Francë: Bie kërkesa për verën, vendi ndan 200 milionë euro për prodhuesit

@Pixabay

Franca do të ndajë 200 milionë euro për të blerë sasinë e tepërt të verërave dhe për të mbështetur prodhuesit, pas problemeve në këtë industri, ku përfshihet rënia e kërkesës për verë, pasi më shumë njerëz pinë birrë artizanale, shkruan BBC, përcjell albinfo.ch.

Kjo industri gjithashtu po goditet nga mbiprodhimi dhe kriza e kostos së jetesës, teksa shumica e 200 milionë eurove do të përdoren për të blerë stokun e tepërt, me alkoolin që shitet për përdorim në artikuj të tillë si dezinfektues duarsh, produkte pastrimi dhe parfum.

Në përpjekje për të reduktuar mbiprodhimin, paratë do të jenë gjithashtu në dispozicion për vreshtarët për të kaluar në produkte të tjera, si ullinjtë.

Ministri francez i Bujqësisë, Marc Fesneau, ka thënë se me derdhjen e parave në industri, qeveria synon të ndalojë kolapsin e çmimeve në mënyrë që prodhuesit e verës të mund të gjejnë përsëri burime të ardhurash.

Sipas të dhënave të Komisionit Evropian për vitin 2023, deri në muajin qershor konsumi i verës ka rënë 7% në Itali, 10% në Spanjë, 15% në Francë, 22% në Gjermani dhe 34% në Portugali, ndërsa prodhimi i verës në gjithë bllokun, zonën më të madhe të prodhimit të verës në botë, u rrit për 4%.