EULEX konfirmoi fletarrestin për Fatmir Limajn

"Çështja e imunitetit të deputetit Fatmir Limaj është duke u sqaruar", thuhet në komunikatën e EULEX-it

Misioni evropian i sundimit të ligjit në Kosovë, EULEX, nëpërmjet një komunikate për media, konfirmoi sonte se ka një fletarrest për Fatmir Limajn, që ka të bëjë me ashtuquajturin “Rast i Kleçkës”. Sipas komunikatës, prokurorët e EULEX-it kanë qenë në kontakt me deputetin e PDK-së, për të diskutuar gjendjen e tij, ngase është deputet në Kuvendin e Kosovës dhe për këtë arsye ka të drejtë për imunitet.　

“Çështja e imunitetit është duke u sqaruar”, thuhet në komunikatë.

Po ashtu EULEX-i ka konfirmuar se më 16 mars nëntë vetë u arrestuan në një hetim lidhur me krimet e luftës. Urdhri për arrestimet e ish-pjesëtarëve të UÇK-së janë lëshuar nga një gjyqtarë I procedurës paraprake në Gjykatën e Qarkut në Prishtinë.

Pas arrestimit dhe paraqitjes së individëve në gjykatë, pesë persona janë ndaluar për 30 ditë, dy kanë arrest shtëpiak dhe njërit i është urdhëruar që të paraqitet në stacionin e policisë tre herë në javë. Ndërkohë një i kërkuar është arrestuar në Zvicër dhe pritet të ekstradohet në Kosovë.

Akuzat kundër këtyre të pandehurve kanë të bëjnë me vrasje, tortura dhe shkelje e integritetit të trupit dhe shëndetin e shqiptarëve të Kosovës dhe të civilëve serbë dhe të burgosurve të luftës në fushën e Kleçkës në vitin 1999.

Hetimet janë duke u mbikëqyrur nga prokurorët e EULEX-it, ndërsa rasti po udhëhiqet nga Zyra e Prokurorisë Speciale të Kosovës