Fushata zvicerane për “superushqime” miqësore me klimën

Për të shënuar Ditën Botërore të Ushqimit të hënën, OJQ-ja zvicerane “Swissaid” po jep alarmin: uria nuk po largohet.

Indeksi Global i Urisë për vitin 2023 tregon se 735 milionë njerëz janë të kequshqyer, krahasuar me 572 milionë në vitin 2017, njofton swissinfo.

Objektivi numër dy i Agjendës së Kombeve të Bashkuara për të eliminuar urinë deri në vitin 2030 duket se po ikën më tej, tha Swissaid në një deklaratë të shtunën, ndërsa në 14 vende progresi është praktikisht në ngecje, shkruan albinfo.ch.

Në 18 vende uria është rritur që nga viti 2015 dhe në 58 vende tashmë është e sigurt që objektivi Zero Uri nuk do të arrihet në kohë. Afrika Sub-Sahariane është veçanërisht e goditur rëndë.

Përveç krizave të lidhura me klimën, konflikteve të armatosura dhe ndërprerjeve në zinxhirët e furnizimit, struktura dhe funksionimi i sistemeve ushqimore janë një problem madhor: në shumë vende, ato nuk janë as të qëndrueshme dhe as të përgatitur për pasojat e ndryshimit të klimës.

Projektet e kësaj organizate joqeveritare po ndihmojnë njerëzit vendas të kalojnë në bujqësi rezistente ndaj klimës, lokale, sociale dhe të qëndrueshme.

“Projektet agroekologjike japin një kontribut të madh për një sovranitet më të madh ushqimor”, tha Markus Allemann, drejtor i Swissaid.

Tutje në deklaratë thuhet se njohja e drithërave dhe perimeve lokale të përshtatura me kushtet klimatike është një element i rëndësishëm në përmirësimin e sigurisë ushqimore.

“Për fat të keq, kjo njohuri shpesh harrohet dhe shumë varietete autoktone që dikur konsumoheshin po zëvendësohen gradualisht me produkte të importuara. Për shembull, gruri po fiton terren në kurriz të melit në disa rajone të Afrikës”, thuhet ndër të tjera.