(3) zbatohet për vepra penale për të cilat shkallëzimi i dënimeve përfshin pesë vjet ose më shumë se pesë vjet, edhe nëse jo dënim minimal, shkruan EO. Paneli ia ktheu çështjen Gjykatëses së Procedurës Paraprake për shqyrtim të mëtejshëm, transmeton albinfo.ch.

Protesta e radhës në mbështetje të ish-krerëve të UÇK-së, më 13 dhjetor në Shkup

Posted on by erezzaademi

Protesta e radhës në mbështetje të ish-krerëve të Ushtrisë Çlirimtare të Kosovës që po mbahen në paraburgim në Hagë, raportohet se do të mbahet më 13 dhjetor në Shkup.

Siç raporton gazeta “Nacionale” në Kosovë, lajmin e ka bërë të ditur Ali Ahmeti, kryetar i BDI-së.

Sipas njoftimit, protesta do të mbahet me fillim nga ora 13:00, transmeton albinfo.ch.

Ndryshe, deri tani protesta të këtij lloji janë mbajtur në Prishtinë, Hagë, Tiranë dhe Strasburg.

Ndërmarrësi shqiptar në Zvicër mbështet klubin e njohur të hendbollit HC Luzern me 100 mijë franga

Posted on by albinfo.ch

Kompania me pronar shqiptar «Keep Style», në Unterentfelden të Zvicrës, ka bërë një hap të rëndësishëm në mbështetje të sportit zviceran, duke dhuruar 100’000 franga për klubin e njohur të hendbollit HC Luzern.

Për ekipin e KeepStyle, lidhja me HC Luzern nuk është vetëm profesionale, por edhe emocionale. Për vite me radhë, staf i kompanisë ka ndjekur me pasion çdo ndeshje të klubit, duke përjetuar atmosferën elektrizuese dhe energjinë që përcjellin sportistët luzernas.

Kjo ndjesi përkatësie dhe afërsie me komunitetin lokal i ka shtyrë drejt këtij gjesti bujar.

“Atmosfera, energjia dhe emocionet që na ka dhuruar klubi çdo herë na kanë bërë ta ndihemi pjesë e kësaj familjeje sportive. Për këtë arsye, me shumë krenari dhe vullnet të madh vendosëm të mbështesim klubin me një kontribut prej 100’000 frangash,” thotë Bekim Morina, pronar i  Keep Style GmbH.

Një kompani me 15 vjet eksperiencë në tregun zviceran

Me mbi 15 vite operim në Zvicër, Keep Style është shndërruar në një emër të qëndrueshëm dhe të besueshëm në sektorin e tekstilit. Kompania merret me blerje dhe shitje të tekstilit, ofron produkte cilësore për klientët dhe menaxhon dy outlete të mëdha që shërbejnë si destinacion i preferuar për artikuj mode dhe shtëpie.

Nga Kosova për Zvicrën – cilësi, traditë dhe pasion për tekstilin

Përveç aktivitetit brenda Zvicrës, Keep Style ruan një lidhje të fortë me Kosovën përmes eksportit të produkteve si tekstil shtëpiak dhe produktet higjienike Fresh, të prodhuara në Pejë. Ky bashkëpunim jo vetëm sjell cilësi në tregun zviceran, por edhe forcon urën ekonomike midis dy vendeve.

Partneritete me gjigantët e tregtisë në Zvicër

KeepStyle furnizon rregullisht disa nga zinxhirët më të mëdhenj në vend, përfshirë:

Coop, Migros, Otto’s, Conforama, Peodeca, Löb si dhe shumë partnerë të tjerë prestigjiozë.

Angazhimi i kompanisë në sport është një vazhdimësi natyrale e filozofisë së saj të kontribuojë në komunitet me të njëjtin pasion që punon përditë në industrinë e tekstilit, thonë menxherët e Keep Style..

Kompania është e hapur për bashkëpunim me të gjithë prodhuesit e interesuar nga Kosova.

Adresë:

Keep Style GmbH

Schinhuetweg 5,

5035 Unterentfelden
Kanton Aargau

Tel: 062 724 13 03

Lexoni po ashtu:

Shqiptari me shitore aksesorësh në qendrën e re tregtare në Suhr

 

Trajneri i Baselit, Ludovic Magnin, konfirmon besimin te Xherdan Shaqiri për penalltitë

Posted on by Drin Reçica

Pavarësisht penalltive të humbura gjatë këtij edicioni, trajneri i Baselit, Ludovic Magnin, ka theksuar se kapiteni i skuadrës, Xherdan Shaqiri, do të vazhdojë të jetë ekzekutuesi kryesor i penalltive, nëse vetë futbollisti dëshiron, përcjell albinfo.ch.

Shaqiri gaboi në penalltinë e tij të tretë këtë sezon, gjatë ndeshjes kundër St. Gallenit. Megjithatë, Magnin mbetet plot besim te eksperienca dhe roli i kapitenit.

“Nëse Xherdan dëshiron të vazhdojë të gjuajë penallti, ai do ta bëjë këtë. Nuk ka asnjë diskutim për këtë,” tha trajneri zviceran.

34-vjeçari Shaqiri është një nga liderët kryesorë të Baselit këtë sezon, ku ka shënuar 10 gola dhe ka dhënë po aq asistime në të gjitha garat.

“Ai është kapiteni ynë, dhe nëse merr topin, do të gjuajë. Nuk kam arsye për ta dyshuar,” shtoi Ludovic Magnin.

Posta Zvicerane thyen rekord me 7.9 milionë pako të dorëzuara gjatë sezonit të Black Friday

Posted on by Drin Reçica

Me 7.9 milionë pako të dorëzuara gjatë periudhës së afërt me Black Friday, Posta Zvicerane ka thyer rekordin e saj të vitit të kaluar, duke regjistruar një rritje të konsiderueshme në volumin e dërgesave, përcjell albinfo.ch.

Nga data 24 nëntor deri më 2 dhjetor 2025, numri i pakove të dorëzuara u rrit me gati 400,000 krahasuar me periudhën e njëjtë të vitit të kaluar, sipas njoftimit zyrtar të shërbimit postar.

Ky rekord reflekton një rritje të kërkesës për blerje online dhe volum të madh pakosh për shkak të zbritjeve të shumta dhe ofertave speciale që ofrohen nga tregtarët në kuadër të Black Friday.

Punonjësit e Postës kanë pasur një ngarkesë të madhe pune për të përpunuar, renditur dhe shpërndarë këtë numër të jashtëzakonshëm pakosh gjatë kësaj periudhe.

Sonte fillon festivali “Tri Net Film Fest”, në Freienstein

Posted on by albinfo.ch

Pasionantët e filmit të shkurtër do të kenë një mundësi të veçantë për të përjetuar artin e kinemasë, pasi “Tri Net Film Fest” po kthehet për herë të katërt, kësaj radhe në Freienstein, transmeton albinfo.ch.

Ky festival i njohur nën moton “Shkurt në ekran, gjatë në kujtesë”, do të zhvillohet më 4, 5 dhe 6 dhjetor 2025 në sallën e Neues Kino, në adresën Striekgasse 1, 8427 Freienstein.

Festivali ofron një mundësi unike për të njohur krijime të reja të regjisores dhe regjisorëve të rinj nga Shqipëria, Kosova dhe më gjerë, duke prezantuar një gamë të gjerë zhanresh, nga dramat intensive te komeditë që ngrohin zemrën. Organizatorët premtojnë një atmosferë magjike, ku çdo shikues do të mund të zhytet në botën e filmit të shkurtër dhe të largohet me përjetime që mbeten gjatë në kujtesë.

Pjesëmarrësit e interesuar mund të rezervojnë datat dhe të sigurojnë vendet e tyre përmes faqes zyrtare të festivalit, duke mos humbur kështu mundësinë për të qenë pjesë e një prej ngjarjeve më të rëndësishme të filmit të shkurtër në rajon./Albinfo.ch

Këta janë filmat që do të shfaqen sonte, në natën e parë të festivalit:

“Një histori e parrëfyer” – Sara Hoxhaj
“Emri im është Sonila” – Suela Bako
“Në sytë e Xhelos” – Besa Tusha
“Mbijetesa dhe shkolla” – Ilir Kabashi
“Atje ku qershitë janë gjithmonë të kuqe” – Shqipe Bebe Krasniqi

Vendi: Neues Kino, Striekgasse 1, 8427 Freienstein.

Koha: Sonte, 04. 12. Dyert hapen nga ora 18.30. Shfaqja e filmave: 19.30

 Rezervoni biletat këtu:
(D. R.)

Kosova ndër ekonomitë me rritjen më të shpejtë në Evropë, +8.51%

Posted on by Drin Reçica

Sipas një analize të publikuar nga “BestBrokers”, e bazuar në të dhënat e Fondit Monetar Ndërkombëtar dhe e transmetuar nga revista gjermane FOCUS Online, periferia e Evropës po shënon rritje të përshpejtuar ekonomike, dhe Kosova renditet lart në këtë listë, transmeton albinfo.ch.

Me një rritje reale të PBB-së prej +8.51%, Kosova pozicionohet ndër 10 ekonomitë me rritjen më të shpejtë në Evropë, duke tejkaluar shumë shtete të BE-së dhe rajonit.

Ky rezultat tregon një moment të fortë zhvillimi ekonomik, një sinjal premtues për investime, stabilitet dhe perspektivë afatgjatë për vendin.

Jep dorëheqje Federica Mogherini

Posted on by Drin Reçica

Ish-zyrtarja e lartë e Bashkimit Evropian dhe rektorja e Kolegjit Evropian, Federica Mogherini, dha dorëheqjen nga pozita akademike pasi Zyra e Prokurorit Evropian nisi hetim kundër saj, përcjell albinfo.ch.

“Në përputhje me rigorozitetin dhe drejtësinë maksimale me të cilën kam kryer gjithmonë detyrat e mia, kam vendosur sot të jap dorëheqjen nga pozicioni i rektores”, ka thënë Mogherini, pas takimit të Bordit Ekzekutiv të Kolegjit të enjten.

Deklarata vjen një ditë pasi zyrtari i lartë i BE-së, Stefano Sannino, ka thënë se do të tërhiqej në fund të dhjetorit, i cili gjithashtu është nën hetim. Ai është kreu i Drejtorisë së Përgjithshme të Komisionit për Lindjen e Mesme, Afrikën e Veriut dhe Gjirin.

Hetimi, i udhëhequr nga prokurori i BE-së, përqendrohet në një kontratë njëvjeçare të dhënë Kolegjit të Evropës si pjesë e një tenderi për të nisur një akademi të re për të trajnuar diplomatë të rinj kombëtarë dhe nëpunës civilë të BE-së për role të ardhshme në përfaqësimin e Evropës jashtë vendit.

Prokurorët dyshojnë se, në periudhën nga viti 2021 deri në vitin 2022, Kolegji dhe shërbimi diplomatik i BE-së mund të kenë bashkëpunuar për të drejtuar në mënyrë të papërshtatshme fondet e BE-së drejt projektit, duke përfshirë edhe informimin paraprak të Kolegjit për tenderin. Tenderi është zyrtarisht i hapur për universitetet në të gjithë Evropën.

Mogherini mbetet e pafajshme ndërsa hetimi vazhdon.

“Kam besim të plotë në sistemin gjyqësor dhe besoj se korrektësia e procedurës së Kolegjiumit do të përcaktohet”, u shpreh Mogherini në një deklaratë pasi u lirua nga paraburgimi, duke shtuar se do t’u ofrojë bashkëpunim të plotë autoriteteve.

Mogherini ka qenë rektore e Kolegjit Evropian që nga viti 2020, duke mbikëqyrur kampuset j në Brugge, Varshavë dhe Tiranë. Ajo gjithashtu mori rolin e drejtoreshës së Akademisë Diplomatike në vitin 2022, një pozicion që qeveritë e BE-së e bënë të përhershme në vitin 2024, duke e financuar atë me 1.7 milionë euro në vit.

Mogherini më herët ka qenë udhëheqëse e dialogut Kosovë – Serbi.

Edi Rama uron për 113-vjetorin e Forcave të Armatosura

Posted on by Drin Reçica

Forcat e Armatosura të Shqipërisë shënojnë sot 113-vjetorin e krijimit të tyre, një prej institucioneve më të rëndësishme të shtetit shqiptar që nga dita e parë e formimit më 4 dhjetor 1912.

Me këtë rast, Kryeministri Edi Rama ka ndarë në rrjetet sociale një video dedikuar historikut dhe rolit të Forcave të Armatosura ndër vite. Në mbishkrimin shoqërues, Rama shkruan shkurtimisht: “113 vjet forcë e armatosur”, duke përcjellë urimin dhe vlerësimin për kontributin e efektivëve në shërbim të vendit.

Vetenarit të UÇK-së i caktohen 30 ditë paraburgim në Serbi

Posted on by Drin Reçica

Ministria e Punëve të Jashtme ka njoftuar se veteranit Avni Qenaj i cili u arrestua më 26 nëntor nga Serbia, i është caktuar masë paraburgimi prej 30 ditësh në Beograd. Njoftohet se është iniciuar procedurë penale ndaj tij me pretendimin se ka kryer krime lufte gjatë vitit 1999, përcjell albinfo.ch.

Përmes një postimi në rrjetin social Facebook, MPJD-ja ka deklaruar se përmes Zyrës Ndërlidhëse në Serbi, do të vazhdojnë monitorimin nga afër të këtij rasti dhe do të ndërmarrin të gjitha veprimet e nevojshme tutje.

“Ministria e Punëve të Jashtme dhe Diasporës njofton se autoritetet gjyqësore të Serbisë kanë iniciuar procedurë penale ndaj shtetasit të Republikës së Kosovës, z. Avni Qenaj, dhe i kanë shqiptuar masën e paraburgimit prej 30 ditësh, me pretendime për krime lufte të vitit 1999. Ministria e Punëve të Jashtme dhe Diasporës thekson sërish se ky veprim përbën vazhdimësi të praktikave të Serbisë për ndjekje politike ndaj qytetarëve të Kosovës, përmes akuzave të pabazuara dhe të motivuara politikisht. Ministria e Punëve të Jashtme dhe Diasporës, përmes Zyrës Ndërlidhëse në Serbi, do të vazhdojë monitorimin e afërt të këtij rasti dhe do të ndërmarrë të gjitha veprimet e nevojshme diplomatike për të mbrojtur të drejtat e z. Qenaj dhe për të kundërshtuar këto akuza të pambështetura dhe me motiv politik”, thuhet në njoftimin e MPJD-së.

Gjatë vizitës nga ambasadori i Republikës së Kosovës në Serbi, Jetish Jashari, citohet të ketë thënë se në arrest policor i është bërë presion psikologjik por pa keqtrajtim fizik.

“Bëhet e ditur se ambasadori i Republikës së Kosovës në Serbi, Jetish Jashari, dje ka vizituar z. Qenaj në Qendrën e Paraburgimit të Gjykatës së Lartë për Krime të Luftës në Beograd, ku i ka ofruar mbështetjen e plotë institucionale të Qeverisë së Republikës së Kosovës, në përputhje me të drejtën ndërkombëtare dhe standardet e drejtësisë. Z. Qenaj ka deklaruar se gjatë qëndrimit në arrest policor i është ushtruar presion psikologjik, por pa keqtrajtim fizik, dhe se as aktualisht nuk ka keqtrajtime nga autoritetet e paraburgimit. Ai ka bërë të ditur se ende nuk është vizituar nga familjarët, por pret vizitën e tyre në ditët në vijim. Familjarët e tij kanë angazhuar katër avokatë mbrojtës për përfaqësimin e tij ligjor”, thuhet në njoftim.

Qenaj është arrestuar më 26 nëntor 2025 në pikëkalimin kufitar Merdarë, gjatë transitit drejt Bosnjë dhe Hercegovinës, ku familja e tij ka një biznes familjar. Pas arrestimit, ai është mbajtur për 48 orë në Prokuplje dhe më pas është transferuar në Beograd. Më 28 nëntor, ai ka dalë para gjykatësit të procedurës paraprake në Gjykatën e Lartë për Krime të Luftës të Beogradit, ku është njoftuar se Prokuroria e Lartë për Krime të Luftës e Beogradit ka iniciuar procedurë penale kundër tij dhe i është shqiptuar masa e paraburgimit.

Shoqata “Parandalo” kërkon mbrojtje institucionale për personat me aftësi të kufizuara

Posted on by albinfo.ch

Në kuadër të 3 Dhjetorit – Ditës Ndërkombëtare të Personave me Aftësi të Kufizuara – Shoqata Parandalo ka publikuar një deklaratë zyrtare përmes së cilës kërkon forcimin e mbrojtjes institucionale, rritjen e pjesëmarrjes dhe garantimin e barazisë për personat me aftësi të kufizuara në Zvicër, me theks të veçantë te gratë me prejardhje migrimi.

Organizata thekson se gratë me aftësi të kufizuara dhe prejardhje migrimi përballen me rrezik më të lartë të diskriminimit të shumëfishtë, shpesh të padukshëm në hapësirën publike dhe në politikat sociale. Për këtë arsye, Parandalo kërkon masa më konkrete, struktura më të forta mbështetëse dhe mekanizma të qartë mbrojtjeje që u garantojnë siguri, vetëvendosje dhe qasje të barabartë në shërbime.

Deklarata e kësaj date lidhet gjithashtu me fushatën e përvitshme zvicerane “16 ditët kundër dhunës me bazë gjinore”, e cila zhvillohet nga 25 Nëntori deri më 10 Dhjetor dhe ku çdo vit marrin pjesë mbi 300 organizata në nivel vendi. Fushata koordinohet prej 18 vitesh nga organizata feministe për paqe FRIEDA dhe çdo edicion trajton një temë qendrore të re.

Për vitin 2025, fokusi kombëtar është vendosur mbi lidhjen midis dhunës me bazë gjinore dhe aftësisë së kufizuar – një realitet që shpesh nuk pasqyrohet mjaftueshëm në diskutimin publik. Sipas vlerësimeve të organizatave partnere, gratë me aftësi të kufizuara janë në mënyrë disproporcionale të ekspozuara ndaj formave të dhunës në ambientin familjar dhe shpesh përballen me barriera të mëdha për të kërkuar ndihmë apo mbrojtje.

Shoqata Parandalo është pjesë e organizatave partnere të kësaj fushate, me qëllim që të shtojë dukshmërinë e kësaj tematike dhe të nxisë reforma në politika, në praktikat profesionale dhe në ndërgjegjësimin shoqëror.

Në deklaratën zyrtare, Parandalo thekson se mbrojtja e personave me aftësi të kufizuara nuk mund të jetë vetëm një çështje sensibilizimi, por një përgjegjësi institucionale dhe shoqërore. “Kërkojmë më shumë mbrojtje, sisteme më të forta mbështetjeje dhe barazi të vërtetë për gratë me aftësi të kufizuara. Çdo person duhet të jetojë i sigurt, me dinjitet dhe pa dhunë”, theksohet në thirrjen e Shoqatës.

Deklarata përmbyllet me nënshkrimet zyrtare të Valdete Hotit, kryetare e Shoqatës Parandalo, dhe Xhemal Selimit, udhëheqës i Qendrës Parandalo, të cilët theksojnë angazhimin e vazhdueshëm të organizatës për avancimin e të drejtave dhe përfshirjes së personave me aftësi të kufizuara në Zvicër.

Cyrih, 3 dhjetor 2025

(L.A.)

Mos prekni të drejtën e votës së të huajve

Posted on by albinfo.ch

Dyshimet për mashtrim në #Vernier duhet të trajtohen me gjithë rreptësinë e nevojshme. Por një gjë është e qartë: nuk forcohet besimi i publikut duke dobësuar demokracinë lokale.

E drejta e votës së të huajve nuk është e negociueshme

Vënia në pikëpyetje e një të drejte demokratike të fituar prej dekadash, mbi bazën e një dyshimi që prek disa individë, është një devijim i rrezikshëm.
Të drejtat nuk u hiqen kolektivisht të gjithëve vetëm sepse disa individë i keqpërdorin ato.

Është drejtësia ajo që duhet ta bëjë punën e saj

Që nga muaji mars, hetimi po zvarritet, me paratë e taksapaguesve, deri edhe duke angazhuar kompani të specializuara në ekspertizë të dorëshkrimit.
Nuk është vota e të huajve problemi: problemi është ngadalësia e drejtësisë për të përcaktuar qartë përgjegjësitë.

Mashtruesit duhet të ndëshkohen, jo komunitetet

Mashtrimi zgjedhor është vepër e rëndë! Mashtruesit duhet të dënohen dhe, nëse është e nevojshme, të futen në burg.
Por stigmatizimi i një komuniteti të tërë, ose vënia në dyshim e të drejtave të tij themelore, është e padrejtë, e paefektshme dhe në kundërshtim me vlerat zvicerane.

Të huajt kontribuojnë në shoqëri dhe meritojnë respekt e dinjitet

Të huajt jetojnë këtu, punojnë këtu, paguajnë taksa këtu dhe rrisin fëmijët e tyre këtu.
Ata luajnë rol thelbësor në jetën ekonomike, sociale dhe kulturore.
Ata meritojnë respekt, jo dyshim të përgjithshëm.

Në përmbledhje: Demokracia nuk mbrohet duke kufizuar të drejtat, por duke zbatuar ligjin. Të drejtat politike lokale të të huajve janë forcë, jo dobësi.
Mos i prekni! Drejtësia duhet të veprojë dhe vetëm mashtruesit duhet të japin llogari për veprimet e tyre.

 

MUSUB: Këshillimi Multikulturor mbi varësinë – Tani edhe në shqip

Posted on by albinfo.ch

Në saje të kërkesës në rritje nga komuniteti shqiptar në kantonet Basel-Stadt dhe Basel-Landschaft, MUSUB – Qendra Multikulturore e Këshillimit për Varësinë, tani ofron shërbimet e saj edhe në shqip.

albinfo.ch ka folur me Philippe Schmidt dhe Sadije Kastratin nga qendra MUSUB për të mësuar më shumë rreth këtij shërbimi dhe punës së tyre të përditshme.

Sadije Kastrati: “Ne duam t’i arrijmë njerëzit në gjuhën dhe kulturën e tyre”

albinfo.ch: Kush ose çfarë është MUSUB?

Philippe Schmidt: Ne jemi një qendër këshillimi e specializuar për njerëzit me probleme varësie, siç janë alkoolizmi ose varësia nga bixhozi. Ekipi ynë përbëhet nga profesionistë në psikologji, psikoterapi, punë sociale dhe pedagogji sociale. MUSUB ka funksionuar që nga viti 1998. Në vitin 2018, ne u bashkuam me Kryqin e Kaltër të Bazelit.

Sadije Kastrati: Unë ofroj këshillim në shqip dhe gjermanisht, Philippe kryesisht në anglisht dhe gjermanisht. Ne takojmë njerëz aty ku janë – gjuhësisht dhe nga ana kulturore.

“Ofrojmë këshillim në 12 gjuhë – tani edhe në shqip”

albinfo.ch: Çfarë bëni saktësisht në MUSUB?

Schmidt: Ofrojmë këshillim për varësinë me karakteristika kulturore – për njerëz me prejardhje të ndryshme. Aktualisht ofrojmë këshillim në dymbëdhjetë gjuhë.

Kastrati: Nëse është e nevojshme, ne sjellim edhe përkthyes ndërkulturorë. Gjuha është e rëndësishme, por rëndësi ka edhe të kuptuarit e prejardhjes kulturore të personit të prekur.

“Këshillimi është falas dhe konfidencial”

albinfo.ch: Për kë është i destinuar shërbimi juaj?

Schmidt: Për të gjithë banorët e Basel-Stadtit ose Basel-Landit. Këshillimi është falas për ta sepse duam ta bëjmë aksesin sa më të lehtë të jetë e mundur. Kushdo tjetër mund të marrë këshillim nga ne me pagesë.

Kastrati: Konfidencialiteti është shumë i rëndësishëm për ne. Të gjithë punonjësit janë të detyruar të ruajnë konfidencialitetin.

“Ne punojmë me mendje të hapur – abstinenca nuk është gjithmonë qëllimi.”

albinfo.ch: Si funksionon një seancë këshillimi në praktikë?

Schmidt: Së pari, ne kryejmë një konsultë fillestare. Sqarojmë situatën aktuale dhe diskutojmë sfidat. Pastaj, së bashku me klientët, përcaktojmë qëllimet.

Kastrati: Ne punojmë me mendje të hapur. Disa duan të jetojnë në mënyrë të përmbajtur, të tjerët duan të zvogëlojnë për fillim, konsumin e tyre. Të dy zgjedhjet janë mirë – ajo që është e rëndësishme është që zgjedhja të jetë realiste dhe e rënë dakord së bashku.

Schmidt: Ne shpesh përfshijmë edhe mjedisin shoqëror – për shembull, partnerët ose anëtarët e familjes – sepse varësia nuk prek kurrë vetëm një person. Për këtë arsye, ne këshillojmë edhe të afërmit e ngushtë.

“Pse shqip tani? Sepse ka nevojë”

albinfo.ch: Pse vendosët të përfshini shqipen në shërbimet tuaja?

Kastrati: Sepse shumë njerëz që kanë shqipen si gjuhë të parë jetojnë në rajon – dhe ne gjithashtu kemi marrë kërkesa të drejtpërdrejta. Është shfaqur nevoja për të.

Schmidt: albinfo.ch është një platformë e përshtatshme për informimin specifik të popullsisë shqiptare. Ne duam që njerëzit ta dinë: Ndihma është e disponueshme – falas, profesionale dhe në gjuhën e tyre.

“Një telefonatë ose një email është e gjitha që duhet.”

albinfo.ch: Si mund të kontaktohet MUSUB?

Kastrati: Është shumë e thjeshtë: Një telefonatë ose një email është e gjithë ajo që duhet. Zakonisht mund të caktoni një takim brenda shtatë ditësh.

Një rast nga praktika: Midis vetmisë, përdorimit të substancave dhe një fillimi të ri

Për ta bërë punën e tyre më të prekshme, këshilltarët ndajnë një studim rasti anonim nga praktika e tyre:

Schmidt: “Na kontaktoi një burrë që fliste spanjisht dhe që kishte jetuar në Zvicër për disa vite. Për shkak të pandemisë dhe distancës nga familja e tij, ai filloi të pinte më shumë alkool, dhe në fundjavë përdorte edhe kokainë. Si rezultat pësonte marrëdhënia e tij vuajti, ashtu si edhe performanca e tij në punë. Pas disa seancave, ai e kuptoi se diçka duhej të ndryshonte. Së bashku me mjekun e familjes, u organizua detoksifikimi spitalor. Këshillim ambulator vazhdoi më pas. Pavarësisht rikthimeve, ai këmbënguli. Partnerja e tij gjithashtu përfundimisht kërkoi këshillim – së bashku ata punuan për stabilizimin e situatës së tyre”.

“Mesazhi ynë: ‘Me ne – nuk jeni vetëm”

Kastrati: “Është krejtësisht në rregull të kërkosh ndihmë. Shumë njerëz mendojnë se duhet ta menaxhojnë gjithçka vetë – por nuk mund ta bëjnë”.

Schmidt: “Dhe tani ndihma është e disponueshme edhe në shqip”.

E pranon fajësinë i akuzuari për sulm ndaj KFOR-it dhe Policisë në Zveçan

Posted on by Drin Reçica

Lubisha Miljkoviq i cili po gjykohet për sulmin ndaj KFOR-it dhe Policisë së Kosovës, më 29 maj të 2023-s në Zveçan ka arritur marrëveshje për pranimin e fajësisë me Prokurorinë Speciale për veprën penale “sulm” dhe “pjesëmarrje në turmë që kryen vepra penale apo huliganizëm”, përcjell albinfo.ch.

“Unë e pranoj fajësinë dhe e pranoj marrëveshjen për pranimin e fajësisë”, tha ai.

Edhe avokati Milosh Deleviq tha se marrëveshja është arritur me vullnet të lirë dhe pas konsultimeve të mjaftueshme të të pandehurve me mbrojtësin. Deleviq propozoi Milkoviq që të dënohet me gjobë dhe t’i mundësohet pagesa me këste në periudhë dyvjeçare.

Prokurori Bekim Kodraliu deklaroi se marrëveshja parasheh 2 vjet burgim efektiv, ku llogaritet koha e kaluar në paraburgim, si dhe gjashtë muaj burgim që zëvendësohen me gjobë në vlerë prej 14.000 eurosh.

Kryetarja e trupit gjykues, Violeta Namani-Hajra, konstatoi se janë plotësuar kushtet e parapara për ta miratuar marrëveshjen e fajësisë dhe se është e bazuar në prova e fakte. Aktgjykimi do të shpallet pas pak.

Shqipëria merr Presidencën e radhës së CEFTA në vitin 2026

Posted on by Drin Reçica

Shqipëria do të marrë Presidencën e Radhës së CEFTA-së në vitin 2026. Ministrja Delina Ibrahimi prezantoi katër prioritetet strategjike që vendi ynë do të udhëheqë gjatë këtij mandati:

– Fuqizimi i bashkëpunimit politik dhe institucional ndërmjet palëve të CEFTA-s;

– Rritja e transparencës dhe pjesëmarrjes së aktorëve ekonomikë dhe socialë në hartimin e politikave;

– Prodhimi i rezultateve konkrete për bizneset, veçanërisht në lehtësimin e qarkullimit të mallrave, Green Lanes, turizmin dhe tregtinë agro-ushqimore;

– Mbështetja e investimeve me vlerë të shtuar, përmes një tregu rajonal më të harmonizuar dhe më të parashikueshëm.

Sipas ministres Ibrahimaj, ky është momenti që CEFTA të kalojë në një moment tjetër të rëndësishëm, duke theksuar përkushtimin e Shqipërisë për ta çuar përpara këtë proces në frymën e integrimit europian dhe të zhvillimit të përbashkët ekonomik të rajonit.

Euro prek minimumin e ri historik

Posted on by Drin Reçica

Kursi i këmbimit mes Euros dhe Lekut e ka nisur muajin dhjetor me një rënie të lehtë, përcjell albinfo.ch.

Madje, ditën e mërkurë kursi shënuar një minimum të ri historik, duke prekur nivelin e 96.59 lekëve.

Kjo vlerë përfaqëson një rënie shumë të lehtë nga minimumi i mëparshëm prej 96.6 lekësh, që ishte regjistruar në tetor të këtij viti.

Ndërkohë 0.93CHF janë barabartë më 1 euro, dhe 1.17 dollarë barabartë më 1 euro.

Rita Ora shkëlqen në British Fashion Awards me një paraqitje mahnitëse

Posted on by Drin Reçica

Rita Ora ishte një nga emrat më të komentuar të mbrëmjes në tapetin blu të Fashion Awards të hënën, duke tërhequr vëmendjen e të gjithëve me paraqitjen e saj mbresëlënëse. Këngëtarja u shfaq me një fustan argjendi jashtëzakonisht të guximshëm, që theksonte linjat e saj elegante dhe përmbante një dekolte të thellë, duke i dhënë veshjes një dozë të fortë dramatizmi, transmeton albinfo.ch.

Me një stil modern dhe plot vetëbesim, Rita kompletoi look-un e saj me flokë të kapura mbrapa dhe grim të punuar me kujdes nga Charlotte Tilbury, teksa pozonte para fotografëve në Royal Albert Hall.

Këtë vit ceremonia u moderua nga aktori Colman Domingo, i cili shfaqi respekt për traditën e eventit duke u paraqitur me një veshje nga Burberry.

British Fashion Awards mbetet një ndër mbrëmjet më prestigjioze të industrisë së modës, ku vlerësohen talentet më të mëdha — nga stilistët e rinj e deri te ikonat e njohura ndërkombëtare. E themeluar në vitin 1989, ceremonia ndryshoi emrin në vitin 2016 për të pasqyruar dimensionin e saj global. Ajo është zhvilluar ndër vite në hapësirat më të famshme të Londrës, përfshirë Royal Albert Hall, Muzeun e Historisë Natyrore dhe Victoria & Albert Museum.

Nga Princeshë Diana, Spice Girls e deri te Vivienne Westwood dhe Karl Lagerfeld, tapeti i këtij eventi ka pritur figura historike të modës dhe kulturës botërore./Albinfo.ch.

Berlin: Koncerti për nder të 113-vjetorit të Pavarësisë së Shqipërisë

Posted on by Drin Reçica

Me rastin e 113-vjetorit të Pavarësisë së Shqipërisë, Ambasada e Republikës së Shqipërisë në Gjermani organizoi më 27 nëntor 2025 një koncert të veçantë klasik me moton “Këngë solemne për miqësinë”, në ambientet prestigjioze të Tischlerei, Deutsche Oper Berlin, transmeton albinfo.de.

Ky aktivitet muzikor i veçantë synoi të festonte miqësinë dhe lidhjet kulturore mes Shqipërisë dhe Gjermanisë, duke prezantuar një përzgjedhje të veprave të mëdha klasike, nga Wagner, deri te tingujt tradicionalë shqiptarë.

Koncerti u hap me përshëndetjen e Ambasadores së Shqipërisë në Gjermani, Adia Sakiqi, dhe pati pjesëmarrjen e përfaqësuesve të institucioneve gjermane, trupit diplomatik dhe komunitetit shqiptar në Gjermani.

Performancat e mbrëmjes përfshinë zërin magjepsës dhe plot shprehësi të sopranos ndërkombëtare Ana Naqe, pianisten e talentuar të Deutsche Oper Berlin Elda Laro, violinistin e Deutsches Symphonie-Orchester Daniel Vlashi dhe saksofonistin virtuoz Zija “Bushi” Bejleri. Koncerti u moderua nga aktorja shqiptare në Berlin, Ema Ndoja, e cila gjithashtu solli emocione të veçanta përmes recitimeve të saj.

Mbrëmja solli një udhëtim emocionues në trashëgiminë artistike shqiptare dhe klasike, duke theksuar rolin e artit si urë bashkimi mes dy vendeve. Ambasada shprehu falënderime të veçanta për artistët që e bënë këtë koncert një përvojë të paharrueshme./Albinfo.de

📸 Photo credits: Mimoza Veliu

Shqiptarja nga Maqedonia e Veriut gjendet e vrarë në Itali, bashkëshorti në kërkim

Posted on by Alb

Një grua 50-vjeçare me origjinë shqiptare nga Maqedonia e Veriut është gjetur e vdekur në banesën e saj në provincën Ankona, Itali. Autoritetet dyshojnë se ajo mund të jetë vrarë nga bashkëshorti i saj, i cili aktualisht është në arrati.

Sadjide M. kishte raportuar më parë dhunë nga bashkëshorti, Nazif M., i cili ishte arrestuar edhe në prill të këtij viti pas një episodi tjetër dhune. Forcat e karabinierisë gjetën gruan të shtrirë në shtrat, me shenja dhune të dukshme.

Autoritetet e kanë shpallur në kërkim Nazif M., ndërsa hetimet për rrethanat e vdekjes janë në vazhdim.