Euro në ‘rënie të lirë’

Prej gati dy javësh euro po shënon rënie në Shqipëri. Sipas kursit zyrtar të Bankës së Shqipërisë, një euro këmbehet me 133.47 lekë, niveli më i ulët që prej 12 shtatorit të këtij viti.

“Tradicionalisht monedha e përbashkët është e fortë në këtë periudhë, pas rënies në periudhën e verës si rrjedhojë e prurjeve të emigrantëve dhe të ardhurave nga turizmi. Nga shtatori, leku fillon e zhvlerësohet ndaj euros, teksa aktiviteti tregtar i kthehet normalitetit çka shoqërohet me rritje të kërkesës për valutë”, shkruan ‘monitor’.

Ndonëse euro është me rënie të lehtë në bursa, sërish ajo vijon të këmbehet në rreth 1.18 dollarë, duke mos qenë faktor përcaktues për luhatjet në tregun e brendshëm, përcjell albinfo.ch.

Që prej fundit të vitit 2016, euro në Shqipëri po luhatet afër niveleve më të ulëta të 9 viteve, ku faktori kryesor mbetet ofertat e lartë e valutës në tregun vendas, që ka ardhur kryesisht nga hyrjet e valutës nga aktivitete të paligjshme, por edhe si rrjedhojë e përmirësimit të dukshëm të bilancit të pagesave (shtimit të turistëve dhe rritjes së eksporteve të shërbimeve).