E-Diaspora

Dënohen me burgim dy persona: Kanë “martuar për letra” 35 kosovarë

Për shërbimet e kryera, dy personat në fjalë kanë fituar rreth 400 mijë euro

Gjykata e Landit (republikane) e Frankfurtit ka dënuar dy persona për ndërmjetësim të lidhjes së martesave fiktive. Njëri prej tyre ka marrë dënimin me tre vjet e dhjetë muaj heqje lirie, ndërsa tjetri tre vjete. “Viktimat” e tyre kanë qenë kryesisht nga Kosova, shkruan Agjencia Gjermane e Lajmeve, DPA.

Trupi gjykues ka konstatuar se personat e përmendur, njëri 37 dhe tjetri 49-vjeçar, kanë bërë falsifikim dokumentesh dhe shkelje të ligjit mbi lirinë e lëvizjes, transmeton albinfo.ch. Vendimi i dënimit ende nuk është i plotfuqishëm.

Dy të akuzuarit, brenda një periudhe prej tre vjetësh, kanë sjellë në Gjermani 35 punëtorë nga vendet jashtë BE-së, kryesisht nga Kosova. Këtu, nëpërmjet lidhjes së martesave fiktive me gra çeke, ata kanë siguruar “letrat” për të punuar në Gjermani dhe dokumentet që u kanë siguruar lëvizje të lirë në këtë vend si dhe në gjithë BE-në.

Për shërbimet e kryera, dy personat në fjalë kanë fituar rreth 400 mijë euro, përcjell albinfo.ch. Shumica e të hollave janë paguar për ndërmjetësuesit e tyre.

Ata kanë pranuar veprën qysh në momentin e arrestimit të tyre.

Gjykata e Landit e Frankfurtit ka dënuar në javët e kaluara në dy raste të ngjashme persona për ndërmjetësimin e martesave fiktive.