Sonte në Korneuburg të Austrisë, do të zhvillohet mbrëmja e boksit “Boxen in Korneuburg”, nën organizimin e Timy Shala (Simba Sports Boxing) dhe mbikëqyrjen e Federatës Austriake të Boksit.
Në mesin e shumë dueleve, vërehen dy përballje kryesore: kampioni në kategorinë superwelterweight, Dielli Vranoci, do të përballet me Ahmet Simsek, transmeton albinfo.at.
Në anën tjetër Bernardin Jakaj do të sfidojë Michel Marcano, në një duel që pritet të jetë ndër më të fortët e mbrëmjes.
Presidenti ukrainas Volodymyr Zelensky nuk arriti të siguronte raketat Tomahawk për sulmet ndaj Rusisë nga takimi me presidentin amerikan, Donald Trump, i cili u bëri thirrje të dyja palëve të ndërpresin luftimet dhe të pranojnë linjat aktuale të betejës.
Gjatë fjalës hapëse në një drekë në Shtëpinë e Bardhë, Trump shprehu shpresën për të zgjidhur luftën “pa menduar për Tomahawk”, duke shtuar se arma është një armë që Amerikës “i duhet”, transmeton albinfo.ch.
Zelensky e ka përshkruar takimin si produktiv, por nuk ka komentuar mbi raketat Tomahawk sepse SHBA-të “nuk duan përshkallëzim”.
Nga ana tjetër, Trump bëri një thirrje publike për Kievin dhe Moskën që të “ndalojnë luftën menjëherë”.
“Të dyja palët duhet të shkojnë në shtëpi, të shkojnë te familjet e tyre, të ndalojnë vrasjet. Dhe kjo duhet të jetë e gjitha”, tha ai.
Me një karrierë mbi 25-vjeçare në financat zvicerane, kryesisht në bankat e mëdha, Bekim Laski ka marrë vendimin të vazhdojë rrugëtimin e tij profesional në kompaninë e re dhe të pavarur smzh AG.
Në një intervistë për albinfo.ch, ai flet si CIO & Partner në smzh AG, për përvojat nga bankat e mëdha, besimin në menaxhimin e pasurisë, rolin e emocioneve në investime si dhe vizionin e tij për ta bërë investimin të qasshëm për të gjithë.
albinfo.ch: Z. Laski, ju keni mbi 25 vite përvojë në botën financiare, shumicën prej tyre në mjedisin e bankave të mëdha. Çfarë ju shtyu të bëni hapin drejt një kompanie si smzh AG?
Bekim Laski: Më ka tërhequr strategjia e orientuar drejt së ardhmes e smzh AG, potenciali mbresëlënës i rritjes dhe vullneti për diferencim të vërtetë. Sidomos më ka bindur filozofia e qasjes “Family Office Light”, e cila shkon përtej këshillimit klasik financiar dhe e sheh pasurinë në tërësi, nga investimet, te pasuritë e paluajtshme, tatimet, pensionet e deri te trashëgimia. Njëkohësisht, mundësia për të marrë pjesë aktive në zhvillimin e një ofruesi të pavarur financiar tek unë ka zgjuar energji sipërmarrëse.
Gjatë kohës sime në bankat e mëdha kam vlerësuar përparësitë e strukturave të fuqishme dhe burimeve të gjera. Në smzh AG çmoj fleksibilitetin, inovacionin dhe frymën sipërmarrëse për të zhvilluar së bashku me një ekip të përkushtuar zgjidhje të reja për një klientelë të larmishme. Ky kombinim unik më motivoi të ndërmarr këtë hap.
albinfo.ch: Cila është njohja më e rëndësishme që keni fituar nga karriera juaj në bankat e mëdha?
Bekim Laski: Jam i bindur se në botën financiare, sidomos në menaxhimin e pasurisë, njeriu nuk i mbaron kurrë mësimet. Zhvillimi i vazhdueshëm dhe hapja ndaj njohurive të reja e mbajnë punën tonë dinamike dhe me vlerë. Por mbi të gjitha, kam mësuar se suksesi i qëndrueshëm nuk vjen vetëm nga produktet apo performanca afatshkurtër. Vlera e vërtetë krijohet përmes kuptimit të thellë të nevojave individuale, ndërtimit të marrëdhënieve afatgjata dhe një besimi të bazuar në transparencë, integritet dhe pavarësi.
albinfo.ch: A ka pasur një moment vendimtar që ju ka ndryshuar thelbësisht qasjen ndaj menaxhimit të pasurisë?
Bekim Laski: Një nga momentet vendimtare ka qenë kuptimi se shumë klientë, në kuadër të bankave tradicionale, shpesh nuk ndihen të kuptuar ose nuk perceptohen si individë. Kjo më bëri të kuptoj rëndësinë e këshillimit gjithëpërfshirës dhe të orientuar tek klienti: nuk mjafton të shesësh produkte investimi, por duhet të marrësh parasysh të gjitha aspektet e pasurisë, synimet personale dhe rrethanat jetësore, për të krijuar zgjidhje të personalizuara dhe me kuptim.
Një tjetër moment i rëndësishëm për mua ka qenë roli në rritje i punës në ekip dhe qasjes ndërdisiplinore. Vetëm duke bashkuar ekspertë nga fusha të ndryshme mund të krijohet sukses afatgjatë për klientët.
albinfo.ch: Ju shpesh theksoni: “Vlera e lartë e pasurisë nuk ka rëndësi, qartësia po”, Çfarë do të thotë kjo në praktikë për një klient që kërkon menaxhim pasurie?
Bekim Laski: Kjo do të thotë se nuk ka rëndësi vlera absolute e pasurisë, por cilësia dhe struktura e portofolit. Edhe me kapital fillestar të kufizuar sot mund të ndërtohet një portofol i diversifikuar profesionalisht që i përshtatet objektivave dhe profilit të rrezikut të individit. smzh AG ofron qasje në zgjidhje të tilla duke filluar nga disa qindra franga, por me cilësi këshillimi në nivel Family Office. Qartësia do të thotë që çdo klient të kuptojë qartë si është ndërtuar portofoli i tij, cilat janë rreziqet dhe si mund të arrihen qëllimet personale, pavarësisht vlerës së lartë të pasurisë.
albinfo.ch: Sa e rëndësishme është qartësia në komunikim me klientët, sidomos në një botë financiare që shpesh shihet si komplekse dhe e paqartë?
Bekim Laski: Qartësia është thelbësore. Besimi lind vetëm kur klienti kupton. Ne e shohim veten si përkthyes mes botës financiare dhe realitetit të përditshëm të klientëve tanë. Vendosim theksin tek shpjegimi i thjeshtë i temave komplekse dhe tek një komunikim i hapur e i kuptueshëm. Vetëm kështu ndërtohet partneritet i vërtetë.
Sfida është të përshtatemi me një klientelë shumë heterogjene: disa duan analiza të detajuara dhe diskutime të gjata, ndërsa gjenerata digjitale kërkon përmbajtje të shpejta, të qarta dhe interaktive. Gjetja e balancës së duhur është prioriteti ynë.
albinfo.ch: Paqëndrueshmëria (Volatiliteti) është një nga temat më të diskutuara në tregjet financiare sot. Për ju personalisht, a është më shumë rrezik apo mundësi?
Bekim Laski: Paqëndrueshmëria (Volatiliteti) është pjesë e natyrshme e tregjeve dhe shpreh dinamizmin e tyre. Në shikim të parë përfaqëson rrezik, por për investitorët afatgjatë hap edhe mundësi. Sekreti është të mos shihet si kërcënim, por si shoqërues i pashmangshëm i çdo strategjie investimi. Me një portofol të diversifikuar, ndarje strategjike të kujdesshme dhe menaxhim rreziku, luhatjet mund të amortizohen dhe mundësitë të shfrytëzohen. Si në sport: qëndro i qetë, vepro me disiplinë dhe mos humb nga sytë objektivin afatgjatë.
albinfo.ch: Si mund të shfrytëzojnë investitorët paqëndrueshmërinë (Volatiliteti) në favorin e tyre?
Bekim Laski: Diversifikimi optimal i portofolit është strategjia më e mirë dhe më e leverdishme për t’u mbrojtur nga paqëndrueshmëritë (Volatiliteti) në treg. Ai shpërndan rreziqet dhe amortizon luhatjet e tregut. Është thelbësore të qëndrohet i disiplinuar në ndarjen strategjike të pasurisë dhe të mos veprohet nga emocionet, sepse ato shpesh janë këshilltarë të këqij. Kush arrin të mos ndikohet nga pasiguritë afatshkurtra, fiton në afatgjatë.
Ekzistojnë edhe instrumente si fondet mbrojtëse (Hedge Funds), derivatet dhe produktet e strukturuara, që mund të përfitojnë nga lëvizjet e tregut, qoftë në rritje apo në rënie. Por duhet kujdes në përdorim dhe vlerësim të kujdesshëm të profilit të rrezikut.
albinfo.ch: Çfarë roli luan diversifikimi i portofolit në uljen e rreziqeve dhe rritjen e mundësive?
Bekim Laski: Diversifikimi është dhe mbetet themeli i çdo strategjie investimi të suksesshme. Ai shmang përqendrimet e rrezikut dhe ofron qasje në faktorë të ndryshëm rritjeje në mbarë botën. Dobësitë e disa investimeve kompensohen nga pikat e forta të të tjerave, duke ulur rreziqet dhe optimizuar mundësitë në afatgjatë.
albinfo.ch: Ju flisni për menaxhimin e pasurisë si një kombinim mes numrave dhe besimit. Si arrihet ky ekuilibër?
Bekim Laski: Menaxhimi i pasurisë nuk është vetëm analiza e numrave dhe tregjeve, por mbi të gjitha marrëdhënia e besimit mes klientit dhe këshilltarit. Numrat dhe analizat janë themeli, por vetëm të kombinuara me integritet, empati dhe komunikim të hapur krijojnë vlerë të vërtetë.
Në smzh kemi prioritet transparencën: klienti duhet të kuptojë gjithmonë arsyet pas rekomandimeve tona. Po aq e rëndësishme është të njohim situatën, qëllimet dhe vlerat e secilit individ, për të ndërtuar një strategji që frymëzon besim.
albinfo.ch: Sa e rëndësishme është ndërveprimi afatgjatë me klientët për suksesin e strategjive tuaja?
Bekim Laski: Dialogu i hapur dhe i ndershëm është themeli i çdo marrëdhënieje të suksesshme. Vetëm kështu mund të kuptojmë ndryshimet në jetën dhe prioritetet e klientëve. Kjo afërsi na lejon të përshtatim strategjitë në mënyrë dinamike dhe vizionare. Afatgjatësia është boshti kryesor që lidh çdo marrëdhënie klienti tek smzh, sepse vetëm ajo gjeneron besim dhe vlerë të qëndrueshme.
albinfo.ch: Sa rëndësi ka aspekti emocional i investimeve krahasuar me qasjen racionale?
Bekim Laski: Aspekti emocional nuk duhet nënvlerësuar. Edhe strategjia më e mirë dështon nëse nuk përputhet me bindjet dhe gatishmërinë individuale për rrezik. Emocionet si pasiguria, optimizmi apo frika i shoqërojnë të gjitha fazat e tregut dhe shpesh priren të errësojnë arsyen. Roli ynë është të ofrojmë orientim, qetësi dhe një proces vendimmarrjeje të reflektuar. Strategjia duhet të jetë në harmoni me rehatinë emocionale të klientit që të funksionojë afatgjatë.
albinfo.ch: Ju synoni ta bëni investimin të qasshëm për të gjithë. Si realizohet kjo në praktikë?
Bekim Laski: Investimi nuk duhet të jetë privilegj i pak njerëzve, por i arritshëm për secilin. Ne ofrojmë portofol të diversifikuar dhe me cilësi të lartë duke filluar nga disa qindra franga, sipas standardeve institucionale. Digjitalizimi na lejon të ulim pengesat e hyrjes, por pa e zëvendësuar këshillimin personal.
Ne synojmë të demistifikojmë investimin dhe ta bëjmë të kuptueshëm për të gjithë, pavarësisht njohurive paraprake apo pasurisë. Përmes komunikimit transparent, edukimit dhe informimit të vazhdueshëm, ne forcojmë kompetencën financiare të njerëzve.
albinfo.ch: Në një botë ku teknologjia transformon gjithçka – nga inteligjenca artificiale te platformat digjitale të investimeve – ku e shihni të ardhmen e menaxhimit të pasurisë?
Bekim Laski: E ardhmja qëndron në kombinimin inteligjent të inovacionit dhe këshillimit personal. Teknologjia do të automatizojë detyrat rutinë, do të përshpejtojë analizat dhe do të rrisë efikasitetin. Por nuk do të mund ta zëvendësojë kurrë dialogun e besueshëm dhe vlerësimin individual të situatës së jetës. Synimi ynë tek smzh është të bashkojmë më të mirën nga të dyja botët.
albinfo.ch: Nëse do të duhej ta përmblidhnit filozofinë tuaj në një fjali, si do të tingëllonte ajo?
Misioni ynë është të shoqërojmë njerëzit në mënyrë gjithëpërfshirëse dhe personale, pavarësisht nga vlera e lartë e pasurisë, në mënyrë që ata të arrijnë objektivat e tyre financiare dhe së bashku të krijojmë vlerë të qëndrueshme.
Jehona e protestës për ish-krerët e UÇK-së kapërceu kufijtë. Mijëra qytetarë që mbushën sheshin “Skënderbej” të premten pasdite në mbështetje të Hashim Thaçit, Kadri Veselit, Jakup Krasniqit dhe Rexhep Selimit, u bënë lajm në mediat më të mëdha botërore.
Associated Press, The Telegraph, New York Post dhe The Washington Post i kushtuan hapësira të gjera protestës në kryeqytetin shqiptar, duke e përshkruar atë si një demonstratë mbarëkombëtare për drejtësi dhe si një shenjë të fortë solidariteti mes shqiptarëve në rajon, përcjell albinfo.ch.
Associated Press shkruan se qytetarët u mblodhën në kryeqytetin e Shqipërisë për të protestuar kundër Gjykatës Speciale të Hagës të mbështetur nga BE, duke e cilësuar si të njëanshme, dhe që ndjek penalisht ish-luftëtarët e tyre që zhvilluan luftën e viteve 1998-1999 për pavarësi nga Serbia.
“Demonstrues nga Kosova dhe vende të tjera evropiane mbushën sheshin kryesor Skënderbej në Tiranë në mbështetje të ish-udhëheqësve të arrestuar të Ushtrisë Çlirimtare të Kosovës, ose UÇK-së — një ish-grup guerilas i shqiptarëve të Kosovës që udhëhoqi luftën për pavarësi. Shumë prej tyre mbanin flamuj kombëtarë shqiptarë dhe të UÇK-së, ndërsa një grup ish-luftëtarësh dhe disa të rinj ishin të veshur me uniforma të UÇK-së. Disa këndonin këngë për UÇK-në dhe lirinë.”, thuhet në artikull.
Mediat theksojnë gjithashtu se protesta nuk ishte politike dhe se “u organizua nga shoqata e veteranëve e njohur si OVL-UCK dhe u mbështet nga qeveria dhe kryeministri i Shqipërisë, nën moton: “Liria ka një emër. Drejtësi për çlirimtarët.”
Vihet theksi edhe te prezenca e ish-presidentit Aleksandër Moisiu.
“Alfred Moisiu, 95 vjeç, ish-presidenti i Shqipërisë, ishte gjithashtu i pranishëm dhe bëri thirrje për drejtësi, duke thënë se të pandehurit “janë ndaluar pa prova, me akuza të sajuara”.
Përmendin gjithashtu edhe numrin e shqiptarëve të vrarë gjatë luftës dhe tensionet që vijojnë ende me Serbinë. “Gjykata dhe një zyrë prokurorie e lidhur me të u krijuan pas një raporti të vitit 2011 nga Këshilli i Evropës, një organ i të drejtave të njeriut, që përfshinte akuza se luftëtarët e UÇK-së trafikuan organe njerëzore të marra nga të burgosurit dhe vranë serbë dhe bashkëqytetarë shqiptarë etnikë. Akuzat për marrjen e organeve nuk janë përfshirë në aktakuzat e lëshuara nga gjykata.
Dy ish-anëtarë të tjerë të UÇK-së janë dënuar tashmë nga gjykata. Gucati dhe një zyrtar tjetër i UÇK-së u dënuan gjithashtu nga gjykata për kërcënim të dëshmitarëve dhe pengim të drejtësisë. Rreth 11,400 njerëz, kryesisht shqiptarë etnikë, vdiqën gjatë luftës , përpara se një fushatë bombardimi e NATO-s ta detyronte Serbinë të tërhiqte trupat e saj nga Kosova dhe t’ia dorëzonte
Mediat gjermane raportojnë se një grua me origjinë nga Ballkani që jeton në Gjermani është gjobitur me 50 euro pasi kishte tharë rrobat në ballkonin e saj, duke shkaktuar debat të madh në rrjete sociale, përcjell albinfo.ch.
Rasti u bë i njohur pasi gruaja e publikoi përvojën e saj në grupin në Facebook “Balkanci in Germany”, ku tregoi se kishte marrë paralajmërim zyrtar për “mosrespektim të rregullave të banesës”.
“S’po e di më nëse më lejohet të bëj ndonjë gjë në këtë vend! Ishte ditë me diell, i lava rrobat, i vendosa në ballkon të thaheshin. Fqinja sipër filloi të bërtiste se ‘i duken keq kur i sheh poshtë’. Mendova se po bënte shaka, por tre ditë më vonë më erdhi letra me gjobën dhe paralajmërimin”, ka shkruar ajo me ironi.
Në shpjegimin e autoriteteve thuhej se “në ndërtesën përkatëse nuk lejohet që rrobat të shihen nga jashtë”. Gruaja reagoi me humor duke pyetur: “Po ku t’i thaj atëherë, në frigorifer?”
Ngjarja është bërë virale në rrjetet sociale, duke shkaktuar reagime të shumta.
Entuziazmi i zviceranëve për makinat elektrike po zbehet, përcjell albinfo.ch.
Sipas Barometrit të Lëvizshmërisë 2025 nga instituti kërkimor Sotomo, vetëm 24% e blerësve të mundshëm planifikojnë të zgjedhin një model elektrik në dy vitet e ardhshme, pothuajse e pandryshuar nga viti i kaluar dhe ndjeshëm më pak se 34% në vitin 2023.
Ndër arsyet kryesore janë çmimet e larta dhe mungesa e infrastrukturës së karikimit mbeten ndër pengesat kryesore. Pasiguria politike po ndikon gjithashtu.
Ndërkohë, vetëm 38% e qytetarëve mbështesin masa më të forta shtetërore për të promovuar elektromobilitetin, një rënie krahasuar me vitin e kaluar.
Sipas Zyrës Federale të Statistikave, automjetet vazhdojnë të shtohen. Në fund të shtatorit, në rrugët e Zvicrës qarkullonin 6.56 milionë automjete, me vetëm 5.2% plotësisht elektrike dhe 11.9% hibride. Makinat me benzinë (58.7%) dhe naftë (24%) vazhdojnë të dominojnë.
Mbrëmë në mesnatë ka hyrë në fuqi heshtja zgjedhore, e cila do të zgjasë deri në orën 19:00 të datës 19 tetor, përcjell albinfo.ch.
Pas një fushate 20-ditore, që nisi më 29 shtator, kandidatët për kryetarë komunash kanë përmbyllur paraqitjet e tyre publike dhe prezantimet e programeve para qytetarëve.
Ndërkohë, në diasporë nuk do të ketë votim. Megjithatë, qytetarët që jetojnë ose punojnë përkohësisht jashtë vendit mund të ushtrojnë të drejtën e votës nëse ndodhen në Maqedoni gjatë ditës së zgjedhjeve.
Në Spitalin Universitar të Gjenevës, mjekët i shpëtuan jetën një fëmije 12-vjeçar falë një transplanti pionier të pjesshëm të zemrës, përcjell albinfo.ch.
Kirurgët zëvendësuan vetëm dy valvula të dëmtuara, duke ruajtur pjesën tjetër të zemrës së fëmijës. Ky operacion, i pari i këtij lloji në Evropë, tërhoqi vëmendje ndërkombëtare.
Ndërkohë, studiuesit në EPFL në Lozanë kanë krijuar një “pilulë inteligjente” që mund të riparojë inde të dëmtuara në traktin tretës.
Kapsula, e kontrollueshme nga distanca, vendos substanca terapeutike direkt në zonën e prekur – një hap drejt zëvendësimit të ndërhyrjeve kirurgjikale invazive.
Në zgjedhjet e teta lokale që do të mbahen të dielën më 19 tetor 2025, të drejtë vote kanë gjithsej 1.832.415 qytetarë, prej të cilëve 1.717.803 ndodhen në vend, ndërsa 112 mijë janë të regjistruar në listën e veçantë zgjedhore si persona që jetojnë jashtë shtetit, përcjell albinfo.ch.
Po ashtu, në procesin e votimit do të marrin pjesë 2.162 persona të burgosur ose në paraburgim, si dhe 450 votues nga shtëpitë e të moshuarve.
Në diasporë nuk do të ketë votim, por qytetarët që jetojnë ose punojnë përkohësisht jashtë vendit mund të ushtrojnë të drejtën e votës nëse kthehen në Maqedoni gjatë ditës së zgjedhjeve.
Në Qytetin e Shkupit janë regjistruar gjithsej 474.304 votues. Nga komunat, më shumë qytetarë me të drejtë vote ka në:
Kumanovë – 94.041, Tetovë – 87.878, Gostivar – 82.893, Manastir – 77.253, Aerodrom (Shkup) – 68.772, Strugë –62.711, Prilep – 62.053, ndërsa më pak votues janë regjistruar në:
Lozovë – 1.905, Vevçan – 2.092, Novac – 2.429, Konçe – 2.716, Rankovcë – 2.921
Në Maqedoni, nga mesnata (00:00) fillon heshtja zgjedhore për zgjedhjet lokale që do të mbahen më 19 tetor.
Gjatë kësaj periudhe ndalohet çdo formë e fushatës zgjedhore. Qytetarët pritet të votojnë për përfaqësuesit e tyre lokalë në komuna dhe qytete. Heshtja zgjedhore zgjat deri në përfundim të procesit të votimit. Institucionet apelojnë për respektim të rregullave dhe një proces të qetë demokratik.
Nga ana tjetër, KSHZ ka bërë të gjitha përgatitjet për materialin zgjedhor, ndërkaq të shtunën – 18 tetor votojnë të pamundurit dhe të burgosurit.
Ministria e Punëve të Brendshme ka siguruar qytetarët se do të vëzhgojë situatën, madje ka paralajmëruar edhe përdorimin e dronëve.
“Në përputhje me vlerësimet e bëra dhe planet e përcaktuara në ditën e zgjedhjeve, nëpunësit policorë do të jenë të pranishëm pranë vendndodhjeve të vendvotimeve, si dhe në pikat kyçe të trafikut, me qëllim rritjen e efikasitetit dhe zbulimin në kohë të shkeljeve të mundshme të rendit dhe qetësisë publike. Siguria e qytetarëve do të garantohet me mjete standarde materiale – teknike, ekipe mobile dhe punë në pika të caktuara, si dhe do të përdoret teknologji moderne – dronë për kontrollin ajror, me qëllim reagimin më të shpejtë dhe ndërmarrjen e masave dhe aktiviteteve të duhura në rast incidentesh”, kumtoi MPB-ja.
Kurse në zyrën e Avokatit të Popullit, më 19 tetor, prej orës 7:00 deri ora 19:00, do të funksionojë linja falas e telefonit: 0800-54321, ku qytetarët do të mund të paraqesin çfarëdo shkelje të së drejtës zgjedhore.
Krahas me telefon, qytetarët do të mund të paraqesin shkelje të së drejtës së tyre zgjedhore edhe personalisht në të gjitha zyret e Avokatit të popullit në: Shkup, Manastir, Kërçovë, Kumanovë, Strumicë, Tetovë dhe Shtip, me qëllim që t’u ndihmohet në ralizimin dhe mbrojtjen e të drejtave të tyre zgjedhore. Po ashtu, qytetarët do të mund për mbrojtjen e të drejtave të tyre të paraqiten edhe në këto numra të telefonit: Tetovë: 044 344-082, Strumicë: 034 329-996, Kërçovë: 045 228-586: Manastir 047 242-310, Shtip: 032 389-701 dhe Kumanovë: 031 431-488.
Mësohet se një alpinist 79-vjeçar është gjetur i vdekur të premten pasdite mbi Alp Soll, në masivin malor të Alpstein, pas një operacioni kërkimi në shkallë të gjerë, kanë bërë të ditur autoritetet zvicerane, përcjell albinfo.ch.
Burri ishte raportuar i zhdukur në mëngjesin e së premtes pranë Policisë Kantonale të Appenzell Innerrhoden, pasi kishte dalë për një shëtitje që të mërkurën dhe nuk ishte kthyer më.
Trupi i pajetë u gjet nga ekipet e shpëtimit malor gjatë kërkimeve intensive në terren të vështirë. Gjetjet fillestare sugjerojnë se shkaku i vdekjes është një aksident, megjithëse autoritetet janë ende duke hetuar rrethanat e sakta të ngjarjes.
Policia ka shprehur ngushëllimet për familjen e viktimës dhe ka falënderuar të gjitha njësitë e angazhuara në operacionin e kërkimit dhe shpëtimit. /Albinfo.ch
Mësohet se Komiteti Ekonomik dhe Social Evropian (EESC) është bërë institucioni i parë i BE-së i cili ka vendosur të pranojë anëtarë nga Kosova pasi para më shumë se një viti kishte pranuar anëtarë nga të gjitha vendet kandidate, përcjell albinfo.ch.
Ky institucion këshillëdhënës në strukturat e Bashkimit Evropian do të ketë në përbërjen e tij edhe përfaqësues nga Kosova, të cilët do të përzgjidhen përmes procedurës që është në vazhdim e sipër. Në këtë Komitet marrin pjesë përfaqësues nga shoqëria civile, nga organizatat ekonomike, nga sindikatat dhe partnerët tjerë socialë dhe ekonomikë.
Tashmë EESC ka bërë publike shpalljen për kandidatë nga Kosova të cilët mund të paraqiten deri më datën 24 tetor. Kur të zgjedhën, ata do të marrin pjesë në punimet e këtij Komiteti në mënyrë të barabartë, sikur të gjithë pjesëmarrësit nga vendet tjera kandidate dhe nga vendet anëtare, pos që nuk do të kenë të drejtë të votojnë. E drejta për të votuar mbetet e rezervuar vetëm për anëtarët nga shtetet anëtare të BE-së.
Kur në këtë Komitet në pranverën e vitit 2024 ishin pranuar të gjitha vendet kandidate por jo edhe Kosova, kryetari i këtij Komiteti Olive Ropke i kishte thënë Kohës se “Kosova nuk mund të përfshihet për arsye formale, sepse nuk e ka formalisht statusin e kandidatit”. Në fakt Kosova akoma mbetet i vetmi shtet evropian i cili ka aplikuar për anëtarësim në BE por nuk është shqyrtuar kërkesa e saj.
Përkundër kësaj, Komiteti Ekonomik dhe Social Evropian ka gjetur mënyrën për të tejkaluar pengesën formale dhe për ta përfshirë edhe Kosovën në këtë nismë.
“Kosova nuk ishte përfshirë në fazën pilot të këtij projekti për shkak të statusit. Megjithatë, pas konsultimeve me Komisionin Evropian dhe pjesëmarrësit tjerë të rëndësishëm, u vendos që të hapet faza e dytë e kësaj nisme edhe për Kosovën si kandidat potencial për anëtarësim. Thirrja për shprehjen e interesit nga kandidatët tash është e hapur deri me 24.10.2025 dhe kur procedura e përzgjedhjes të përmbyllet anëtarët kandidat të zgjerimit nga Kosova do të kenë të njëjtin status sikur edhe kandidatët nga vendet tjera të zgjerimit”, kanë thënë nga ky institucion në përgjigjen për Kohën.
Në këtë shpallje mund të paraqiten kandidatë nga organizatat e shoqërisë civile, sindikatat dhe të gjithë partnerët ekonomikë dhe socialë.
Anëtaret e këtij komiteti që vinë nga vendet kandidate marrin pjesë aktive në punën e Komitetit ekonomik dhe Social Evropian në mënyrë të barabartë me kolegët nga vendet e BE-së por nuk do të kenë të drejtë të votës.
Në këtë Komitet në vitin 2024 ishin pranuar anëtarët nga 9 vende kandidate dhe jashtë kishte mbetur Kosova, i vetmi vend i përfshirë në procesin e zgjerimit por që formalisht nuk ka status formal kandidati për anëtarësim në BE.
Ky Komitet vitin e kaluar kishte pranuar anëtarë nga Shqipëria, Bosnja e Hercegovina, Gjeorgjia, Mali i Zi, Maqedonia e Veriut, Moldavia, Serbia, Turqia dhe Ukraina. Të gjitha këto kanë formalisht statusin e vendit kandidat për anëtarësim në Bashkimin Evropian.
Presidenti i këtij Komiteti Ropke, të cilit i ka skaduar mandati, kishte thënë se kjo nismë shënon një hap të rëndësishëm drejt integrimit gradual të vendeve kandidate edhe para se ato të bëhen vende formale anëtare të Bashkimit Evropian. Ai ka shprehur pritjet e tij që kolegët nga vendet kandidate të sjellin përvojën e tyre të dobishme në punën e këtij institucioni.
Sipas të dhënave më të fundit të Eurostat, mbi 200 mijë qytetarë të Kosovës kanë kërkuar strehim në vendet e Bashkimit Evropian gjatë pesë viteve të fundit. Kjo do të thotë më shumë se 12% e popullsisë së përgjithshme është larguar nga vendi, duke dëshmuar përmasat e një fenomeni që e kemi quajtur thjesht migrim.
Vetëm gjatë vitit 2024, 39 mijë kosovarë kanë aplikuar për leje qëndrimi në shtetet evropiane, gjysma e tyre në Gjermani, e cila prej kohësh ka qenë destinacioni më i preferuar i tyre. Në këtë vend sot jetojnë rreth 600 mijë kosovarë, një numër që e kthen diasporën kosovare në Gjermani në një nga më të mëdhatë e Evropës.
Nëse shtojmë faktin se 54% e popullsisë me origjinë nga Kosova jeton jashtë vendit (sipas MPJD), atëherë kuptojmë se Kosova është një shoqëri që përditë po e humb rininë dhe energjinë e saj më të madhe.
Ky realitet flet më shumë se çdo raport politik apo premtim elektoral. Ikja nga shtëpia nuk është një zgjedhje e lehtë, por një vendim i diktuar nga mungesa e mundësive. Të rinjtë largohen për një arsye të thjeshtë: sepse duan jetë dinjitoze, punë të ndershme, arsim cilësor dhe një të ardhme që nuk ua ofron vendi i tyre.
Çdo qytetar që largohet është një humbje e dyfishtë: një punëtor i kualifikuar më pak për tregun e brendshëm dhe një potencial i pakthyer për zhvillimin e Kosovës.
Politikat publike duhet të zhvendosen nga fjalët tek veprat konkrete: krijimi i vendeve të punës, forcimi i arsimit profesional, mbështetja e sipërmarrjes së të rinjve dhe garantimi i një shteti ligjor funksional. Pa këto hapa, Kosova do të vazhdojë ta shohë veten duke u zbrazur ditë pas dite.
Por ikja nuk është fundi i historisë sonë. Sepse diaspora, pavarësisht se u largua, nuk e harroi kurrë prej nga erdhi. Ata që ikën, u bënë ambasadorët më të mirë të Kosovës në botë: promovuan kulturën, ndihmuan familjet e tyre me remitanca, u bënë zëri i vendit në arenën ndërkombëtare dhe kontribuan në rindërtim e zhvillim.
Sot, ata vazhdojnë të jenë një forcë gjallëruese e ekonomisë dhe një urë lidhëse me botën.
Ikja dhe kthimi janë dy fytyrat e një realiteti të njëjtë. Njëra e dhimbshme, tjetra shpresëdhënëse. Dhe mes tyre qëndron sfida jonë më e madhe: të ndërtojmë një Kosovë ku kthimi të mos jetë vetëm për pushime, por për jetën e përditshme.
Në këtë numër të magazinës albinfo.ch fokusohemi tek ikja e trurit nga Kosova, një temë që prek të ardhmen e vendit dhe potencialin e tij njerëzor.
Lexim të këndshëm!
Bëhet e ditur se një shtëpi familjare në komunën Goldingen, në kantonin e St. Gallen, u përfshi nga flakët të premten në mbrëmje, duke u djegur plotësisht, ka njoftuar Policia Kantonale e St. Gallen, përcjell albinfo.ch.
Shërbimet e emergjencës mbërritën në vendin e ngjarjes, por fatkeqësisht shtëpia kishte marrë flakë në tërësi dhe u shkatërrua plotësisht nga zjarri.
Referuar autoriteteve, dëmet materiale llogariten në disa qindra mijëra franga zvicerane, ndërkohë nuk ka raportime për persona të lënduar.
Shkaku i zjarrit është ende nën hetim, ndërsa forcat zjarrfikëse dhe autoritetet përkatëse po punojnë për të përcaktuar rrethanat e plota të incidentit.
Për nder të Ditës së Flamurit dhe Pavarësisë së Shqipërisë, Ansambli “TROJET” organizon një koncert festiv më 29 nëntor 2025, në Hotel Zentrum Töss, Winterthur, transmeton albinfo.ch.
Mbrëmja do të jetë një bashkim i artit, këngës dhe valles shqiptare, duke sjellë një atmosferë të ngrohtë patriotike nën ngjyrat kuqe e zi.
Valltarët e Ansamblit “TROJET” do të prezantojnë programin më të pasur të vitit, me motive nga të gjitha trevat shqiptare. Në skenë do të ngjiten edhe kori i grave “LYRA” nga Cyrihu, si dhe këngëtarët e njohur Luljeta & Drita Fetahu, Arbnor & Rrezart Kuqi, Marisa Murtezi, Baca Shaq, Melisa Tafilajdhe Eliza Zeqiri.
Në kuadër të kësaj mbrëmjeje, do të hapet edhe ekspozita “Medalionët nuk heshtin” e artistes Valbona Gashi Shala, duke i dhënë ngjarjes një dimension të veçantë kulturor.
Programi fillon në ora 18:30, pasuar nga ekspozita në 18:45 dhe koncerti festiv në 19:30.
Pjesëmarrësit do të kenë gjithashtu mundësinë të shijojnë ushqime tradicionale shqiptare, që sjellin aromën e atdheut në zemër të Zvicrës.
Vlen të theksohet se hyrja është falas. /Albinfo.ch
Policia e Kantonit të Bernës ka zbuluar një rast të gjerë të trafikimit të qenieve njerëzore, ku janë identifikuar 90 gra të prekura, në një rrjet të dyshuar që përfshinte rekrutim për qëllime shfrytëzimi seksual. përcjell albinfo.ch.
Sipas autoriteteve, një grua 50-vjeçare me origjinë kineze, e cila posedonte një leje qëndrimi të vlefshme në Zvicër, është arrestuar në Bazel në korrik 2023 dhe pritet të dalë përpara gjykatës. Hetimet nisën në mars të po atij viti dhe aktualisht janë në fazën e përgatitjes së aktakuzës.
Sipas Zyrës së Prokurorit Publik, gruaja dyshohet se ka rekrutuar viktimat përmes platformave të komunikimit online në gjuhën kineze, duke u premtuar punë në Zvicër dhe më pas i ka shfrytëzuar për ofrimin e shërbimeve seksuale në shtëpi private, apartamente dhe hotele – kryesisht në kantonet Bernë dhe Basel-Stadt.
Autoritetet theksojnë se viktimat janë identifikuar dhe po marrin ndihmën e nevojshme. Hetimet përfshijnë bashkëpunim ndërinstitucional dhe ndërkombëtar, për të kuptuar shtrirjen e plotë të rrjetit të trafikimit dhe për të identifikuar të gjithë të përfshirët.
Rasti ka shkaktuar shqetësim të madh publik dhe institucional, duke rikthyer në vëmendje rrezikun dhe përhapjen e trafikimit të qenieve njerëzore edhe në vende me standarde të larta ligjore dhe sociale.
Zëvendës Shefi i Armatimeve në Zvicër, Thomas Rothacher, ka bërë thirrje për zhvillimin e një ekosistemi të qëndrueshëm kombëtar për prodhimin dhe eksportin e dronëve, duke theksuar nevojën për bashkëpunim mes ushtrisë, industrisë dhe institucioneve kërkimore, përcjell albinfo.ch.
Në një intervistë për gazetën “Neue Zürcher Zeitung”, Rothacher theksoi se teknologjia e dronëve është një kërcënim në rritje që ende nënvlerësohet nga publiku dhe politika. Ai tha se për t’i bërë ballë këtij realiteti të ri, Zvicra duhet të investojë në zhvillimin e dronëve vendorë, të cilët jo vetëm do të shërbejnë për mbrojtje kombëtare, por mund të eksportohen edhe jashtë vendit.
“Ideja është që kompanitë zvicerane të krijojnë dronë që mund të eksportohen. Zvicra ka potencial të jashtëzakonshëm falë universiteteve të saj të klasit botëror dhe një industrie inovative,” – tha Rothacher, i cili drejton gjithashtu Qendrën Teknologjike Armasuisse.
Ai theksoi se një qasje e tillë do të fuqizonte pavarësinë teknologjike të Zvicrës, do të përmirësonte mbrojtjen e saj dhe njëkohësisht do të hapte tregje të reja për industrinë e mbrojtjes dhe teknologjisë.
Zvicra, ndonëse një vend neutral, po e rishikon qasjen e saj ndaj sigurisë në një kontekst global të ndryshuar, ku teknologjitë si dronët kanë fituar rëndësi strategjike në operacionet ushtarake dhe civile. /Albinfo.ch
Ambasada e Zvicrës në Kosovë ka njoftuar se do të organizojë një sesion informues për Programin e Bursave të Ekselencës së Qeverisë Zvicerane (ESKAS), të dedikuar për studentët dhe studiuesit nga Kosova të interesuar për studime në Zvicër, transmeton albinfo.ch.
Sesioni do të mbahet më 23 tetor 2025, në ora 11:00, në auditorin e Bibliotekës Kombëtare të Universitetit të Prishtinës.
Ky sesion synon të ofrojë informacione të detajuara për kriteret e pranimit, procesin e aplikimit dhe përfitimet që ofron kjo bursë prestigjioze. Të ftuar të marrin pjesë janë studentët pasuniversitarë, kandidatët për doktoraturë dhe studiuesit postdoktoralë që synojnë të zhvillojnë karrierën e tyre akademike në Zvicër.
Programi ESKAS, i financuar nga Konfederata Zvicerane, mbështet shkëmbimin akademik ndërkombëtar dhe u ofron bursistëve mbulimin e shpenzimeve të jetesës, sigurimin shëndetësor dhe rimbursimin e fluturimeve.
Afati për aplikim për vitin akademik 2026–2027 është deri më 28 nëntor 2025.
Për më shumë informacione rreth programit, kritereve dhe dokumentacionit të nevojshëm – https://www.sbfi.admin.ch/en/swiss-government-excellence-scholarships?fbclid=IwY2xjawNgIIxleHRuA2FlbQIxMQABHnGo_u0Aa3pprA25cE63uPB5F_vCBZVfMy2AhSCGRxAw10yQmM0SlskbfrlA_aem_PlZY4bD5RBsrlkrscFiyXA
Një çift shqiptar që jeton në Britani të Madhe ka fituar plot 600 mijë euro në lotari, duke u bërë kështu një nga fituesit e fundit të mëdhenj të këtij viti, transmeton albinfo.ch.
Valdet Bujupi, i cili prej vitesh jeton e punon në Britani, është shprehur se pjesën e parë të shumës do ta përdorë për të ndihmuar nënën e tij në Kosovë. “Ajo ka sakrifikuar shumë për ne. Tani është koha t’ia kthejmë diçka mbrapsht,” ka thënë ai për BBC.
Krahas ndihmës për familjen, çifti ka zbuluar edhe një tjetër ëndërr që tashmë do të realizohet: një udhëtim i gjatë në Nju-Jork, i cili, siç thonë ata, është planifikuar prej vitesh por është shtyrë për arsye financiare.
Fitorja e çiftit Bujupi është pritur me shumë interes në mediat britanike, si një histori suksesi e një familjeje emigrantësh që e kanë ndërtuar jetën me punë, përkushtim dhe fat./Albinfo.ch
Orkestra Simfonike e Teatrit Kombëtar të Operës, Baletit dhe Ansamblit Popullor ka shënuar një sukses të veçantë me debutimin e saj në Festivalin prestigjioz “Respighi Bologna 2025”, transmeton albinfo.ch.
Në skenën e Teatro Auditorium Manzoni, mbi 70 muzikantë shqiptarë interpretuan nën drejtimin e maestro Sergio Alapont, me violinistin virtuoz Giuseppe Gibboni si solist.
Programi përfshiu vepra nga Rimsky-Korsakov, Paganini, Respighi dhe Stravinsky, duke sjellë një performancë që u shpërblye me duartrokitje të gjata nga publiku italian.
Ky debutim shënon një arritje të rëndësishme për ansamblin shqiptar në skenat ndërkombëtare të muzikës klasike.
Masat e marra nga Gjeneva kundër përdorimit të pakujdesshëm të skuterëve elektrikë kanë çuar në qindra shkelje dhe dhjetëra konfiskime, transmeton albinfo.ch.
Midis fundit të majit dhe fillimit të tetorit, policia kreu më shumë se njëqind kontrolle në zona të ngarkuara si Jardin Anglais dhe Parc des Bastions.
Në total u kontrolluan 190 skuterët elektrikë.
Disa prej tyre shënuan shpejtësi mbi 30 kilometra në orë, shumë mbi limitin prej 20 kilometrash.
Ato automjete u sekuestruan dhe u shkatërruan, dhe pronarët e tyre u gjobitën me disa qindra franga.
Qyteti thotë se zbatimi i ligjit do të vazhdojë për të siguruar rrugë më të sigurta për këmbësorët.
Komiteti i Arsimit i Këshillit të Madh të Gjenevës ka dyfishuar vendimin e tij për t’i dhënë fund arsimit shkollor për ato familje që jetojnë jashtë kantonit, transmeton albinfo.ch.
Kjo po prek kryesisht familjet që jetojnë në Francën fqinje – në shumë raste brenda 5 kilometrave nga kufiri.
Qeveria kantonale ka vendosur që, duke filluar nga viti i ardhshëm, asnjë fëmijë që jeton jashtë kantonit nuk do të pranohet në shkolla me një zbatim gradual gjatë tre viteve të ardhshme.
Partia Socialiste paraqiti një mocion që të gjithë nxënësit në sistemin shkollor duhet të jenë në gjendje të përfundojnë studimet e tyre – kjo do të thotë se heqja graduale mund të zgjasë deri në 15 vitet e ardhshme.
Por kjo është refuzuar nga Komiteti i Arsimit.
Rezervimi i një Uber në Cyrih mund të jetë i vështirë të hënën. Rreth një mijë shoferë planifikojnë të bëjnë grevë, për të protestuar kushtet e tyre të punës dhe të pagave.
Shoferët denoncojnë rënien e tarifave, rritjen e kostove dhe konkurrencën në rritje, veçanërisht që kur platforma rivale Bolt hyri në tregun e Cyrihut me çmime më të lira.
Uber u përgjigj duke ulur tarifat e veta, duke ulur edhe më tej të ardhurat e shoferëve. Sindikatat thonë se lufta e çmimeve po zhvillohet në kurriz të shoferëve. Uber ende nuk ka komentuar, transmeton albinfo.ch.
Opinione Viti i diasporës: Kush vendos për fatin e Kosovës?
Opinione Mos prekni të drejtën e votës së të huajve
Opinione Oh sa vështirë me qenë shqiptar
Opinione Kafeneja
Opinione Ikja nga shtëpia
Opinione Gjenerata që sakrifikoi gjithçka për atdhe
Opinione Kur donacionet dhe grantet zëvendësojnë buxhetin komunal
Opinione Shën Nënë Tereza – shembull i gjallë i dashurisë
