Mesfushori i Zvicrës, Granit Xhaka, ka folur për synimet e ekipit kombëtar për Kupën e Botës 2026, që këtë vit mbahet në SHBA, Meksikë dhe Kanada. Ai ka theksuar se skuadra do të përqendrohet në ndeshje të veçanta dhe nuk dëshiron të bëjë parashikime të largëta, transmeton albinfo.ch.

“Ndeshja kundër Portugalisë në të tetën e finales të Botërorit 2022 është harruar prej kohësh. Ne po shohim përpara dhe kemi një ekip të shkëlqyer. Patëm një fushatë shumë të mirë kualifikuese dhe duam të luajmë mirë në Kupën e Botës. Nëse arrijmë në çerekfinale apo më tej, do t’i marrim ndeshjet një nga një”, tha Xhaka gjatë konferencës për media para ndeshjes miqësore kundër Gjermanisë, e cila do të zhvillohet të premten në Basel nga ora 20:45.

Pas miqësoreve ndaj Gjermanisë, Zvicra do të luajë kundër Norvegjisë më 31 mars në Oslo dhe më pas ndaj Jordanisë në maj, përpara përfundimit të përgatitjeve për ndeshjet e Grupit B në Botëror. Në këtë grup, Zvicra do të përballet me Katarin dhe Kanadën, ndërsa nga plejofi mund të bashkohen Italia, Uellsi, Bosnjë-Hercegovina ose Irlanda e Veriut.

Përzgjedhësi i Zvicrës, Murat Yakin, tha: “Ne duam të luajmë Kupën e Botës më të mirë të të gjitha kohërave. Kemi një skuadër të mirë dhe treguam se çfarë mund të bëjmë në kualifikuese”. Zvicra përfundoi në vendin e parë të grupit kualifikues, ndërsa Kosova u rendit e dyta.

Xhaka gjithashtu foli për rikthimin e tij pas një lëndimi të lehtë në tendinin e Akilit. “Jam i lumtur që jam kthyer në fushë. Kur luan për vendin tënd, nuk duhet të shohësh asnjë ndeshje si miqësore, çdo rezultat i mirë na jep besim”, shtoi kapiteni i Sunderlandit.

Ai vlerësoi edhe mesfushorin shqiptar, Ardon Jashari, duke e quajtur një lojtar të veçantë që mund të sjellë shumë përvojë, sidomos pas transferimit të tij te Milani.

Zvicra dhe Gjermania kanë një histori të fortë përballjesh kohët e fundit, me katër ndeshje të fundit pa humbje për helvetikët, një fakt që i jep optimizëm Xhakës për miqësoren e ardhshme në Basel, qytetin e tij të lindjes./Albinfo.ch

Pas humbjes dramatike me rezultat 4:3 ndaj Kosovës, portieri i Sllovakisë, Martin Dubravka, ka pranuar se ekipi i tij nuk arriti të përballojë intensitetin dhe ritmin e lartë të “Dardanëve”, sidomos në pjesën e dytë të ndeshjes, përcjell albinfo.ch.

Sllovakia e mbylli pjesën e parë me epërsi 2:1, duke lënë përshtypjen se kishte kontroll mbi rrjedhën e lojës. Megjithatë, gjithçka ndryshoi pas pushimit, kur Kosova u rikthye fuqishëm, përmbysi rezultatin dhe siguroi një fitore historike në Bratislavë, duke kaluar në finalen e “play-offit” për Botërorin 2026.

Intensiteti i lartë, presioni i vazhdueshëm dhe efikasiteti i Kosovës në fazën sulmuese bënë diferencën në momentet vendimtare të sfidës.

Në deklaratën e tij pas ndeshjes, Dubravka nuk e fshehu zhgënjimin, duke e cilësuar pjesën e dytë si shumë larg nivelit që kërkohet në një ndeshje të tillë.

“Ne patëm një pjesë të parë shumë të mirë, por pjesa e dytë ishte vërtet e keqe. Pasi Kosova barazoi sërish, ne nuk arritëm ta mbanim ritmin me të”, ka deklaruar Dubravka.

Ai shtoi se kjo humbje do t’i mbetet gjatë në mendje, veçanërisht për faktin se për lojtarët më të vjetër kjo ishte një nga mundësitë e fundit për të ëndërruar Botërorin.

“Jam i trishtuar, do të më mbetet peng për një kohë të gjatë. Për ne lojtarët më të vjetër, ishte një nga rastet tona të fundit për të luajtur në Kupën e Botës. Por ky është realiteti”, u shpreh ai.

Kosova, ndërkohë, do të luajë të martën në Prishtinë finalen vendimtare të “play-offit” ndaj Turqisë, për një vend në Kampionatin Botëror 2026./Albinfo.ch.

Kombëtarja e Kosovës po vazhdon të shkruajë histori në futbollin ndërkombëtar, pas fitores së madhe ndaj Sllovakisë në gjysmëfinalen e “play-offit” për kualifikim në Kupën e Botës 2026, përcjell albinfo.ch.

“Dardanët” triumfuan në udhëtim në Bratisllavë me rezultat 4:3, duke siguruar kalimin në finalen vendimtare të play-offit dhe duke u afruar vetëm një hap larg kualifikimit historik në Kampionatin Botëror.

Ky sukses i Kosovës ka marrë vëmendje edhe në mediat ndërkombëtare. Gazeta e njohur spanjolle “Marca” i ka kushtuar një artikull të veçantë fitores së Kosovës, duke e cilësuar rrugëtimin e saj si të jashtëzakonshëm.

“Kosova, një nga shtetet më të reja në botë dhe që nuk njihet nga Spanja, e mposhti Sllovakinë dhe do të luajë finalen për një vend në Kupën e Botës kundër Turqisë. FIFA e njohu si përfaqësuese zyrtare… më pak se 10 vite më parë!”, ka shkruar “Marca”.

Tani, Kosovës i mbetet vetëm ndeshja finale, e cila do të zhvillohet të martën në stadiumin “Fadil Vokrri” në Prishtinë, ku “Dardanët” do të përballen me Turqinë.

Turqia në gjysmëfinale eliminoi Rumaninë me rezultat minimal 1:0, ndërsa përballja në Prishtinë pritet të jetë vendimtare për një vend në Botërorin 2026. /Albinfo.ch

Kombëtarja e Kosovës ka shënuar një fitore historike ndaj Sllovakisë, duke siguruar kualifikimin në finalen e “play-offit” për Kampionatin Botëror 2026, përcjell albinfo.ch.

“Dardanët” triumfuan të enjten mbrëma në Bratisllavë me rezultat 4:3, në një ndeshje dramatike që i afroi edhe më shumë drejt ëndrrës për pjesëmarrje në Botëror.

Pas këtij suksesi të madh, reagimi nuk ka munguar as nga FIFA. Faqja zyrtare e Kupës së Botës ka publikuar një postim në platformën “X”, duke vlerësuar rrugëtimin e Kosovës dhe duke e cilësuar atë vetëm një hap larg kualifikimit.

“Vetëm edhe një hap për Kosovën, për t’u kualifikuar në Botëror”, thuhet në postimin e FIFA World Cup në “X”.

Kosova tani do ta zhvillojë ndeshjen finale të play-offit të martën mbrëma në stadiumin “Fadil Vokrri”, ku do të përballet me Turqinë për një vend në Kampionatin Botëror 2026./Albinfo.ch

Përzgjedhësi i Kombëtares së Kosovës, Franco Foda, ka vlerësuar lart paraqitjen e “Dardanëve” pas fitores dramatike ndaj Sllovakisë me rezultat 4:3, në gjysmëfinalen e play-offit për kualifikim në Kupën e Botës, përcjell albinfo.ch.

Në konferencën për media pas ndeshjes, Foda përgëzoi futbollistët për besimin dhe luftën deri në fund, duke theksuar se fitorja ishte e merituar.

“Dua ta falënderoj skuadrën për përfaqësimin. Lojtarët kanë besuar për 90 minuta dhe nuk janë dorëzuar. E merituam fitoren. Sonte do të festojmë dhe që nga nesër do të përgatitemi për finale ndaj Turqisë. Kosova e meriton këtë”, deklaroi ai.

Foda komentoi edhe faktin se ndeshja prodhoi shtatë gola, duke pranuar se mbrojtja duhet analizuar me kujdes para përballjes vendimtare.

“Kemi pranuar tre gola sonte. Sonte festojmë, por nesër do të analizojmë sepse kemi marrë gola të lehtë. Duhet ta dimë se nuk mund të shënojmë çdo ndeshje katër gola”, u shpreh ai.

Ai foli edhe për atmosferën që pritet të martën në stadiumin “Fadil Vokrri”, ku Kosova do ta luajë finalen ndaj Turqisë, duke thënë se interesi i tifozëve është jashtëzakonisht i madh.

“Të martën luajmë ndeshje finale. Do të jenë 13 mijë persona, por po të kishim një stadium me 100 mijë ulëse do të mbushej i tëri. Jemi afër të shkruajmë historinë, por duhet ta ruajmë qetësinë në këtë ndeshje kaq të madhe kundër Turqisë”, tha Foda, duke shtuar se populli kosovar është shumë emocional dhe kjo vërehet edhe tek lojtarët në fushë.

Trajneri gjerman tregoi gjithashtu se në pushimin mes pjesëve ka kërkuar më shumë qetësi dhe ka bërë disa ndryshime taktike që, sipas tij, ndikuan pozitivisht në rikthimin e Kosovës.

“Fillimisht kam kërkuar nga ta të ruajnë qetësinë dhe kam kërkuar dy ndryshime taktike. Mendoj se në pjesën e dytë bëmë më mirë dhe rikthyem rezultatin. Nuk kemi qenë keq në aspektin e lojës dhe e dëshmuam edhe një herë se jemi skuadër që mund të rikthejmë rezultate”, theksoi Foda.

Kosova tani është vetëm një hap larg kualifikimit historik, ndërsa finalja ndaj Turqisë pritet të zhvillohet të martën në Prishtinë./Albinfo.ch

Gjykata Federale ka vendosur se ndalimi i demonstratës në autostradë në Lausanne në prill 2024 shkelte lirinë e tubimit, shprehjes dhe informacionit. Demonstrata ishte planifikuar midis La Bourdonnette dhe La Maladière dhe kishte për qëllim të shprehë kundërshtimin ndaj zgjerimit të disa seksioneve të autostradës.

Shoqata për Transportin dhe Mjedisin (ATE) kishte apeluar vendimin e Zyrës Federale të Rrugëve (FEDRO), i cili ishte konfirmuar më parë nga Gjykata Administrative Federale. Pesë gjyqtarë të Gjykatës Federale arritën në përfundimin se ndalimi kishte shkelur parimin e proporcionalitetit dhe se demonstrata kishte një ndikim të rëndësishëm publik dhe politik.

Gjykata vuri në dukje se vendndodhja e demonstratës nuk është e parëndësishme dhe se trafiku i lartë nuk mund të justifikojë ndalimin. Për më tepër, prania e një klinike pranë vendit të ngjarjes nuk e bën të pamundur organizimin e saj.

Megjithatë, Gjykata konfirmoi ligjshmërinë e sistemit të autorizimit paraprak për demonstrata, duke mos cenuar lirinë e tubimit. Demonstrata ishte planifikuar të përkonte me përvjetorin e 60-të të seksionit të autostradës Lausanne–Gjenevë.

Në minutën e 72-të, Kreshnik Hajrizi ka shënuar golin e katërt për Kosovën, duke thelluar avantazhin në 4:2 ndaj Sllovakisë Pas golit të shpejtë të Besnik Asanit dhe të Florent Muslisë, ky moment ka ndezur stadiumin dhe tifozët dardanë, duke dhënë një ndjenjë krenarie dhe triumfi për ekipin e Kosovës.

Loja po vazhdon të jetë dramatike, por tani Kosova kontrollon ndeshjen dhe po i afrohet një fitoreje të rëndësishme në kualifikimet për Kupa e Botës 2026.

Pas një gjysme të parë dramatike, ku Sllovakia kishte shkuar në pushim me avantazh 2:1 dhe Kosova kishte rikthyer barazimin qysh në minutën e 47 me golin e Besnik Asanit, Florent Muslia ka shënuar në minutën e 59, duke kaluar Kosovën në avantazh 3:2.

Loja po vazhdon me tension të madh ku çdo pasim dhe çdo përpjekje e të dyja ekipeve mund të ndryshojë rezultatin.