Danimarka dhe Norvegjia hapin kufijtë për këto vende

Danimarka që mbylli kufijtë e saj në mes të marsit, gradualisht po heq kufizimet. Por, kjo nuk do të vlejë për disa vende të cilat kanë numër të lartë të personave të infektuar me COVID-19

Ministria e Jashtme daneze ka njoftuar sot se është vendosur një kufi prej maksimalisht 20 të infektuar rishtas për 100,000 banorë në javë, duke e bërë të pamundur që britanikët, irlandezët, maltezët, portugezët, rumunët dhe shumica e suedezëve të hyjnë në Danimarkë.

“Lehtësimi i paralajmërimeve të udhëtimit tregon se Danimarka dhe shumica e Evropës janë në një pozitë shumë më të mirë nga sa kishim shpresuar deri vonë”, tha ministri i Jashtëm, Jeppe Kofod, shkruajnë mediat ndërkombëtare.

Ndalesa do të vazhdojë të ketë edhe për shtetin fqinj, Suedinë. Udhëtarët nga disa provinca suedeze do të jenë në gjendje të vizitojnë Danimarkën nën një dispozitë të veçantë për rajonin Nordik, i cili bazohet në shkallët e infeksionit rajonal.

Ndërsa Norvegjia, pritet që kufijtë e saj t’i hapë nga muaji korrik, përcjell tutje albinfo.ch.

Zona Shengen dhe Zona Ekonomike Evropiane do të kenë mundësinë të udhëtojnë për në Norvegji nga 15 korriku, nëse niveli i infeksionit vazhdon të mbetet i ulët.

Nga Instituti Norvegjez i Shëndetit Publik është bërë e ditur se do të publikojë një listë të vendeve dhe rajoneve nga të cilat do të jetë e mundur të hyni në Norvegji deri më 10 korrik.

Kjo listë do të azhurnohet çdo dy javë dhe përqindja e personave të infektuar në numrin e përgjithshëm të popullsisë merret si kriter.

---