Kosova

Fshati Llashticë i pastër, mërgimtarët paguajnë bashkëfshatarin për mirëmbajtje

Për fshatin Llashticë thuhet se është i pasur me natyrë e mirë, ajër të pastër, vend karakteristik me male, shtëpi të bukura, pastërti, këto janë disa nga karakteristikat që e karakterizojnë këtë fshat të komunës së Gjilanit, transmeton albinfo.ch.

Llashtica ka afërsisht 2.300 banorë, shumica e tyre merren me bujqësi e blegtori. Thuhet se diku 40 për qind e llashticasve janë në vende të ndryshme të diasporës, si Zvicra, Gjermania, Shtetet e Bashkuara e Kanadaja. Ka dy vjet që ata kanë themeluar Shoqatën “Llashtica, Vendlindja ime”, duke dhënë kontribute për ndërtim të shtëpive e mirëmbajtje të fshatit.

Ndërkohë në pastrimin dhe mirëmbajtjen e pjesëve të ndryshme është përfshirë për herë të parë para dy vjetësh Fadil Rexhepi. Kjo tashmë për të është punë me orar të rregullt që mbështetet nga shoqata në diasporë.

Në mot të ftohtë e të nxehtë, ai e bën këtë punë, ndërsa shton se edhe fshatrat e tjera do të duhet ta angazhonin një punëtor të pastrimit e mirëmbajtjes, shkruan koha.net

Komente të mira për punën e tij ka edhe drejtori i shkollës “Esat Berisha”, Nehat Shabani. Sipas tij, puna e Rexhepit ka bërë që shumë më shumë banorë të fshatit të vetëdijesohen për rëndësinë e pastërtisë.

Ai thotë se shoqata e bashkëfshatarëve të diasporës janë shtyllë e fortë që i ndihmon fshatit.

Ndërkaq, Fadil Rexhepi e sheh këtë fshat si më të pastrin, të paktën për komunën e Gjilanit.