Fahrije Hoti: Peci të kërkojë falje publike, nuk lejoj të njolloset emri im dhe i grave të Krushës

Foto FB: KB Krusha

Udhëheqësja e Kooperativës Bujqësore “Krusha”, Fahrije Hoti, ka kërkuar nga ministri i Bujqësisë në Kosovë, Faton Peci, të kërkojë falje publike ndaj saj dhe të gjitha grave të Krushës për, siç tha ajo, “njollosje të emrit dhe shpifje ndaj grave të Krushës”.

Në një konferencë për media, Hoti sot ka thënë se nuk e lejon askënd që të njollosë emrin e saj personal.

“Ministri Faton Peci ka një javë që merret me çështjen e zonjës Fahrije Hoti. Nuk lejoj assesi që të më njolloset emri im personal, që unë e kam nisur pa ndihmën e kërkujt, po ndërkohë na janë bashkëngjitur njerëz të tjerë që na kanë ndihmuar”, u shpreh ajo, transmeton albinfo.ch.

Sipas saj, nga Ministria e Bujqësisë nuk kanë marrë përkrahje që nga 2015 e deri më sot.

“Kemi aplikuar, jemi refuzuar jo në 2024, por nga 2015 deri më sot nuk kemi marrë përkrahje, arsyeja ka qenë se nuk kemi përmbushur ndoshta kriteret në 2015. Por në 2023 kooperativa kurrë më parë nuk ka qenë më e kompletuar se sot, duke marrë parasysh eksportin në BE dhe SHBA”, tha Hoti.

Tutje, ajo ka shtuar se nuk do ta akuzojë asnjë subjekt politik dhe se “gjithmonë e kemi pasur derën e hapur për të gjithë dhe vazhdojmë ta kemi”.

Fahrije Hoti ka thënë se asnjëherë nuk ka pasur ndonjë ftesë nga gjykata, siç ka deklaruar Peci.

“Ministri Peci e ka përmendur që zonja Fahrije Hoti është paditur në Gjykatë, përkundrazi unë nuk kam marrë një ftesë të atillë, asnjëherë nuk më është adresuar një ftesë që unë jam e paditur që nuk i kam kthyer mjetet që m’u kanë ekzekutuar në vitin 2015-2017. Unë nuk e di ku e ka marrë atë dosje dhe kërkoj nga ministri bashkë me dosjen të kërkojë falje për këtë njollosje që iu ka adresuar jo vetëm Fahrijes, por të gjitha gratë e Krushës. Ministri të ulet dhe të kërkojë falje publike e jo të vazhdojë me shantazime, video e shkrime në rrjetet sociale”, ka deklaruar ajo.