Kosova

Hapet Pavijoni i Kosovës në Bienalen e Venecias

Në Bienalen e Venecias, në Itali, është hapur Pavijoni i Kosovës, shkruan albinfo.ch. Në ceremoninë e hapjes morën pjesë edhe ministri i Kulturës, Kujtim Gashi dhe kryeparlamentari Kadri Veseli.

Në një nga ngjarjet kulturore më të rëndësishme në botë, Kosova po prezentohet me projektin e artistit Alban Gashi, i cili me këtë projekt, ndër të tjera, po paraqet në Venecie të kaluarën e shqiptarëve të Kosovës.

Përmes një postimi, ministri Gashi ka thënë se artisti Alban Gashi, komisionerja Arta Agani dhe ekipi punues kanë bërë një punë të jashtëzakonshme për ta paraqitur Kosovën në mënyrë sa më të dinjitetshme.

“Jam shumë i lumtur që Kosova artistët i ka ambasadorët më të mirë, të cilët po e promovojnë shtetin tonë gjithandej botës. Si ministër jam në mbështetje të plotë të artistëve tanë dhe projekteve kulturore, të cilat tashmë janë prezente në shumë ngjarje me renome botërore”, është shprehur Gashi.

Bienalja e Venecias do të qëndorojë e hapur deri më 24 nëntor të këtij viti.