Khartoum, të paktën 40 civilë u vranë nga bombardimet e një tregu

Të paktën 40 civilë u vranë dhe dhjetëra të tjerë u plagosën në një bombardim ajror në një treg në kryeqytetin e Sudanit, Khartoum, tha të dielën një organizatë lokale vullnetare.
Nëse konfirmohet, ky do të ishte bombardimi më vdekjeprurës që nga fillimi i përleshjeve midis ushtrisë së rregullt të gjeneralit Abdel Fattah el Bourhan dhe Forcave të Mbështetjes së Shpejtë, një grup paraushtarak, në muajin prill, shkruan RTS, përcjell albinfo.ch.

Mjekët pa Kufij (MSF) nga ana e tyre raportuan 35 vdekje dhe 60 të plagosur. Organizata humanitare, e pranishme përmes një spitali në jug të Khartoum, ka njoftuar se tregu Gorro ishte goditur në orën 07:00 dhe se mjekët e saj kishin ndaluar numërimin e të plagosurve përballë urgjencës së tyre.

Sipas një dëshmitari që kërkoi anonimitetin për arsye sigurie, dronët kryen një seri sulmesh ajrore intensive të dielën në mëngjes në një lagje të madhe në Khartoum jugor, kryesisht të kontrolluar nga RSF.

RSF dhe ushtria fajësuan njëri-tjetrin për këtë sulm.

“Khartoum ka qenë në luftë për gati gjashtë muaj. Megjithatë vullnetarët (…) janë të tronditur dhe të shqetësuar nga shkalla e tmerrit që ka goditur qytetin sot”, tha Marie Burton, koordinatore e MSF.

---