DASH: S’kemi çfarë t’u shtojmë deklaratave të Boltonit për kufijtë 

Në Departamentin e Shtetit u është thënë se nuk kanë çfarë t’u shtojnë deklaratave të Bolton-it

Departamenti Amerikan i Shtetit nuk ka komentuar qëndrimin e John Bolton, këshilltar për Siguri Kombëtare në Shtëpinë e Bardhë.

Zëri i Amerikës në gjuhën serbe thotë se në Departamentin e Shtetit u është thënë se nuk kanë çfarë t’u shtojnë deklaratave të Bolton-it. Ndërsa analisti dhe profesori Daniel Serwer ka thënë se Gjermania nuk do të pranojë ndryshimin e kufijve në Ballkan.

“Është me rëndësi të merret parasysh se dy palët vështirë e kanë të pajtohen. S’mund të ketë vetëm ndarje të Kosovës. Nëse Serbia e do veriun e Kosovës, atëherë Prishtina e kërkon Luginën e Preshevës, e këtë vështirë se do ta pranojë Serbia”, ka thënë ai. Kur amerikanët edhe evropianët kanë dallime për Ballkanin, atëherë kjo është diçka e keqe, sipas Serwerit.