Familjarët, të bindur se eskorta e ambasadores turke ishte fajtore

Familjarët e katër viktimave, të cilët vdiqën në aksidentin e të premtes në magjistralen Prishtinë-Gjilan, janë të bindur se eskorta e ambasadores turke në Kosovë, Kivlicim Kiliç, e cila ishte e përfshirë në këtë aksident, ishte shkaktar i vdekjes së Agron Shalës, 22 vjeç, Osman Shalës, 65 vjeç dhe Arife Shalës, 88 vjeçe, si dhe të Elfete Rashitit.

Ata i kanë deklaruar gazetës Koha Ditore se kanë humbur besimin tek institucionet e Kosovës dhe se nuk presin hetime të drejta për këtë rast.

Sipas tyre, institucionet e Kosovës më shumë janë duke u brengosur për lëndimet e ambasadores turke, sesa për qytetarët e saj të vdekur, përcjell albinfo.ch.

Familjarët nga fshati Ponesh i komunës së Gjilanit kanë deklaruar se do të angazhojnë një përfaqësues ligjor me qëllim zbardhjen e rastit.

Hetime transparente për rastin ka kërkuar edhe imami i fshatit, i cili ka deklaruar se familjarët do të angazhohen me qëllim ndriçimin e rastit.