Lajme

Ka marrë pa të drejtë 500 mijë franga të kredisë Covid: 9 muaj burg për mashtrim

I akuzuari kishte marrë kredinë për Covid mbi bazë të informacioneve të rreme, duke shfrytëzuar gjendjen e jashtëzakonshme në vitin 2020

Për shkak se një person kishte marrë pa të drejtë një kredi Covid prej 500,000 frangash nga qeveria federale, ai është dënuar me burg. Kështu ka vendosur Gjykata Penale në Luzern, transmeton albinfo.ch.

Gjykata e ka dënuar 42-vjeçarin me 33 muaj burg pjesërisht me kusht ndërsa ai duhet të mbajë nëntë muaj burg efektiv. Gjykata e ka shpallur fajtor atë ndër të tjera për mashtrim dhe falsifikim, shkruan agjencia e lajmeve Keystone-SDA.

Ai kishte marrë kredinë për Covid mbi bazë të informacioneve të rreme. Ndihma e urgjencës federale ishte menduar për kompanitë e vogla dhe të mesme që ishin në vështirësi financiare të shkaktuara nga pandemia korona.

I akuzuari kishte shfrytëzuar në mënyrë të paskrupullt gjendjen e jashtëzakonshme në Zvicër në mars të vitit 2020 për t’u pasuruar, thuhet në aktakuzën, transmeton albinfo.ch. I akuzuari më parë drejtonte një kompani që kishte falimentuar në vitin 2018.

Aktgjykimi është përfundimtar. Ai ka ardhur në procedurë të shkurtuar, që do të thotë se i akuzuari ka pranuar pretendimet e prokurorit publik dhe dënimin.