Komisioni Qendror i Zgjedhjeve ka publikuar rezultatet e balotazhit të 9 nëntorit në komunat e Kosovës, ku shumica e vendvotimeve janë tashmë të numëruara. Sipas të dhënave, partitë kryesore kanë shpallur fituesit e tyre në disa nga komunat më të mëdha, transmeton albinfo.ch.

Ja fituesit dhe përqindjet e votave në komunat e Kosovës:

• Prishtina: LDK – Përparim Rama 51,54% (46,935 vota) | VV – Hajrulla Çeko 48,46% (44,126 vota)
• Mitrovica: VV – Faton Peci 53,53% (17,542 vota) | PDK – Arian Tahiri 46,47% (15,228 vota)
• Vushtrri: PDK – Ferit Idrizi 54,27% (14,427 vota) | VV – Sylejman Meholli 45,73% (12,158 vota)
• Obiliq: VV – Halil Thaçi 51,09% (6,441 vota) | LDK – Xhafer Gashi 48,91% (6,167 vota)
• Fushë Kosovë: VV – Valon Prebreza 54,99% (10,583 vota) | LDK – Besnik Osmani 45,01% (8,664 vota)
• Pejë: LDK – Gazmend Muhaxheri 60,93% (19,259 vota) | VV – Taulant Kelmendi 39,07% (12,347 vota)
• Klina: AAK – Zenun Elezaj 58,02% (8,084 vota) | PDK – Sokol Bashota 41,98% (5,849 vota)
• Junik: LDK – Ruzhdi Shehu 55,92% (1,426 vota) | AAK – Agron Kuçi 44,08% (1,124 vota)
• Gjakovë: AAK – Ardian Gjini 56,03% (17,024 vota) | VV – Ardian Gola 43,97% (13,362 vota)
• Rahovec: AAK – Smajl Latifi 52,47% (8,308 vota) | VV – Ali Dula 47,53% (7,526 vota)
• Suharekë: AAK – Bali Muharremaj 55,60% (11,640 vota) | LDK – Ardian Shala 44,40% (9,295 vota)
• Prizren: PDK – Shaqir Totaj 53,89% (25,180 vota) | VV – Artan Abrashi 46,11% (21,545 vota)
• Dragash: LDK – Bexhet Xheladini 58,45% (6,106 vota) | PDK – Shaban Shabani 41,55% (4,340 vota)
• Gjilan: VV – Alban Hyseni 61,06% (22,269 vota) | LDK – Arbër Ismajli 38,94% (14,203 vota)
• Viti: LDK – Sokol Haliti 50,60% (8,352 vota) | VV – Arsim Ademi 49,40% (8,155 vota)
• Kaçanik: PDK – Sabedin Vishi 51,86% (7,548 vota) | VV – Jeton Raka 48,14% (7,006 vota)

Kandidati i Lidhjes Demokratike të Kosovës për kryetar të Komunës së Obiliqit, Xhafer Gashi, ka vendosur të japë dorëheqje nga partia pas humbjes në balotazh.

“Faleminderit të gjithëve që na keni mbështetur dhe edhe atyre që nuk mundën të jenë të pranishëm. Edhe pse kemi përpjekur të organizohemi mirë, ndoshta nuk ia dolëm për shkak se dikush mund të ketë ndërhyrë. Si kryetar i degës së LDK-së në Obiliq, e marr plotësisht përgjegjësinë për këtë rezultat dhe jap dorëheqje nga Këshilli i Përgjithshëm, nga kryesia e partisë dhe nga pozita e kryetarit të nëndegës”, deklaroi Gashi pas humbjes.

Ai u mund nga kandidati i Lëvizjes Vetëvendosje, Halil Thaçi.

Gashi ka qenë më parë pjesë e Aleancës për Ardhmërinë e Kosovës dhe ka udhëhequr Obiliqin për dy mandate.

Kryetari i Aleancës për Ardhmërinë e Kosovës, Ramush Haradinaj, ka uruar qytetarët për zhvillimin e zgjedhjeve të lira dhe të rregullta që u mbajtën sot. Ai falënderoi institucionet përgjegjëse për organizimin e procesit zgjedhor.

Haradinaj gjithashtu përgëzoi fituesit në disa komuna, duke përmendur Suharekën për fitoren e Bali Muharremajt, Rahovecin për Smajl Latifin, Gjakovën për Ardian Gjinin, dhe Klinën për Zenun Elezajn.

Sipas tij, Aleanca ka arritur të fitojë të gjitha komunat ku ka qeverisur, duke e cilësuar këtë rezultat si një përgjegjësi të madhe për të ardhmen. “I lus kryetarët që të punojnë për të shpërblyer besimin e qytetarëve me punën më të mirë të mundshme”, theksoi ai.

Haradinaj gjithashtu nënvizoi rritjen e besimit të qytetarëve për Aleancën në nivel nacional.

Lëvizja Vetëvendosje ka nisur festën në Mitrovicë. Sipas të dhënave të fundit nga KQZ-ja, nga 101 vendvotime të përpunuara nga 105 gjithsej, kandidati i VV-së, Faton Peci, ka marrë 53,57% të votave ose 17,192 vota, ndërsa kandidati i Partisë Demokratike të Kosovës, Arian Tahiri, ka marrë 46,43% të votave ose 14,900 vota.

Numërimi i votave është 96% i përfunduar dhe VV-ja e konsideron këtë rezultat si shenjë të fitore së ardhshme në komunën e Mitrovicës.

Partia Demokratike e Kosovës (PDK) ka shpallur fitore në garën për kryetar të komunës së Prizrenit, me kandidatin e tyre Shaqir Totaj. Sipas të dhënave të PDK-së, Totaj ka marrë shumicën e votave të përpunuara, duke u renditur mbi kandidatin e Lëvizjes Vetëvendosje!, Artan Abrashi.

Fitoren e shpalli kryetari i PDK-së, Memli Krasniqi, i cili tha: “Shaqir Totaj do të jetë kryetar i të gjithë qytetarëve pa dallim. Kjo ishte një betejë e rëndësishme për PDK-në. Falënderoj të gjithë për punën dhe mbështetjen, dhe ju garantoj se Prizreni do të vazhdojë të transformohet dhe do t’i bëjë krenarë jo vetëm qytetarët e Prizrenit, por gjithë Kosovën.”

Lidhja Demokratike e Kosovës (LDK) ka shpallur fitore në balotazhin për kryetar të Prishtinës. Sipas të dhënave të LDK-së, kandidati i tyre, Përparim Rama, ka marrë mbi 51% të votave, duke siguruar sipas tyre, shumicën ndaj kundërkandidatit Hajrulla Çeku nga Lëvizja Vetëvendosje.

Lumir Abdixhiku, kryetar i LDK-së, së bashku me Përparim Ramën, njoftuan rezultatin dhe e shpallën fitoren. Në fjalimin e tij, Abdixhiku tha:

“Lidhja Demokratike e Kosovës sot ka fituar. Kemi fituar me ndershmëri, qytetari, punë dhe përkushtim. Sot LDK shpall fitoren në kryeqytet. Përparim Rama do të jetë kryetar për 4 vitet e ardhshme në Prishtinë.”

Abdixhiku ftoi qytetarët që të marrin pjesë në festën e madhe që do të mbahet sonte nga ora 21:30 në Sheshin Ibrahim Rugova.

Kryetari i Komunës së Gjilanit, Alban Hyseni, ka shpallur fitoren në zgjedhjet e sotme. Përmes një njoftimi në rrjete sociale, ai ka ftuar qytetarët të bashkohen në festën e fitores, e cila do të mbahet në orën 21:30, te Teatri i Qytetit.

“Gjilan, të dua me zemër! Shihemi në festën e fitores në orën 21:30 te Teatri i Qytetit. Bashkë!” ka shkruar Hyseni.

Komisioni Qendror i Zgjedhjeve (KQZ) ka nisur numërimin e votave për balotazhin e zgjedhjeve lokale, dhe rezultatet e para tregojnë epërsi për kandidatët e Lëvizjes Vetëvendosje në disa komuna dhe për LDK-në dhe PDK-në në të tjera.

Rezultatet paraprake sipas komunave

Prishtinë

Përparim Rama (LDK) – 6,336 vota (51,20%)

Hajrulla Çeko (LVV) – 6,039 vota (48,80%)

Mitrovicë e Jugut

Faton Peci (LVV) – 100 vota (54,05%)

Arian Tahiri (PDK) – 85 vota (45,95%)

Gjilan:

Alban Hyseni (LVV) – 1,661 vota (59,53%)

Arbër Ismajli (LDK) – 1,129 vota (40,47%)

Pejë

Gazmend Muhaxheri (LDK) – 9,450 vota (62,27%)

Taulant Kelmendi (LVV) – 5,725 vota (37,73%)

Prizren:

Shaqir Totaj (PDK) – 8,384 vota (61,35%)

Artan Abrashi (LVV) – 5,281 vota (38,65%)

Në balotazhin e zgjedhjeve lokale të mbajtur sot në Kosovë, pjesëmarrja e përgjithshme ka arritur në 31,84 për qind, sipas të dhënave të Komisionit Qendror të Zgjedhjeve (KQZ).
Nga 1,316,672 votues me të drejtë vote, kanë marrë pjesë gjithsej 419,253 qytetarë, ndërsa janë procesuar 95,76 për qind e vendvotimeve në nivel vendi.

Në krahasim me raundin e parë të zgjedhjeve lokale, pjesëmarrja ka shënuar rënie në shumicën e komunave ku është zhvilluar balotazhi për kryetarë, transmeton albinfo.ch.

Pjesëmarrja sipas komunave

• Mamushë – 67,45% (krahasuar me 69,40% në raundin e parë)
• Junik – 52,92% (51,98%)
• Obiliq – 48,97% (49,16%)
• Kaçanik – 42,16% (47,84%)
• Prishtinë – 41,11% (48,12%)
• Mitrovicë e Jugut – 39,53% (38,77%)
• Fushë Kosovë – 37,21% (42,25%)
• Vushtrri – 34,92% (40,08%)
• Gjilan – 33,41% (41,81%)
• Suharekë – 29,58% (38,35%)
• Viti – 29,39% (39,74%)
• Kllokot – 26,88% (54,22%)
• Dragash – 26,57% (31,79%)
• Pejë – 26,56% (34,46%)
• Rahovec – 25,06% (34,07%)
• Klinë – 24,14% (35,26%)
• Prizren – 23,81% (31,25%)
• Gjakovë – 23,72% (33,18%)

Komunat me pjesëmarrjen më të lartë dhe më të ulët

Pjesëmarrjen më të lartë e ka shënuar Komuna e Mamushës me 67,45 për qind, ndërsa më të ulëtën Gjakova me 23,72 për qind.
Në disa komuna si Juniku dhe Mitrovica e Jugut është vërejtur një rritje e lehtë krahasuar me raundin e parë, ndërsa pjesa tjetër e komunave ka shënuar ulje të dukshme në dalje.

Procesi i votimit dhe numërimi

Procesi i votimit është zhvilluar në mënyrë të qetë, ndërsa sipas KQZ-së, rezultatet përfundimtare pritet të publikohen pas përfundimit të numërimit të votave me kusht dhe atyre të personave me nevoja të veçanta.

Janë publikuar rezultatet e para të exit poll-it nga PIPOS, të realizuar për Klan Kosovën, pas mbylljes së qendrave të votimit në balotazhin e zgjedhjeve lokale në Kosovë.

Sipas exit poll-it të parë të PIPOS, rezultatet janë këto:

Në Prishtinë, Përparim Rama i LDK-së prin me 53.62% të votave.

Në Prizren, Shaqir Totaj i PDK-së udhëheq me 55.14%.

Në Fushë Kosovë, Valon Prebreza i VV-së del i pari me 53.45%.

Në Gjilan, Alban Hyseni nga VV prin bindshëm me 60.4%.

Në Pejë, Gazmend Muhaxheri i LDK-së udhëheq me 57.72%.

Në Gjakovë, Ardian Gjini i AAK-së ruan epërsinë me 57.2%.

Ndërsa në Mitrovicë, Arian Tahiri i PDK-së del i pari me 50.34%.

Bazuar në këto rezultate paraprake, LDK pritet të fitojë në Prishtinë dhe Pejë, VV në Gjilan dhe Fushë Kosovë, PDK në Prizren dhe Mitrovicë, ndërsa AAK mban Gjakovën.

Këto janë ende të dhëna paraprake nga exit poll-i dhe nuk përfaqësojnë rezultatin zyrtar të Komisionit Qendror të Zgjedhjeve. Rezultatet përfundimtare pritet të publikohen gjatë natës ose gjatë ditës së nesërme.

Kryeministri në detyrë i Kosovës, Albin Kurti ka përsëritur thirrjen që të gjithë qytetarët me të drejtë vote, të dalin e të votojnë.

“Të dashur qytetarë, këtu nga Kodra e Trimave, në këto orët e fundit të mbetura të kësaj dite të rëndësishme, ju ftoj që të dilni e të votoni.”, ka thënë ai, transmeton albinfo.ch.

Ndryshe, Komisioni Qendror i Zgjedhjeve ka njoftuar se 27.55 për qind është pjesëmarrja në zgjedhje deri në orën 17:00 nga rreth 96 për qind e vendvotimeve të procesuara.

Komisioni Qendror i Zgjedhjeve ka njoftuar se 27.55 për qind është pjesëmarrja në zgjedhje deri në orën 17:00 nga rreth 96 për qind e vendvotimeve të procesuara.

KQZ ka bërë të ditur se deri dy orë para mbylljes së vendvotimeve, 364,203 persona kanë votuar nga 1 milionë e 316 mijë e 672 votues të regjistruar, transmeton albinfo.ch.

Gjatë tërë ditës është evidentuar pjesëmarrje e ulët në zgjedhje, sidomos krahasuar me rundin e parë të zgjedhjeve, i cili ishte mbajtur më 12 tetor.

Bëhet e ditur se deri në orën 17:00, më 12 tetor patën votuar 33 për qind e qytetarëve me të drejtë vote.