Feith, kërkon respektim të vendimit të kushtetueses

Ai nuk ka dashur të komentojë mundësinë e arrestimit të deputetëve nën hetime, duke thënë se kjo nuk është në kompetencë të tij

Përfaqësuesi Civil Ndërkombëtar, Pieter Feith ka kërkuar nga institucionet dhe qytetarët e Kosovës që të respektojnë vendimin e Gjykatës Kushtetuese lidhur me çështjen e imunitetit të deputetëve.

Duke përshëndetur këtë hap të Gjykatës Kushtetuese, Feith ka thënë se nuk vend për shqetësim pas këtij vendimi.

Ai nuk ka dashur të komentojë lidhur me mundësinë e arrestimit të deputetëve nën hetime, duke thënë se kjo nuk është në kompetencë të tij.

Megjithatë, ka thënë se shpreson që institucionet relevante do të dinë çfarë të bëjnë në këtë drejtim.

Pas kërkesës së Qeverisë së Kosovës drejtuar Gjykatës Kushtetuese për të sqaruar imunitetin e deputetëve të Kuvendit të Kosovës, të martën Gjykata Kushtetutës e Republikës së Kosovës, ka njoftuar se deputetët nuk gëzojnë imunitet nga ndjekja penale për veprimet e ndërmarra jashtë fushëveprimit të përgjegjësive të tyre.

Ndërkohë vendimi i kësaj gjykate nuk i është dorëzuar ende Prokurorisë së shtetit, në mënyrë që ajo të vazhdojë me hapat e mëtutjeshme.

Kryeprokurori i shtetit, Ismet Kabashi ka thënë se Prokuroria do ta respektojë vendimin e Kushtetueses dhe do t`i ndërmarrë të gjithë hapat e nevojshëm.